Read Ninia Yali YEHEZKIEL 36 Bible Online

YEHEZKIEL 36 - Ninia Yali bible

YEHEZKIEL 36

¹TUHAN ele an hweag-nutuk kwit, “Ap homi waratuk on su yei, haren dom-dom o Israel fam de TUHAN Mun Leho Wereg on wene leho on unduhuk foruk kahi on su holukwag ulug hweag-esakin,

²‘It Israel on eneselei on omano en enelitno enepuk kwit de diroho uruk, ‘Ketia re duk-duk endam on omano re nit nenangge aha’ uruk.

³Famen de An TUHAN Mun Leho welahi on en hat hobam uruk kahi ale su unduhuk fein: It di ap su ap enunggul unuk hit maseroho wereg on en henalong elehap debelug dom-dom etmano del-deheg, Israel on bulip enebeheg, duruk katswa.

⁴Ai fam de yaho hit dom mel duk-duk mel Israel on en suma, ik doron mel, fanggong mel, o olun atsi kwe mel, ne kota ap homi en embeselug wilipswama, ne ap en henangge deleheg, duswama suma yei, An den nele uruk kahi ale suma holiek.

⁵An nolok leiareg lit An den it enunggul unuk hit maseroho wereg on etma enowaruhuk ulug nele irihik, ne ebe yugdoho re it Edom on ai fahet irihik. Ai indip de it enahayeg doho enalitno duruk kwit An nanggwenang anyo hweleheg ne lei enggelangge wereg on del deheg, dusama.

⁶Ai fahet de Israel kwenang fam hweag-esauk kwit, An den nolok dom nim, duk nim, ik doron nim, fanggong nim, fam foruk kwit uruk kahi on ai hweag-esakin. Aire it enunggul unuk amu on en enalitno beheg, sebeleg beheg, dusama.

⁷An TUHAN Mun Leho Welahi on en hombuk balduk kahi ai it unggul unuk ai on hit maseroho wereg on etma oho enalitno enepuk kamuhup.

⁸Famen de, An den hit dom-dom Israel on fam uruk kahi, hit henahan omano nikangge asimit humdoho wilibuhureg An nomaliki Israel on enobam fol-folo sombandoho wamuhup on enobahet anggen yihiku.

⁹Hit Israel on yei, An de hit hinibil atlug welahi, An den de hit demdoho henanggwenang omano yabuk wiri folug a nikangge yaruhup.

¹⁰An den de nomaliki Israel on enebe eke nim mangnoroho hum-ap duhuk. It enobam kota kwe omano wereg lit, o olun atsi kwe omano obalma wutuk kamuhup.

¹¹Ap homi mel henowam mel An den eke nim dopnoroho hum-ap hesahuk mu, atam de maben hag famen de mun alongdoho saha uhup, ne iren de enomaliki mel enombawi mel humdoho enag enebuhup. It enebe re o etma atam welatswa hagdoho weregma An den sigdoho mun hauk kahep fug aleroho henobahakuk. Ai fam de iren de An TUHAN welahi ale anyo enoluk amuhup.

¹²An nomaliki Israel on de An den nikangge sombandoho og-eneplug kwenang it en on fam welamag ulug feseik waruhuk. Kwenang ai it enonggwareg enengge aruhureg anggen humdoho og-esauk karuhukmu, enomaliki eke siburu obok en ulug waramuhup fug.

¹³An TUHAN Mun Leho welahi on nele uruk kahi: Dik demdoho kwenang su fahet ap en uruk kwit de it enunggul unuk etma wereg on fam ap nenggeg, ap homi enomalik deleheg, duruk on ulug uruk on.

¹⁴Famen de ketian de kwenang su en ap homi nahu fug, ne it enomaliki oho del-enebuhup fug. Ulug An TUHAN Mun Leho welahi on en nele mundoho ihi.

¹⁵Eke nim kwenang au en, it enunggul unuk angge omano en bulip enepukmu holeheg, enalitno enepukmu heheg duhup fug. Kwenang su fam en ap homi kwenang au fam wereg on enowaruhup fug. Ulug An TUHAN Mun Leho welahi on en nele mundoho ihi’ eheik ulug hweag-esakin” isi.

¹⁶TUHAN ele an nobam ele uruk kwit,

¹⁷“Ap homi waratuk on su yei, Ap homi Israel on it enenggwenang fam wereg on en iren siag ale duruk fam emeroho fahat daukmu. An den boruk kwit, iren duruk ale etma re saliyog angge ale duruk boruk kahi, ai homi enemep lauk on[73] hag deg.

¹⁸An nolok it enobam hilili ferihik ai it siag duruk katswa ale etma ap humdoho wareheg, kwenang ai fam en kembu mot-duruk kwit emere feheg, duruk katswama.

¹⁹An den it unggum og-esawihik ale aire it enebe wereg ale nim enobabut duruk ale nim muko og-esawihik deg it enebe kwenang ai fam en di kwenang su kwenang fene del-fol esawihik.

²⁰Ekema ekema lauk kwit iren hundig An nunuk amu eneg wereg on anyo siahap debeil neg lauk katswa. Ai fam ap homi en de diroho uruk katswa, ‘It enunggul unuk su re Allah omaliki wereg uruk famen de, it enanggwenang Allah en og-esasimu anyo embeseswareg duruk’ uruk.

²¹An nenda ouk hauk kahi aire, An nunuk mun amu eneg on anyo ap Israel on di kwe su kwe lauk kwit siahap debeswa ale ai fahet.

²²Ai fahet de, An TUHAN Mun Leho welahi on en fobik Israel fam debesehuk ale ulug uruk kahi on etma hweag-esakin, ‘Yaho hit Israel henap, An den fobik duhuk ale etma re indip hiren duruk ale fam de fug, ite An nunuk mun amu eneg on anyo hit di kwe su kwe lauk kwit mundoho siaho feil neg lauk kahep ai fam.

²³An den Nunuk mun amu eneg on aire along humon wereg on, nunuk hiren di ap su ap enunggul unuk wereg on sahali kwe en siaho foruhup on anyo unug hesahuk, mu re iren An TUHAN welahi ale anyo enoluk amuhup. Ulug An TUHAN Mun Leho welahi on en nele mundoho ihi. An namu eneg welahi ne An den TUHAN Mun Namu Eneg on welahi ale anyo di ap su ap enunggul unuk mundoho fam ename feikoho re hit fene en duhuk.

²⁴It di ap su ap enunggul unuk humdoho wereg kwe en nim, di kwenang su kwenang humdoho fene en nim, en hit An den kabog henobahalug sombandoho henonggwareg henanggwenang fam mon-henebik waruhuk.

²⁵Ai mundoho debehuk deg hit henebe henangkembu fam en nim ne di ale su ale en hit emere henobahasi on fam en nim An den ik il wirik on fam ho-henebuhuk.

²⁶ Airoho henebuhuk deg de An den henenda keron mel wenggelduk keron mel og-hesahuk. Henenda helep omamne hag deg lahep on omano An den ahamdoho henenda henesugun fano on og-hesahuk.

²⁷An naheime henendama hilili henobahakuk deg, hit An nawene melaleg higitdoho duruk kwit An nawene diroho airoho diuk ulug hweag-hesawihik on omano holoho neg duruk kamag ulug An den hit hwal henepuk kwit welaruhuk.

²⁸Mu re hit henenggwenang An den henombasi og-esawihikmu anyo welamuhup. Hit An nomaliki on amuhup, ne An oho hit henakni Allah aruhuk.

²⁹Hit di siag su siag en emeroho henobaharuk on ai fam en An den wundet-ap henobahakuk. An den nele gandum fam mingming duruk kwit ebe fano hesiloho wilibukwag ulug hweag-utukmu, atlug de hit henesiburu obok en henebuk fug angge welamuhup.

³⁰An den henahan anggen yihiruk on mel, heneyabuk yahoman anggen yihiruk on mel etma hesilig-ap debehukmu, hit siburu obok laharuk em it di ap su ap enunggul unuk enesahali kwe omano en henunuk siag uruk ale on eke hauk kamuhup fug.

³¹Hiren de atam henebut kwasik deg fam duruk katuhup on mel hiren duk fug ale on duruk katuhup on mel fahet ebet halug de, henasiag mun heimaldo on etma hit henebe en duruk katuhup ale fahet ebet hauk me henape henepuk karuhu.

³²Hit Israel on yei ebet hauk kamek, abirale etma An den duhuk aire hit fahet de duhuk fug. Hit de henebut en anggere henenggali heheg, ap en enelitno henepukmu sebel aheg, duruk kamuhup. Ulug An TUHAN Mun Leho welahi on en nele mundoho ihi’ eheik ulug hweag-esakin” isi.

³³TUHAN Mun Leho wereg on en ele uruk kwit, “Hit henesiag omano famen An den mundoho ho-henebuhuk deg, An den hit henobam kota fam welaheg, o meyaleg kabog laharuk on etmano wireheg, dukwag ulug hweag-hesahuk.

³⁴Atam de ap homi hit heneyabuk kwe lauk kwit, henenggwenang lek huratsi ale omano hauk katswa, famen de An den hit en kwenang ai fam yabuk wuruk ale-ap henobahakuk.

³⁵Ai durukmu ap homi abirangge en yande duruk kamuhup. Aire kwenang ai atam lek hwerieg latsi famen fobik fano-ap duhukmu, Eden hag aruhu, ne kota atam de ap eleg doho birim deg lit mun luluhun doho meyal mayal deg latsi, famen ketia re kota omamne on wirigmu ap homi oho re hoporoho wereg on atsi ai fam.

³⁶Ai duhukmu it ap enunggul unuk amu on henaluluk kwe wereg on omano en de An TUHAN en neg kota meyal heg wambisi on omano nikangge wireheg, ne eneyabuk kwenang iringgig kwe omano nikangge wireheg, disi ulug eneluk amuhup. An TUHAN en neg nele mundoho ihimu re, dik-demdoho duhuk lit deg” isi.

³⁷TUHAN Mun Leho Wereg on en uruk kwit, “Henunggul unuk Israel on yei, hit de An den hit let-nabukwag ulug heng-napuk kamek ulug hweag-hesahuk; An den hit henebe seberoho domba humdoho kabog deg hag kabog henebuhuk.

³⁸Ketia o kota olun degma ap elegdoho birim deg on oma fobik o Yerusalem atam nukoho log salim fahet ebetuk kwit kabog dulug, domba waroho yalduk on waroho forukmu hopo uruk katsi hag deg laruhu. Mu re hiren An TUHAN welahi ale anyo heneluk amuhup” isi.