Read Ninia Yali YEHEZKIEL 31 Bible Online

YEHEZKIEL 31 - Ninia Yali bible

YEHEZKIEL 31

¹Tanggal satu bulan tiga tahun sebelas on fam, nit hele wareg hwik nenepswama wereg li, TUHAN ele an hweag-nutuk kwit,

²“Ap homi waratuk on su yei, An den wene diroho airoho ulug uruk kahi ale su raja Mesir nim ap homi abirangge nim fam hweag-esakin: Demdoho hum along on welahen! Hat hinim higitdoho duruk on eke wereg fug!

³Hate e lak o Libanon on leherim on hag deg lahen, enggik humdoho dowaloho fano wereg hag. Owag de bekit yaron wiliboho lahabeg yat deg alere anggulog huli etlema deg.

⁴At ahaik humdegma re ebe fanoroho wilipuk, ik kwenang apma on en nauk on og-utuk, omanggen abit angge fene ilit dik lauk. Ne e amu on omano oho owerik lauk.

⁵Ahaik de bok am fug angge hundig laukmu, ebe sipukdoho wilipuk kwit enggik hum kag on yat baruwa on wilipuk E humdoho anggen kwe wereg on en de, at mun yat on busandoho laharuk on wereg.

⁶Ai en de di suwe su suwe e ai enggik selema ena wutuk, olomene maro on an deng elma enomalik endetuk Di ap su ap enunggul unuk humon o kwenangma abirangge re at apma sakoma huraik kulug wereg.

⁷E ai fu haukmu mun fanoreg, obahare bekit dema, enggik yat deg. Omanggen de apma erahamu fug-fugdoho belabeg ik kwenang apma wereg on fam kwelabeg.

⁸ E lak Eden Allah eyabuk yahoma on en de at nim ilit ha fug ale deg. E lak at nim higit ha on de eke wereg fug, e airoho yat on enggik doaleg on wereg fug. Allah eyabuk yahoma en de demdoho e mun fano deg eta higit on eke wereg fug.

⁹An den at mundoho buhunap dirihik, enggik yatdoho debeheg, enggela heik debeheg dirihik. E abit Eden Allah eyabukmu wereg on omano en at fahet enolok duruk.

¹⁰Ai fahet de An TUHAN Mun Leho welahi on en, e onggombi anggulog fam dip deg ahan ai fam aruhu ale hweag-hutuk kahai. Eke ai eke nim yat atuk kwit eke nim winik wonog uruk.

¹¹Ai fam de An den at nerim ulug domako embesehukdeg ap bog on along wereg on, ap ai en de at olok en duruk ale eta higitdoho deboukwag ulug og-uruhuk.

¹²Tentara yatma on enelaheg doho feseruk fug on en at muhuk fohupdeg embesehup. Enggik liag heg wambisi on de kwenang ai fam dom abirangge fene mel fanggong abirangge fene mel wambuhu. Di ap su ap enunggul unuk at apma wereg lamuhup on omano re at embeselug enengge lahup.

¹³Di suwe su suwe re watlug e muko yinggig on anyo fam huratuk kamuhup, ne olomene maro on en de e enggik omano fene sobit esauk kamuhup.

¹⁴Abirale ai aruhu alere ketia su indip atuk huli en e ai hag yat doho laharuk on eke wereg laruhu fug. At hag doho e indipmu ik humdoho nauk karuhu famen e onggombi anggulog fene eke dip ik lahaku fug. Abirangge re ap homi waratuk on hag doho waratuk kamuhup, ne ap it mundoho kwenangma ap waratukmu wambusa on omano nim dug atuk kamuhup.”

¹⁵TUHAN Mun Leho wereg on elere diroho isi, “E ai kwenangma ap waratuk on weregma wambuhu salim de, fong waroho ulug eneg aleroho re An den ik kwenang apma wereg on omano yenggele fohuk. An den ik eleruk wirig atuk on mel bok-ap debeheg, ik doron wirig atuk on omano lare feheg, duhuk. E ai mundoho waratsimu re An den o mum dom Libanon fene mondorik waheg, di ahan su ahan anggenma wereg on bug-ap debeheg, duhuk.

¹⁶E ai An den kwenangma ap waratlug laukmu etma muko belabuhuk mu aplohouk dung uhu on en de ap ununggul unuk amu on enowag elek duhup. E abirangge o Eden wereg on mel e o Libanon fam en memereg ma ik humdoho fululuk falalak durukmu nauk on mel, mundoho kwenang apma wambusa on mel en de e ai wamburuk ale fahet enahayeg humon duhup.

¹⁷It en de at hondoholug de kwenangma ap waratlug laukmu etma lahup deg, it atam doho wambuswa on omano nim kabog duhup. Ne atam e ai indip fam hwerieg latswa on etmano di obam su obam enunggul unuk[67] enesahali kwe saha uhup.

¹⁸E aire raja Mesir on mel it enunggul unuk Mesir on mel fahet wal-heheg. E o Eden fam etma e mun ebe on yit-yaron eke wereg fug. Famen de ketia e o Eden fam etma deg hag, e ai ohore ap homi waratlug laukmu kwenang apma erahamu wambuhureg, it foma Allah enapeleg on mel, weim fam en waratswa on mel nim seberoho kabog duhup. Ulug An TUHAN Mun Leho welahi on en nele ihi” isi.