Read Ninia Yali YEHEZKIEL 30 Bible Online

YEHEZKIEL 30 - Ninia Yali bible

YEHEZKIEL 30

¹TUHAN eke nim ele uruk kwit, diroho isi,

²“Ap homi waratuk on su yei, haren fobik aruhu ale fahet owan deg kweleg fobik airoho aruhu o ulug it ap enunggul unuk Mesir on fam An TUHAN Mun Leho welahi on en uruk kahi ale ai hweag-esakin. Hum-nggairoho oba yatuk kwit diroho uruk kamag: Yehe! nukoho TUHAN en on mundoho horog aik waha! At en fol-folo dikohoreg. Nukoho aire mum kuruwag deng deg on, di ap su ap unggul unuk omano unggum wauk lire ai aruhu.

⁴Anggin humon Sudan fam fohu, Mesir fam weim yapuk kamuhup. Ap wareg belapuk kwit, o kwenang abirangge fam huhul kuruk kwit moluluk malalakdoho besehup.

⁵Weim ai yapuk kwit ap sehen seneg enap let enebukwag ulug og-enebuhupmen humdoho waramuhup on de: Sudan enap, Lidia enap, Libia enap, Arab enap, Kub enap, nim ai en An nunggul unuk on oho waramuhup” isi.

⁶TUHAN Mun Leho wereg on en uruk kwit, “Migdol utara fil en Aswan selatan fil, Mesir nim seberoho duruk on de weim ai fam waramuhup. Tentara Mesir on winik wonog uruk on etma mun luluhun lalahan doho del-fol deg laruhu. Ulug An TUHAN Mun Leho welahi on en ihi.

⁷Kwenang ai fam de it kwenang amu amu on enesahalimu en de mun ap homi elegma birimdoho deg on welaruhu, ne kota aren on etma re o meiyaleg neg kabog laharuk karuhu.

⁸An den lahe Mesir harep fisatuk kwit at inim seberoho duruk kwe etma abirangge enowaruhuk mu re, iren An TUHAN anyo eneluk amuhup.

⁹Nukoho ai lahe aik waharuk halug ne, Mesir mundoho luluhun aruhumu re An den fobik ap yonggo angge mon-enebik waruhuk on kapal fam lalug ap Sudan enap enenda meneni fouk eleg angge wereg on etma youk wilip enebukwag ulug mon-enebuhukmu it enekol en duruk kamuhup. Demdoho nukoho aire aik waruhu!” isi.

¹⁰TUHAN Mun Leho wereg on en uruk kwit, “An den Raja Nebukadnezar Babel on ai ayonggo fohukmu aren de Mesir on en enenggik wereg angge omano luluhun dik waruhu.

¹¹Nebukadnezar nim aren on tentara nim etma ap homi enelaheg boruk ale enapeleg enap wamuhupdeg, kwenang Mesir lilibug dik wamuhup. It en Mesir bin enowaruhupmu ap wareg kwenang ai fam ahum buag uhu.

¹²An den Ik Nil oho firitog debehuk deg Mesir abirangge ap enolok on og-esahuk deg, ap bohon en kwenang abirangge ai elehap deboukwag ulug mingming enebuhuk. Ulug An TUHAN en mundoho nele ihi” isi.

¹³TUHAN Mun Leho wereg on ele uruk kwit, “An den o Memfis fam etma dewa mel kembu luluhun esahuk. O Mesir fam etma raja eke welaruhu fug. Ap homi etma on de An den enakol-ap kwelap enebuhuk.

¹⁴O Mesir abirangge selatan fil mundoho ap eleg doho birim debehuk, ne kota Soan utara fil An den harep fisaruhuk. O Tebe kota indip aire An den unggum og-esahuk,

¹⁵ne at fam enggik wereg on etmano mundoho elehap debehuk. An den nolok anyo Pelusium kota Mesir en along baloho fak lehet wirig on weregma etma An nolok ahe fotog hahuk.

¹⁶Ne kota ai anggin humon hahup. Demdoho An den Mesir harep fisaruhuk. Kota fak lehet wirig on mundoho lilibug duhukmu Tebe etma mundoho wambuhumu, kota ai ik fu[66] en hohouk dulug lahu.

¹⁷Sauwe kota Heliopolis on mel Bubastis wereg on mel de weim ai fam mundoho enowatuk kwit, homi mundoho huhul og-enebuhup.

¹⁸Eta liem An den Mesir along wereg lit melal-enepukmu leho wereg on anyo ne at omamne deg ale fahet awonog atuk on anyo mel oko wahuk, o Tahpanhes de mun mum aruhumu homi etma on de huhul og-enebuhup.

¹⁹Airoho An den Mesir unggum og-esahukmu, iren An TUHAN ulug eneluk amuhup” isi.

²⁰Tanggal tujuh fam bigalem misig on fam tahun de nesanggo on fam, nit hele waroho hwik nenepswama wereg li etma TUHAN ele an nobam uruk kwit,

²¹“Ap homi waratuk on su yei, An den raja Mesir on enggik mundoho sombo deberihik mu re, it eke at enggik het debeheg, ite fano amag ulug bereleheg, ne karog enggikmu senerikoho enggik omamne aheg, duhup fug.

²²An TUHAN Mun Leho welahi on en nele uruk kahi: An sure raja Mesir on aselei on wereg lahi mu, An den enggik birenet eke omamne wereg on et ne fulog deg on anyo et fulog duhuk. Mu karog ai at enggik men wambuhu.

²³An den ap homi Mesir on o kwenangma abirangge fene etma del-fol esahukmu.

²⁴Airoho debehukdeg An den fobik raja Babel on enggik omamne debelug An den nenggarog at enggikmu fohuk. Famen raja Mesir on enggik de An den fulog debehukmu at aselei on raja Babel ai olohotman nenek-nenek wararuhu.

²⁵Demdoho, raja Mesir on de An den omamne elehap debehuk, ne raja Babel on de An den omamne-ap debehuk. An den at fam nenggarog og-uruhuk liem, aren Mesir fil bil hahumu, ai fam iren An TUHAN welahi ale anyo enoluk amuhup.

²⁶An den ap ap Mesir onde di obam su obam del fol esahuk. An TUHAN ai it eneluk omag.” Isi.