Read Ninia Yali YEHEZKIEL 33 Bible Online

YEHEZKIEL 33 - Ninia Yali bible

YEHEZKIEL 33

¹TUHAN an nobam eke nim ele hweag-nutuk kwit diroho isi,

²“Ap homi waratuk on su yei, haren it hat hunggul unuk on etma fam hweag-esakin, An den o kwenang misig eke fam weim mondorik waruhuk salim ai su on atuk karuhu. Ap homi etma wereg on en ap misig eke kahal enesug on unduhuk fohup.

³Ap kahal enesug on ai en selei enap waharukmu il isilauk kwit, ap homi enggatdoho welamag ulug, ap anyo en youk wereg ulug eneg ale eke aplohok debehu.

⁴Mu re ap eke en youk wereg ulug eneg ale duhu on ai holdil lauk kwit en famen ape moroho wereg halug selei enap kwik waharuk kwit waruhup mu at wararuhu ai onggwareg siag elekwe. Ne aren lahe ele eneg ale uruk on ai hole folug ohwale fahat delepmande ahap wendat alep.

⁶Famen de ap kahaleg on ai en selei on waharuk mu isilauk kwit en ele eneg aleroho on anyo furuhu fugmu, wongdoho weregman, selei enap kwik watlug ap homi etma enowaruhup halug ai ap kahaleg on ai siag elekwe enowaruhup. Mu, at obam anggin aruhu. An den at fam oho onggo heng uhuk.

⁷Ap homi waratuk on su, hate enunggul unuk Israel on fahet kahal enesug on ulug An den unduhuk hobaharihik. Anggere, ebetuk kamag ulug su hweag-esakin:

⁸An den hweag-esauk kwit ap kwasik duruk on fobik wararuhu uruk famen, haren at abut aham dilauk kwit ahap wendat amag ulug hweag-utuk eleg ma, at wararuhu halug, at asiag elekwe wararuhu. Famen de at wararuhu on ai fahet de An den hat fam onggo hweag-huruhuk.

⁹Haren lahe ap kwasik duruk on ai ebet uruhun men, at en kwasik duruk ale embeselug bok atuk eleg ma re, at de ap siag duruk on doho wararuhu, famen hat neg de hahap ho aruhun.”

¹⁰TUHAN ele an nobam hweag-nutuk kwit, “Ap homi waratuk on su yei, it ap Israel on fam wene iren uruk ale su up sahaloho hweag-esakin, ‘Nit nenonggwareg siag elekwe, siag mel, kwasikdoho mel, duruk kahe fam nenowaruhumu, nit keroho neneluk welamuhuk behep?’ ulug uruk.

¹¹An TUHAN Mun Leho wereg lit, Allah noluk mundoho welahi on nunuk fam it hweag-esakin, Ande ap kwasik duruk on waramuhup aire nerim boruk kahi; ite ahamdoho re at ebe oluk welamag ulug asiag duruk on etma embesehu fano. Yaho hit henunggul unuk Israel on yei, kwasikdoho duruk kahep on etma mundoho embeseyek! Nunggwelug hit de waratuk ale fahet henenda deg lahep?

¹²Ap homi waratuk on su u, haren ap homi Israel on hweag-esakin, ap fano on eke en siag duruk halug de, aren atam fano duruk katsi on ai en let duk fug alereg. Ne ap kwasik duruk on en asiag embeseruk halug, at unggum og-umuhup fug. Ne ap fano duruk on en siag duhu halug ahap wendaruhup fug.

¹³Eke diroho am alereg, An den ap fano duruk on etma enahap wendat enebuhuk ulug sali irihik, famen at siag duruk ale indip disireg, atam at fano duruk katsi on anyo fam nahap wendat-nabuhu ulug wenggel hahu ale aire nong-hong doho. An den de at atam fano disi ale etmano eberuhuk fug, ne at de asiag duruk on ai onggo wararuhu.

¹⁴Ekere An den ap siag duruk on wararuhu ulug mundoho ebet-esawihik. Famen ap anyo siag duruk on embeselug ahamdoho fano ale deheg, bekitdoho deheg, duruk ale indip duruk halug, eke wal-heheg de ap enangge wahu angge omano sombandoho og-eseheg, ite herahasi on omano enonggwareg og-eseheg, ai en wene melaleg oluk welaruhu wene higitdoho deheg, duruk halug de at fobik wararuhu fug.

¹⁶An den at asiag endam duruk katsi on etmano eberuhuk fug, at en fano ale mel, demdoho on mel duruk karuhu ai fam oluk welaruhu.

¹⁷Famen de it enunggul unuk ai en uruk kwit de, An den duruk kahi ale etmare, bekit doho duruk fug uruk! Famen it enonggwareg neg de bekit doho duruk fug lit en uruk.

¹⁸Eke nim An den omamneroho uruk kahi, ap fano duruk katlug en fobik siag duruk ale indip dulug duruk on de ai fam waramuhup.

¹⁹Ap siag duruk on en siag duruk ale bale folug ahamdoho fano ale deheg, demdoho on deheg, duruk halug de at airoho duruk on ai fam ebe oluk welaruhu.

²⁰Airoho deg kweleg famen, it enunggul unuk Israel on en An den duruk kahi ale fahet de bekit doho duruk fug uruk. Dik demdoho An den it biling enebuhuk ai hundomog it duruk aleroho enebuhuk” isi.

²¹ Tanggal lima bulan sepuluh tahun dua belas on fam nit hwik nenebik lauswama wereg liem, ap misig Yerusalem en oluk lil atsi on, an nakit wahasireg kota anyore mundoho wambeheik ulug hweag-nirik wahasi.

²²Hubanggo at owan hweag-nirik waharuk eleg kweleg, TUHAN omamne an nobam napukmu hawihik. Men de, ap ai wahasireg an nobam ele matuk kweleg, an nele hobu lareg latihik fug nele uruk katihik.

²³TUHAN ele an nobam uruk kwit,

²⁴“Ap homi waratuk on su yei, it ap o kota Israel fam meyal heg wambisi kwe wereg enap etman enele diroho uruk, ‘Abraham amu wereg liem de kwenang su akni deg latsi, famen ketia nit de nenebe nenunggul unuk domog humdoho welahe ma, kwenang aure nit nenangge uruk’ etma re” isi.

²⁵Ai fahet de TUHAN Mun Leho wereg on en wene diroho airoho ulug hweag-esoag ulug an mingming napuk kwit, “Hit de ino mep et angge nauk kahep; hit de kembu mot-duruk kwit ap enowatuk kahep. Airoho duruk kwit en henembong si se angge kwenang su nit nenanggwenang uruk kahep ai ambi.

²⁶Hit de henenggarog fang doho lauk kahep on fam henenda hembisig lahep, ne hiren duruk kahep ale etma re mun heimaldo ale duruk kahep. Hit henebe abirangge en babi duruk kahep. Airoho duruk kwit en henembog si se angge kwenang su nit nenanggwenang uruk kahep ai ambi.

²⁷An TUHAN Mun Leho wereg lit Allah noluk welahi on nunuk fam anggere, ap homi o kota meyaleg wambisi kwe wereg on etma re ap en enowaruhupmu waramuhup. Ne it lei kwe wereg on de olomene olok on en nahup. Ne it dom aeg kwe mel, owik elekwe mel heraho lamuhup on de ouk amben siag on hil-hil waramuhup.

²⁸O kwenang aire An den fobik leimu ap homi mundoho birimdoho elegma doho debesehuk, ne iren enomamne fam leho fahat dauk on anyo ahae fotog-ap debehuk. Israel fam en dom-dom etma mun birimdoho besehuk mu, ap misig ulug oho eke akol eleg lag-wag uruk kamuhup fug.

²⁹An den enunggul unuk ai on enesiag en dil ale fam o kwenang ai lei birimdoho deberuk ale ai fahet unggum og-esaukmu re, iren An TUHAN welahi ale anyo enoluk amuhup” isi.

³⁰TUHAN ele eke uruk kwit, “Ap homi waratuk on su yei, hat de it hat hunggul unuk on o fak lehet horog kwe mel ite o sokole kwe mel kabog dulug, it eke en eke fam uruk kwit, ‘Yaho nit yoho su TUHAN en de wene nunggwe ale fahet eke imisi e’ ulug uruk on etmano en habug dindil-dandal hapuk on welahen.

³¹It anyo mun hohouk doho watlug hopo-hopo kabog duruk kwit, it An nomaliki hag doho watlug, hweriako hat en hele hweag-esauk on omano holduk. Famen de haren diroho suroho diyek ulug mingming enepuk on etmano re it holoho duruk fug. It enembilik fam en de enenda hundig duruk ale uruk famen de it enendaman de enonggwareg ambiangma hwelauk ale fahet neg ebetuk kwiren duruk.

³²Hat fahet de it en at sure suni suleng felalni eheg ne ele mun buhun-bahan deg on eheg, ne no kecapi kong duruk ale enggat deg on eheg, duruk. Aire demdoho iren hat hele enesanggo holduk famen de holoho duruk fug.

³³Abirangge haren hweag-esauk karuhun ale etma mundoho higit aruhu, ne li aru salim ai waruhumu it fureberuk kwit ap nabi eke nenenggeleg ma wereg lit uruk katsi ale anyo ai bohup” isi.