Read Ninia Yali YEHEZKIEL 32 Bible Online

YEHEZKIEL 32 - Ninia Yali bible

YEHEZKIEL 32

¹Tanggal satu bulan dua belas tahun dua belas nit hele wareg hwik nenepswama wereg latuhuk on ai fam,

²TUHAN ele an nobam diroho isi, “Ap homi waratuk on su yei, haren ap raja Mesir on ai fam hele omamne roho wenggelukwag ulug hweag-imin. An den wene at obahet uruk kahi on su hweag-umuk, ‘Hat de no singa ket sauwe on hag it enunggul unuk amu on enesahali kwe etma duruk kahen, famen hat de ayowa abut hagdoho ik ahummu wang deg hag deg lahen. Hat heiyog en de ik abit omano kul-ap debeheg, alalangge kwelabeheg, duruk kahen.

³Di ap su ap enunggul unuk domog etma kabog duhup li An den hat sum ahe yohwatuk sum fam yohware hobahakuk deg it ap enunggul unuk ai en lit haplug elanma wilibi hobahaik wamag ulug embesehuk.

⁴Hat An den kwenangma bou hobahakukmu suwe, bak oluk-oluk angge humdoho o kwenang suma abirangge wereg on omano en senggel habuhup deg nauk kamuhup.

⁵Ai en dom-dom mel, fanggong kwe mel etma hat hebe wareg filik en neg hopo debehuk.

⁶Hamep de dom fene hopo uhureg ik de hamep il on neg lauk karuhu.

⁷ Hat An den elehap hobaharuk li etma, bohol An den hululip debeheg, sohwalanggen mum debeheg, mo sombandoho anggulog apma kwelabe feheg, bigalem ombagbag duk fug angge debeheg duhuk.

⁸Demdoho seleg boholma wereg on An den nahuluhuk, kwenang An den kuruwag deng debehuk. Ulug An TUHAN Mun Leho welahi on en mundoho nele ihi.

⁹Wene hat elehap habuhuk on ai fahet An den o kwenang hat enepeleg kwe saha rebehukmu, ap homi enunggul unuk humdoho enowag elek duhup.

¹⁰Demdoho, An nenggarog hat hibil bil haukwit hat sebeloho hobahakukmu, it raja nim, ap homi enunggul unuk humdoho omano nim, en An den hat fam duruk ale dim heahup. Ai salim it enakol en enowag elek deheg, waratuk ale enakol en ilik deheg, duhup’ eheik ulug hweag-umuk” isi.

¹¹TUHAN Mun Leho wereg on en raja Mesir on hweag-utuk kwit, “Ap raja Babel on enggarog hat hibil bil hahu.

¹²Ap sehen seneg enap enunggul unuk amu-amu on enolok enap omano fam An den henenggarog lisoho fang diek ulug hweag-esahukmu, hat homaliki mundoho enowaruhup. Aire ap homi haren on mel, di angge su angge fam haren hambono hauk kahen angge mel mun lilibug lalabag debehup.

¹³Howam dihinig yihinig on mundoho omano An den it ik nauk on ayegma etma en eleg-ap debesehuk. Mu ap homi en oho wam en oho ik ai ikma eneyog en eke il wirik-ap dik lahup fug.

¹⁴Airoho duhup fugmu re o kwenang haren on fam etman, ik lauk on etma An den il wirik-ap debeheg, il bik-bokdoho wirig atuk kamag ulug debeheg, duhuk. Ulug An TUHAN Mun Leho welahi on en nele mundoho ihi.

¹⁵An den Mesir lei mearebehuk salim, abirangge etma wereg angge mundoho elehap debehuk mu, it en An TUHAN ulug eneluk amuhup.

¹⁶Ebetuk kamag ulug mun omamneroho ihi on su re hunu suni wilipuk kamuhup. Homi di enunggul unuk su enunggul unuk amu on en suni ai Mesir nim ap homi etma wereg on nim enobahet fong waroho hunu suni uruk kamuhup. Ulug An TUHAN Mun Leho welahi on en nele mundoho ihi” isi.

¹⁷Tanggal lima belas bulan satu [68] tahun dua belas on fam, nit hwik nenebik lauswama wereg li em etma, TUHAN ele eke an hweag-nutuk kwit,

¹⁸“Ap homi waratuk on su yei, ap homi Mesir on enobahet fong warenebin. It aire kwenangma ap homi waratlug laukmu etma ap homi kwenang amu on mun enomamne on nim seberoho mon-enebiyuk.

¹⁹Hat en it hweag-esauk kwit, ‘Hit en boruk kwit hit mun buhun bahan deg lahe boruk kahep? Hit de kwenangma ap homi waratlug laukmu wambuhup, ne hit henebe re ap homi Allah enepeleg on yinggigmu erahamu enesahalimu yinggig lamuhup,’ ulug hweag-esakin.

²⁰Unggul unuk Mesir on de ap homi weim fam warenebuhup on nim seberoho waramuhup. Karog misig eke it mundoho enowaruhu en wep debesireg wereg.

²¹Ap leherim ambongse on mel ap sehen anggendoho dog Mesir inibil yapuk enap en de, it Mesir on ap homi waratlug laukmu etmano waharukmu enahayeg doho og-enepuk kamuhup. Iren enanggiluk duruk kwit de diroho uruk kamuhup, ‘Ap homi Allah enapeleg on de weim fam en mundoho warahesa. Ketia re it suma yinggig welamukoho waharuk etma!’ uruk kamuhup.

²²Asyur bul eta yinggigmu, autsi sehen seneg enap omano en walinggoho kwelabe folug wereg lamuhup. It enebe abirangge re weim fam warenepswa on omano. It enebe salegma etmare, ap homi waratlug laukmu ilonggoma erahamu saleg. It eneluk wereg liem de ap homi enekol-ap kwelapuk katswa enap en deg.

²⁴Elam oho etma salegma autsi sehen seneg enap aren on en hwaninggoho kwelabeg lit wereg. It enehap enenggalimu on baleg elegman weim fam en enowatswa ma, kwenangma ap homi waratlug laukmu etmano wambuswa. It eneluk wereg lit ap homi enekol-ap kwelapuk katswa enap famen ketia it mundoho waratswareg, ap weim yapukmen waratswa on nim it duruk katswa ale fahet enenggali hahup.

²⁶Mesekh nim, Tubal nim, oho etma wereg, ma it enebe ap sehen seneg enap iren on en maseroho kwelap enesug. It enahap enenggalimu on baleg elegman weim yapuk kwit enowatswama waratswa. It eneluk wereg lit, ap homi enakol-ap kwelapuk katswa enap en deg.

²⁷It sal-enepswa alere it ap leherim atam on enasehen fing-fang ap homi waratlug laukmu wamburuk liem along doho o endam[69] sal-enepswa on hag along wereg doho sal-enepswa fug. Ap enowesi leherim etma re enenggarog ununggul apmane leko, ne enandog bei angge[70] re enemig emberimmuroho sal-enepswa. It enebe enoluk wereg liem de ap enowesi leherim enambong sisereg enap etma re ap homi mundoho enakol-ap kwelapuk katswa enap en deg.

²⁸Ai hagdoho ap homi Mesir on sal-enepuk kwit ap homi Allah enapeleg on weim fam en waratswa enap omano enanggelegma yinggi fesehup.

²⁹Edom on etma iren on raja abirangge mel, enalong wereg enap mel etma wereg. Atam de it ap sehen seneg enap mun enomamne enap welatswa, famen ketiare it ap fomane waratswa on Allah enapeleg on etmano nim ap homi waratlug laukmu etmano yinggig lit wereg.

³⁰Etma melal-enepuk on utara fil on oho etma weregma, ai en ap homi Sidon on oho etma wereg. Atam it enomamne fam ap homi enakol-ap kwelabeg ale duruk katswa, famen ketia it enenggali atswareg enahap enenggalimu on baleg eleg angge ap homi waratlug wamburukmu etmano ap weim fam en waratswa on nim wereg.

³¹At raja Mesir on nim, autsi tentara aren on nim kwenangma ap waratlug laukmu wambik lahupdeg, inil esaukmen de ap weim fam warenepswa on omano weregma enahayeg hahup. Ulug An TUHAN Mun Leho welahi on en nele mundoho ihi.

³²An den duhuk fam raja Mesir on en de ap homi eneluk wereg on enakol-ap kwelap enepuk karuhu, famen at nim tentara aren on nim enowaruhupmu re it enebe ap homi mundoho Allah enapeleg on mel it fomane weim fam en waramuhup on mel seberoho yinggig lamuhup. Ulug An TUHAN Mun Leho welahi on en nele mundoho ihi” isi.