Read Ninia Yali YEHEZKIEL 29 Bible Online

YEHEZKIEL 29 - Ninia Yali bible

YEHEZKIEL 29

¹ Nit hele waroho hwik nenebik lauswama weregman neg tanggal dua belas bigalem num on fam tahun mel num on deg kweleg TUHAN ele an nobam uruk kwit,

²“Ap homi waratuk on su yei raja Mesir on fahet holok duruk kamin. At fam mel ap homi Mesir on fam mel mundoho unggum og-hesahuk” ulug hweag-esakin isi.

³TUHAN Mun Leho wereg on en wene dukwag ulug su raja Mesir on hweag-irik lowag ulug mingming napsi, “An sure hat haselei on deg lahi, ayowa yaron ik lauk on ahum bul yinggig lahen on dau u. Hat hele en werahap hauk kwit Ik Nil ai an nangge an den wal-dirihik[64] on uruk kahen.

⁴An den ikan aeg hat helahandu fam folog debehuk deg ikan de hat hamurul fene omano dag debeil lahuk. Airoho debelug hat de Ik Nil ai fam en An den ikan hat hamurul fam dag deg on etma nim lisoho wilibi hobahaik waruhuk.

⁵Ai en hat nim ikan etma nim An den hamboko ik inggimu etma hwik henebuhuk. Hebe kwenangma belabe hobahakuk mu etma yinggig laruhun. Ap misig en oho eke hebe wareg sal habuhup fug. Hebe wareg de An den sue nim, oluk-oluk angge amu on nim en noag ulug og-esahuk.

⁶ Ai fam de ap homi Mesir on abirangge en An TUHAN anyo eneluk amuhup” isi. TUHAN ele uruk kwit, “Unggul unuk Mesir on su yei! Ap Israel on en de haren let-neneplep ulug enenda ebereg famen, hat de we domuk maben on hag deg lahen angge fahet.

⁷Airegma it en hat fam neg mera amul ulug durukmu re, hat hebe somboroho it enekal elekwe lahakumu, it enambol fulogdoho[65] dal-fal uhup.

⁸Ai fam de An TUHAN Mun Leho welahi on en hat hobam nele uruk kahi, An den tentara hat huk habukwag ulug mondorik waruhukmu, karog walug waharuk kwit, ap homi mel wam mel enowaruhup.

⁹Mesir fobik kwenang ap homi birimdoho elegma aruhu. Ai fam hit en An TUHAN ai heneluk amuhup” isi. TUHAN ele uruk kwit, “Hat raja Mesir on su! Haren uruk kwit de, Ik Nil ai hat hahaik, hat en buhun dirihin on uruk kahen,

¹⁰Ai fam de An hat haselei on atihik ai, hahaik Nil mel aselei on atihik. O Mesir fene mun furoho elehap debesehuk, aire kota Migdol utara fil en indip duhuk angge lauk karuhuk deg, huli kota Aswan selatan huli fam, etman huli huli re o Sudan hulimu debehuk.

¹¹Ap homi oho lobo duruk angge oho eke kwe ai lauk kamuhup fug. Empat puluh tahun anunuroho ap eke wereg lamuhup fug.

¹²An den Mesir kwenang fam mun birim debehuk, mu re o kwenang mun birim deg on etmano sahalimu en de Mesir neg de alongdoho deg laruhu. Empat puluh tahun anunuroho eta fam kota Mesir fene etma re o meiyaleg o olun doho deg laruhu. Aire o amu kwe o meiyaleg en olun deg on etma maben hag deg famen de Mesir neg de alongdoho deg laruhu. Enunggul unuk Mesir on de An den it muko wilibi fesehukmu di kwe su kwe lauk on doho welamuhup. It de o kwenang amu-amu kwe del-foldoho sahareg lit di ap su ap enunggul unuk amu on enesahali kwe welamuhup” isi.

¹³TUHAN Mun Leho wereg on ele uruk kwit, “Hit hununggul unuk Mesir on yei, empat puluh tahun mundoho debelug de kwenang hit sahareg lamuhupmu etman An den og-heneplug waruhuk.

¹⁴Hit an den hwale henobahakuk deg oko henanggwenang indipmu Mesir selatan fil etma welamek ulug hweag-hesahuk. Etma hit en kerajaan maben on eke unduhuk fohup,

¹⁵aire mun maben on o kwenangma mundoho ai hag wereg fug on. An den hit mundoho mabene henobahakukmu hiren enunggul unuk amu amu on eke melal-enepuk kamuhup fug, ite it inil hanim leho fahat dauk kamuhup fug.

¹⁶Israel en hit en let-nenebiek ulug eke nim heng henebuhup fug. Hit Mesir on yei hit fam ambiangma amuhup ale aire, Israel on en hat fam hembisig lit duruk katuhuk ale aire nong-hong doho furuhuk, ulug iren dusa ale ai fahet ebet enesauk karuhu. Ai fam de An TUHAN Mun Leho on welahi ale anyo it Israel on en enoluk amuhup” isi.

¹⁷Tanggal satu bulan satu tahun dua puluh tujuh fam nit hele wareg hwik nenepswama wereg li etma, TUHAN ele an hweag-nutuk kwit,

¹⁸“Ap homi waratuk on su yei, Raja Nebukadnezar o Babel on, en Tirus on enowarikoho huk enepuk. Airoho duruk kwit aren ap sehen seneg enap omano fam de anggin angge harukwag ulug hweag-esaukmu, enenggul delag deheg, inum anggen wereg, duruk famen de at raja oho ne it sehen seneg enap oho iren duruk on ai ambiangma eke hwelauk fug.

¹⁹Ai fahet de An TUHAN Mun Leho welahi on en nele uruk kwit: Kwenang Mesir aire an den Raja Nebukadnezar og-uruhuk. Mu aren de enangge del deheg daluk deheg duruk kwit, Mesir angge di angge su angge omano at angge aruhureg, autsi tentara yohwan esaroho hohouk dulug lahu.

²⁰Kwenang Mesir kwenang aire An den at onggo hagdoho og-uruhuk, aire tentara aren on en yabuk An nobahet duswa ai fam. An TUHAN Mun Leho welahi on en nele uruk kahi” isi.

²¹“Nanggig liem wene ai lahe atuk halug de An den Israel unggul unuk mun omamne humon debehuk, deg hat Yehezkiel en hele koloroho matukmu ap abirangge holduk kamuhup en debehuk. Ai fam iren An TUHAN ulug eneluk amuhup” isi.