Read Ninia Yali YEHEZKIEL 3 Bible Online

YEHEZKIEL 3 - Ninia Yali bible

YEHEZKIEL 3

¹ Allah ele uruk kwit, “Ap homi waratuk on su yei, buku hulilip deg angge su nakin. Nalug lamihindeg de, ap homi Israel on nim hele marik lakin,” ulug hweag-nitsi.

²Ai isimu an nambilik a reberihikmu Allah en buku hulilip deg anyo oko nambilikmu kwelabe fesimu nawihik.

³Mu ele hweag-nutuk kwit, “Hat ap homi waratuk on su yei! buku hulilip deg angge su hahummu yohwarin.” Ai isimu an nawihikmen unduk de kin ahalue unduk mitdeg hag deg latsi.

⁴Allah ele eke uruk kwit, “Ap homi waratuk on su yei, hat lamihindeg de ap homi Israel on fam An den diroho diuk suroho diuk ulug uruk kahi on etma it hweag-esa lakin.

⁵It enekit An den hat mon-hapuk kahi, unggul unuk enele amu on weregma mon hapuk kahi fug. Hat enele furebouk fug ale degma fug, airegma mon hapleman de, hat hele uruk on de it en hat hele uruk on etma furoho holep.

⁷Famen de unggul unuk Israel hat hele holuhup fug. An nele oho furoho holduk fug, it enenda helep hag haro deg lit nele sahalduk enap.

⁸Ketia re An den hat oho hunggul owag helep hag haroap hobahaminmu, it hag hil bolog aruhun.

⁹Hat An den helep ug helep omamne deg hag mel no intan wirik keng deg mel hag-apdoho hobahakuk anggere it wene sahalduk enap ai fahet hakol enebuk fug” isi.

¹⁰Ombolim Allah ele eke nim uruk kwit, “Ap homi waratuk on su yei, An den di ale su ale ale hat hobam hweag-hutuk kahi on etma fik-fu debelug wenggelduk kamin.

¹¹Hebere it hat hunggul unuk on hele waroho hwik enepswama wereg on ai enekit lakin. Lalug de An TUHAN Mun Leho welahi on en it fahet uruk kahi ale etma iren holduk kamuhup ane enerim deg lamuhup ane ai deg kweleg hweag-esa lakin” isi.

¹²Ai isimen de Allah Aheime en an leho nobahasimu, ele nambol fil en kululuk durukmu hol haukmen uruk kwit, “TUHAN boholma on ombagbag wereg on mot-deg welamag!” uruk katsi.

¹³Hol hauk men de onoluk wereg on etmano enahwerabul eke en eke fam bal haukmu aplohok deheg, ne eyog birim omano biririm duruk on de o meik aplohok hag deheg, durukmu holdihik

¹⁴TUHAN omamne an alondoho nobam aik wahasimu At Aheime en an leho nobaharuk kwit, og-naplug laukmu re nenda ahanhan deheg, nenda hesileheg, dirihik.

¹⁵Mu lawihikdeg, o hele wareg laswareg o wiroho weregma, o Tel-Abib Ik Kebar aegma etma kwik lawihikdeg nukoho sabit en hunduko etma welatihik; an den nesanggo holeheg, nil heheg, dirihik on omano fahet de norohole anggin sog mondoroho etma wereg latihik.

¹⁶Nukoho sabiren mun atsimu, TUHAN ele an nobam uruk kwit,

¹⁷“Ap homi waratuk on su yei, hat de an den ap unggul unuk Israel on fahat enesug laruhun ulug unduhuk hobahaki. Ebetuk kamag ulug An den hweag-hirihi on su hweag-esakin.

¹⁸An den wene ap kwasikdoho duruk on eke fahet uruk kwit de, at wararuhu uruk, famen haren at ai obabut aham duruk fam ahap wendat amag ulug hweag-utuk elegman ap ai asiag nim wararuhu halug de at ai hat siag en waratsi ulug hat hobam hekip heahuk.

¹⁹Famen hat en ap kwasik duruk on ai fam airoho din ulug hweag-uruhun famen, at en fu debelug asiag embeseruk ale erim deg lit ap siag duruk on wereg lit wararuhu halug de hat hahap ho aruhu.

²⁰Ap eke fano welatlug en, siag duruk ale indip durukmu, An den namelmel on at olohotman fohukmen haren at hweag-utuk elegman wararuhu. Ne at ebe re asiag ambiangman wararuhu, ne aren fano ale duruk on etma an den ebet hahuk fug. Famen de at ebe wararuhu on ai fahet de hat hobam dopno heahuk.

²¹Ap fano duruk on ai siag dukno ulug hat en ebet utukmu, at en haren komo duruk ale higit doho duruk karuhu halugde An den unggum og-uruhuk fug mu, hat oho hahab ho aruhu.”

²²An nebe fene etma TUHAN wereg ma duruk ale napsimu durukmen, ele eke nobam uruk kwit, “Inatlug ik fanggongma etma lakin. Etman An nele hat ninim matul” isi.

²³Ai isimu an lawihikdeg ik fanggongma etma lawihikdeg etman an nil hauk men de seleg helag felag angge TUHAN wereg ale duruk katsi. An atam Ik Kebar ikman hawihik ale etano duruk katsi. Airoho duruk katsimu hawihikdeg an daloroho kwenangma ying atihik,

²⁴famen Allah Aheime nendama kuruk kwit hambuk-ap nobahasimu, TUHAN ele an nobam uruk kwit, “Sombandoho lamihindeg olma bok atlug welamin.

²⁵Ap homi waratuk on su yei, Hat An den sabu fam het hobahakukmu wilibik laheg ap hinim eke sebereheg duhun fug.

²⁶An den hat hambilik anggen anggin debehukmu, ap unggul unuk wene sahalduk on su fam wene diroho suroho ulug hweag-esahun fug.

²⁷Fobik An den hat ninim eke nele marikoholit halug de, nika angge hambilik anggen seap hobahakuk mu hat en ap homi fam An den ukwag ulug hweag-hutuk ale omano hweag-esauk karuhun. An TUHAN Mun Leho welahi on en it enobam nele hweag-esauk ale etma uruk karuhun. Airoho urukmu it on foman de holduk kamuhup famen fomare holduk kamuhup fug. Aire it demdoho enunggul unuk wene sahalni degma duruk kamuhup ai” isi.