Read Ninia Yali YEHEZKIEL 37 Bible Online

YEHEZKIEL 37 - Ninia Yali bible

YEHEZKIEL 37

¹An nebe fam haukmen de TUHAN en omamne-ap napuk kwit, At Aheime en og-naplug fanggong owag neg kololog degma omano wambik lawihik.

²Wambik lawihikmen TUHAN an hondog naplug fanggong ai maseroho lauhuk. Lauk kwit an den nil hawihikmu re fanggong ai fam de ap owag siling mun iringgig angge humdoho kololog degma hawihik.

³Airoho hawihikmen, TUHAN en an hein og-neauk kwit, “Ap homi waratuk on su yei, ap owag omare nikangge oluk am alereg boruk kahen a?” isi. Ai isimu an den onggo hweag-utuk kwit, “TUHAN Mun Leho welahen on, we Hat neg de holuk deg lahen” irihik.

⁴Ai irihikmu, TUHAN en de ap owag iringgig angge omano fam wene hweag-esoag ulug mingming napuk kwit,

⁵“An TUHAN Mun Leho welahi on en hit nikangge heneluk amuhup en nambilik ahe furoho hit fam kwelabe henobahakuk.

⁶An den hit fam henomanggen mel, hinino mel fohuk deg, henahab dopno henobahakuk. Hit henoluk leberukwag ulug nele ahe og-hesahuk. Mu re hit en An TUHAN anyo heneluk amuhup” eheik ulug hweag-esakin isi.

⁷Ai isimu, an Yehezkiel en nele it ap owag omano fam de TUHAN en diroho hweag-esakin ulug mingming napsi ale omano hweag-esawihik. An nele airoho matuk kweleg eta hol haukmen ap owag omano eke fam en eke fam hundutuk kwit, enele matuk katswa.

⁸Airoho durukmu an nil kumuregman, owag etmano omanggen hundureheg, ino dopno deheg, ahap hulilip deheg, disi famen, sat neg de welatsi fug.

⁹Allah ele an nobam uruk kwit, “Ap homi waratuk on su yei, hol fam hele marin.[74] Haren hele uruk kwit de An TUHAN Mun Leho welahi on anyo en at fam de foma foma abirangge etman hol firik watlug, ap wareg oma fam sat kwelabe feik wahailauk em it eneluk amagdoho eheik” in ulug hweag-nitsi.

¹⁰ Airoho hweag-nitsimu an den At TUHAN en melal-napsi ale etano higitdoho dirihikmu, hol oho firoho ap wareg omano fam kwil lasimu, ebe ai eneluk ail lauk kwit inail laswa. It enebe seberoho re humdoho degma ap tentara esan humon lohwaluk aleroho deg latswa.

¹¹Allah ele an nobam uruk kwit, “Ap homi waratuk on su yei, ap owag etma ebere it enunggul unuk Israel on fahet ilit doho deg. It en de nit iringgig lahe, nenenda ebereg wereg fug, fobik eke welamuhuk fug ulug enele uruk wauk kwit wereg.

¹²Ai degma anggere nomaliki Israel on enebahet fobik aruhu ale eneluk-ap doho hweag esakin, An TUHAN Mun Leho welahi on en kwenang it salegma omano ele husi fohuk. Airebelug it enebe etman An den feyaloho wilibi fesehuk deg kwenang it Israel enengge on fam welamuhup en feseik waruhuk.

¹³An den airoho etma mundoho debehukmu re An nomaliki en An TUHAN anyo eneluk amuhup.

¹⁴It eneluk welamag ulug An nele ahe enembilik mu furoho kwelabe fesehuk deg, it enebe enanggwenang fam welamuhup en ulug debesehuk. Mu iren de An TUHAN anyo eneluk amuhup. Ulug An TUHAN en nele mundoho ihi anggere demdoho aruhu lit deg” ulug isi.

¹⁵TUHAN ele an hweag-nutuk kwit,

¹⁶“Ap homi waratuk on su yei, domuk misig eke wamihin deg de, ele diroho emberimmu bale fein, ‘Kerajaan Yehuda’ ulug bale folug, domuk amu on eke walug de ele diroho emberimmu bale fein: ‘Kerajaan Israel’ ulug bale feyuk.

¹⁷Airoho debelug domuk birenet seneg lit onggombi kwe etma birenet misigmu ahundip duruk on debeyuk, ai en de biren anyo ebe misig sebe aruhu.

¹⁸Airoho debehunmu it hat hunggul unuk on etman hein og-heauk kwit su ebe keroho fahet,

¹⁹ulug hein og-hapuk halug de, it fam uruk kwit de, At TUHAN Mun Leho wereg on anyo en domuk Israel on fahet ilit angge on ai wahureg, domuk Yehuda on fahet ilit angge on ai nim seberebehu ale fahet. Ne domuk etare An den misig-ap debelug de An nenggikmu seneg lit welaruhuk ale fahet isi ulug hweag-esakiuk.

²⁰Domuk biren eta seneg lit it enunggul unuk ai fam unug esakiyuk.

²¹Ai en it fam uruk kwit, An TUHAN Mun Leho welahi on en de it An nunggul unuk etma abirangge o di kwenang su kwenang fam it lauswareg weregma etman og-enebuhuk. An den andog doho og-eneplug de nikangge sombandoho it enanggwenang fam feseik waruhuk.

²²It ai kwenang ai fam it Israel on enendom fam etman it enunggul unuk misig on debesehuk. It de ap raja misig on en melal-enepuk karuhu. It nikangge minggiroho enunggul unuk biren aheg, ite kerajaan biren aheg, duhup fug.

²³It siag duruk fam enonggwareg emeroho fahat dahup fug, ne kembu heimaldo on mot-duruk ale omano duruk kamuhup fug.

²⁴ It de ap raja misig on Raja Daud hag on apma sebe debesehukmu li mundoho-mundoho etma melal-enepuk karuhu. Iren de dipdoho neg An nawene melaleg omano holoho duruk kamuhup. Ne li mundoho-mundoho fahet it nim iren ondohoma on nim de kwenang An den Yakub og-itihikmu it enambu enombasi welatfagma etma welamuhup.

²⁶An den de it ninim wene sali eke it enebe enenda seroho neg mundoho-mundoho welamuhup ale fahet waruhuk. An den it enebe fanoap debeseheg, it enebe eke nim log-ap debeseheg, duhuk. It enanggwenang fam etma re An den nobam etma mundoho-mundoho welaruhu on fahet wuruhuk.

²⁷ Ande it ininim weregma re it An nomaliki amuhup ne An de it enakni Allah aruhuk.

²⁸An nobam ai lahe li mundoho-mundoho fahet it enesahalimu etma weregma re, it di ap su ap enunggul unuk amu on en de, it Israel on An TUHAN nonggwareg nomaliki amag ulug momal-enepihik ale anyo enoluk amuhup” isi.