Read Ninia Yali YEHEZKIEL 34 Bible Online

YEHEZKIEL 34 - Ninia Yali bible

YEHEZKIEL 34

¹TUHAN en an nobam uruk kwit,

²“Ap homi waratuk on su, haren ap raja Israel fahet wereg on bet-eneplug de An TUHAN Mun Leho welahi on en it fam uruk kahi ale su hweag-esakin, ‘Hit gembala Israel on enobahet welahep on etma re alemat atuk kamek. Hiren de domba enobahet wenggel-enebuk fug angge henonggwareg en on fahet neg wenggelduk kahep.

³Ahoe re hiren nenggeg, ne oruk de henesum wit-deheg, ne domba asei wereg on de hiren waroho nenggeg, duruk kahep. Hiren de henen domba etma hwale feseruk kahep fug.

⁴Domba omamne eleg on hiren hwale feseruk kahep fug, ouk on de obat og-utuk kahep fug, yebil angge wereg on hiren het deberuk kahep fug, ne enenda nong-hong deg on mel longgoreg on mel hiren hera-eneplug og-eneplug waharuk kahep fug. Airoho duruk fug kwiren de hiren henan domba etma henobabut hape fam debeseruk kahep.

⁵ Domba etma enang gembala elegma atlug de del-fol ulug de olomene en senggelduk angge on atuk.

⁶Ai fam de An nan domba omano duk yaron fene mel, dom fene mel, dag watuk. It de o kwenangma mundoho fene del-fol degma re ap misig en oho fu debeseheg, ite hera enebeheg, duruk fug.

⁷Anggere hit gembala suma, TUHAN Mun Leho wereg on en hit henobam uruk ale su holiek:

⁸An Allah mundoho noluk welahi on nunuk fam anggere, fu debeyek! An nan domba re ap en hwal-enepuk fugmu re olomene en senggeloho nauk. Hit An nang gembala en de An nan domba omano fu debeseruk kahep fug. Hiren de domba enobahet wenggelduk kahep fug, we hit henonggwareg fahet neg wenggel dauk kahep.

⁹Anggere ap gembala suma henesanggo holiek,

¹⁰An TUHAN Mun Leho welahi on en hit henobam uruk kahi anggere, An su re hit henaselei on. An nan domba etma hit fam en nikangge hwelahukmu re, hiren hwal-enepuk kamek ulug henobam domohe fohuk fug; ne hit de henonggwareg fahet on neg wenggel dauk kamag ulug An den hweag-hesahuk fug. An nan domba etma hit fam en enahap wendaruhukmu re hiren nauk angge on aruhu fug’ eheik ulug hweag-esakin” isi.

¹¹TUHAN Mun Leho wereg on en uruk kwit, “An nonggwareg en neg domba etma hera-enebuhukdeg hwal-enepuk karuhuk,

¹²An den de ap gembala en an domba hera-enebik lalug, deg-bog deg on omano misigmu kabog debeik watlug hwal-enepuk hagdoho duhuk. It de enebe nukoho heik on mel, nukoho siag on mel eta fam en di kwe su kwe dag waregma etman og-eneplug waruhuk.

¹³It enebe re ap di enunggul unuk su enunggul unuk sahalimu en mel o kwenang it enapeleg on fam etman mel An den wilibi feseik waruhukdeg, An den misigmu kabog debeselug it enanggwenang on fam nikangge feseik waruhuk. It de An den ap homi Israel on enandom kwe mel, fanggong kwe mel hwal-enepuk wereg lit An den it enebe enggelangge mun ebema hondoko feseruk karuhuk.

¹⁴Dik-demdoho An den it enobam enggelangge mun hesilig on ap homi Israel on enanggwenang fam en dom kwe mel fanggong kwe mel etma fouk deberuk karuhuk. Airoho deberukmu etman de iren kel wat-deheg, enakol eleg angge enggelangge nenggeg, duruk kamuhup.

¹⁵An nebe en nan domba etma hwal-enepuk on aruhukdeg, it enobahet kel wat-daukmu fouk debesehuk; ulug An TUHAN Mun Leho welahi on en nele mundoho ihi.

¹⁶Longgo usa on hera enebeheg, nong-hong usareg wereg on hweako feseik waheg, yebil wereg on An den het-enebeheg, ouk on de obat og-eseheg, duhuk; famen asei wereg on mel, omamne wereg on mel de An hwal-enepuk on wereg lit mun fano ale neg duruk kahimu re eleg-apdoho fohuk.

¹⁷Yaho hit An nan domba en holiek! An TUHAN Mun Leho welahi on en hit henobam nele uruk kwit de An den hit ayo wiroho henemu-henemu biling henebuhukdeg fano on nim siag on nim amu-amu feheg, domba nim kambing inim amu-amu feheg, duhuk.

¹⁸Hit henesahalimu en de eke enggelangge ebe on neg eleg-ap duruk ale etma fahet enerim duhup, famen enggelangge iren nauk eleg on omano eneyog en sobit-esauk kamuhup! Iren de ik il wirik on nauk kwit de, ik it nauk fug on omano kul deberuk kamuhup!

¹⁹Airoho durukmu An nan domba foma amu on en de enggelangge eke it amu on en sobit esahup on mel, ik il kulap debehup on mel nauk kamuhup.

²⁰Ai fam de, An TUHAN Mun Leho Welahi on en hit domba seireg lahep on fam uruk kahi ai, Ande domba omamne on nim omamne eleg on nim ayo wiroho minggirikoho waruhuk.

²¹Hiren de domba ouk asu on omano domag eseheg, henandimuk en dal-eseheg, duruk kahepma re it omano domba uluk lohwalegma omano en wilip aik lauk.

²²Famen de An nan domba etma hape fam debeseruk kam no ulug An namu en del-enebuhuk. An den domba enebe misig-misig ayo wit-enebuhukdeg fano on nim siag on nim minggiroho fohuk.

²³ An den de ap raja misig eke, An namingming angge Daud hag on unduhuk fohukmu, we at neg it enobahet gembala wereg lit it hwal-enepuk karuhu.

²⁴ An TUHAN de enakni Allah aruhukmu raja namingming angge Daud hag on aire it sen-enusug wereg on aruhu. Ulug An TUHAN en nele mundoho ihi.

²⁵An den it nim sali watuk kwit, it enebe enenda hambukdoho welamag ulug abug hweag-esahuk. An den de olomene senggelduk on etma o kwenang abirangge fam en mundoho muko wilibi fesehuk, mu re An nan domba re enenda hambukdoho lei kwe welaheg, ohwei kwe nohokeg, duruk kamuhup.

²⁶An den de it enebe fanoap debesehukdeg, An nanduk amu eneg on[71] anyo maseroho etma welamag ulug hweag-esahuk. Iren lahe osit enenda halug An den og-esauk karuhuk.

²⁷E wilibig on anggen yihikeg, di angge su angge yabukmu yaho angge anggen yihikeg, durukmu ap homi mundoho re it enanggwenang enonggwareg en on fam enenda hambukdoho. Bosiemanggen An nomaliki het-enusug on ai An den kong debeseheg, ne ap enamingming angge-ap eneplug weregma etman fiselaroho wilibi feseik waheg, duhukmu re, An nebe TUHAN welahi ale anyo it enoluk aruhu.

²⁸It de ap enunggul unuk An enapeleg on en herag-enebeheg, ite olomene olok on en senggel enebeheg, duhup fug. It de enenda seroho weregma re ap misig en ulug eke enakol-ap kwelabuhu fug.

²⁹An den de it eneyabukmu mundoho hesili fohukmu re o kwenang ai fam siburu obok eke welaruhu fug. It de ap enunggul unuk amu on en enalitno enepuk kamuhup fug.

³⁰Ai fam de ap homi mundoho en enoluk atuk kwit, ap homi Israel on aire An nomaliki degma, An den enalong baloho fahat-enusug ale anyo enoluk aruhu. Ulug An TUHAN Mun Leho welahi on en nele mundoho ihi.

³¹Demdoho, hit de An nan domba An den hit nauk angge og-hesauk kahi on. Hit de An nomaliki ne An de hit henakni Allah. An TUHAN Mun Leho welahi on en nele mundoho ihi” isi.