Read Ninia Yali YEHEZKIEL 35 Bible Online

YEHEZKIEL 35 - Ninia Yali bible

YEHEZKIEL 35

¹ TUHAN ele an nobam hweag-nutuk kwit,

²“Ap homi waratuk on su yei, o Edom kwenang fam on ai hururung enepuk kamin.

³An TUHAN Mun Leho welahi on en it fahet uruk kahi ale etma it ap homi etma wereg on fam hweag-esauk kamin. ‘Ap homi Edom dom fam welahep on suma, An sure hit heneselei on welahi! Olun hit welahepma etma An den mun olun doho ap wereg fugdoho lei birim debehuk, ne hit henobam kota etma o meyaleg wambisi on debesehuk. Ai fam de hit en An TUHAN ulug heneluk amuhup.

⁵O endamet angge hiren Israel on henaselei deg lit, enesiag onggo unggum anggin on ahae fotog doho og-esauk li, hit en hinil folug welatuhup.

⁶Ai fahet de An TUHAN Mun Leho wereg lit Allah noluk mundoho welahi on nunuk fam anggere, waratuk on aire hit henambiangma aik lauk kamuhup angge, degma re hit eke waratuk on ai famen lil amuhup fug. Hit de ap watuk katuhup ai fam de kwasik doho duruk katuhupmu[72] hit oho henowarukoho mug-henesauk kamuhup.

⁷Hit henobam kota o Edom dom kwe etma ap furoho elehap debesehuk deg, ap kwe etma fene lag-wag uruk on de An den enowaruhuk neg.

⁸Dom-dom etma hit henebe wareg en sale fohuk, duk-duk mel fanggong-fanggong mel etma ap weim fam wareg en neg hoporebehuk.

⁹Hit henanggwenang fene etma re An den lei meareg welamag ulug debesehuk, ne hit henobam kota fene oho re ap homi wereg lamuhup fug. Ai fam de An TUHAN welahi ale anyo hit heneluk aruhu.

¹⁰Hit henele uruk kwit, Yehuda mel, Israel mel, ne it enanggwenang hundomog mel de, akni ahun nit uruk kahep, ne An TUHAN Allah nebe re it enakni wereg lahi famen de hit henengge aruhu ai.

¹¹Ai fahet de An TUHAN Mun Leho wereg lit Allah noluk mundoho welahi on nunuk fam anggere, hiren An nomaliki henelitno enebeheg, henerim enebeheg, bet-enebeheg, duruk kahepma nahummu het welahi on anyo onggo henobam fohuk. Hit en it fam debeseruk katuhup ale fahet An den onggo hit og-hesaukmu it eneluk amuhup.

¹²Ai fam de hit en An TUHAN anyo en hit henele siag on urukmu etma An holduk katihik ale henoluk amuhup, hit henele uruk kwit: Dom-dom Israel fam omano mundoho ap birim atsi, nit nenenggik mu en enowatuk angge on atsi, ulug uruk katuhup.

¹³Yaho hit henunggul unuk Edom on suma, hit de henembilik ele humon deg lit henele matuk kwit An nobam henawonog atuk kahep on etma An abit angge holduk katihik.

¹⁴An TUHAN Mun Leho welahi on nele uruk kwit: An den kwenang hiren on abirangge fene etma lei birimdoho deberuk li ap homi o kwenangma abirangge en enehayeg hahup,

¹⁵aire hit en oho Israel An nangge on lei birim atuk liem henahayeg hauhup etano hag hahup. Dom o Seir fene etma nim ne Edom kwenang abirangge fene nim, ap mun furoho eleg amuhup. Ai fam de ap homi abirangge en An TUHAN ulug eneluk amuhup’ eheik ulug hweag-esakin” isi.