Read Ninia Yali YEHEZKIEL 38 Bible Online

YEHEZKIEL 38 - Ninia Yali bible

YEHEZKIEL 38

¹TUHAN ele an nobam uruk kwit,

² “Ap homi waratuk on su yei, Gog raja leho on o Mesekh mel, Tubal mel o Magog kwenang fam on ai hururung din.

³At fam hweag-utuk kwit, Ande TUHAN Mun Leho welahi on anyore at aselei on welahi.

⁴An den at fobik kwani debehuk deg, ambiang mulmulmu bosie omanggen ililoho lisulug, autsi esan lohwaleg angge nim lit eneplug wilibuhuk. Ap esan aren on lohwaleg kuda walug lauk on de enesum misig ale higit on neg wandeg. Ne it ap sehen seneg enap etma re enebe hundomog dog bei angge mel karog mel walug lauk.

⁵Raja anyo re it Persia on mel Sudan on mel Libia on mel en sehen seneg on etmano nim uluk-uluk lauk kwit, it enebe domog en de karog mel, topi helep baja on mel walug lauk kamuhup.

⁶Ap enebiroho duruk on o Gomer on mel, Bet-Togarma utara fil on mel de at nim seberoho waharukmu, enunggul unuk amu on humdoho oho at mutlug waharuk kamuhup.

⁷At fik-foukdoho welamag ulug hweag-utlug, at autsi tentara at nim sebe ulug lauk on omano re eneg ale duruk on hole folug duhup en de fouk deg welamag ulug mingming enebin.

⁸Tahun nunggwe en fam hagdoho An den at fam melale foruk kwit, o kwenang eke ap homi di ap su ap enunggul unuk sahali kwe en nikangge kabog debeselug o kwenang ai fam bik-bok doho weregman bin kwin ulug hweag-uruhuk. Gog de it Israel on enandom o endam en angge ap elegdoho birim degma, o meyaleg neg kabog laharukmu famen, ketia re ap homi enenda sereg on weregma etma sebele folug welaruhu.

⁹At nim tentara aren on nim, it enunggul unuk humdoho at enenda on nim de sielu firuruk hag waharuk kwit enowarik waheg, ne anggulog en hagdoho kwenang ai fam abirangge salik waheg, duhup” ulug hweag-nitsi.

¹⁰TUHAN Mun Leho wereg on anyo en Gog fam hweag-utuk kwit, “Nukoho ai salim hat en wene siag on melaloho fohun.

¹¹Hat en de o kwenang fag lehet wirig eleg on, ap homi oho enenda seroho enakol eleg angge wereg obam, ai en eke kota fak lehet wirig elegma, enenda hambuk angge mel wereg fug obam ai luluhun duhuk ulug wene kong dirihin.

¹²Hat en de ap homi o kota endam o meyaleg en deg latsi obam ai wereg on enesumenggan huhul angge hwelauk kwit del deheg duhuk ulug welahen. Ap homi re o di ap su ap enunggul unuk on en kabog doho feseswama, ketia re enowam endetuk on mel it enangge mel, humdoho fahat dalug lit, it enebe re o kwenangman de enda anggen bulmu anyo wereg on enangge.

¹³Ap homi Syeba on Dedan on ap enangge onggo weheg onggo baleheg duruk on en o Spanyol on mel en hein og-heauk kwit diroho uruk kamuhup, ‘Hat de nunggwelug no emas, perak mel, wam endetuk on mel di angge su angge amu on mel huhul weheg, deloho hweleheg, dulug abirangge etma hohouk dalug laroho haren on tentara lit enepuk kahen?’ Ulug hein og-heauk kamuhup” isi.

¹⁴Ai fahet de TUHAN Mun Leho wereg on en wene su at Gog hweag-omag ulug mon-nabik waha, “An nomaliki Israel on enekol eleg angge lioloho wereg liem etano, hat waruhun deg huhul kwik waruhun.

¹⁵Hat hobam utara fil mun yatma etman wilip aruhun deg waharukmu,[75] ap tentara esan lohwaleg hum angge mun along enap hombolim mug haplug laukmu, it enebe re enunggul unuk amu-amu on en kuda fam hweria atlug waharuk kamuhup.

¹⁶Airoho watlug haren An nomaliki Israel on de hol sielu en lang fang esauk hag enowarik waruhun. Nukoho higit aruhu salim An den hat mon habuhukmu lahundeg An nanggwenangma etma hwerieg laruhun. An den hat Gog fene en durukmu re, it di ap su ap enunggul unuk en de An aire sa, An de Allah Mun Amu eneg wereg on ulug eneluk amuhup.

¹⁷Hat hobahet An den Namingming angge nabi Israel on fene en nele matihik fug no a? Iren sali uruk kwit Ande ap misig eke fam en Israel on huk enebik lowag ulug mingming duhu usa. Ulug An TUHAN Mun Leho welahi on en nele mundoho ihi” isi.

¹⁸TUHAN Mun Leho wereg on ele uruk kwit, “Airoho duhu famen de Gog en Israel on enowarik kuhureg duruk kweleg eta fol-folo An nolok hang doho duruk karuhuk.

¹⁹Nolok humon en bet duruk kwit, nukoho ai salim o Israel kwenang fam meik humon lag fang esauk karuhuk.

²⁰Ikan abirangge mel, suwe munangge manangge, humon doron, inim, ap kwenang fam wereg on nim, An neauk kwit enekol en enowag elek duhup. Dom-dom sombo heg wamburuk karuhu, bule il alduk deg kwe etma mesag huhouk heg wamburuk karuhu ne fak lehet abiranggere meyal heg wambuhu.

²¹Ai en An den Gog de di ale su ale anggin ale[76] duhuk on ai fam akolap kwelabe fohuk. An TUHAN Mun Leho welahi on en nele mundoho ihi. At autsi re it enenggarog fam wat-wat atuk kamuhup.

²²At An den unggum og-utuk kwit de, ouk amben siag on mel, amep wilibuk on mel, osit fo osit mel osit lumbiag mel, osit helep anggen on nim, An den at nim tentara aren on nim, it enunggul unuk humdoho at nim sebereg on nim fam hilili fesehuk.

²³Abut ai on duruk fam An den it ap di ap su ap enunggul unuk abirangge fam de An de leho on namu eneg on welahi ulug unug esahuk. Ai fam de iren An TUHAN welahi ale anyo eneluk amuhup.”