Read Ninia Yali YEHEZKIEL 39 Bible Online

YEHEZKIEL 39 - Ninia Yali bible

YEHEZKIEL 39

¹TUHAN Mun Leho wereg on ele uruk kwit, “Ap homi waratuk on su yei, Gog raja along on o Mesekh mel, Tubal mel, kwenang fam enebug balin, ne at fam hweag-utuk kwit An sure hat haselei on ulug hweag-imin.

²An den at fobik kwani debesehuk deg o yatma utara fil etman walug wilibuhuk deg dom Israel on fam walug waruhuk.

³Etman An den asehen del esahukmu re enggik hware fil en deloho wamburuk karuhu, ne andog anggere enggik bekit fil en An den deloho belabe fesehuk.

⁴Dom Israel on enendom emberimmu etman Gog mel, autsi tentara abirangge nim, it at nim sebereg on nim mundoho wambuhup, mu enebe wareg de An den di suwe su suwe mel, olomene olok on mel fam noag ulug og-esahuk.

⁵Ap sehen seneg enap etma re daloroho yabuk fene wambuhup deg waramuhup. Ulug An TUHAN Mun Leho welahi on en nele mundoho ihi.

⁶An den o Magog kwenang fam mel, ik elan-elan kwe etma mel, ap homi enenda hambuk doho hwereg kwe etma harep fisaruhuk. Ai fam it en An TUHAN eneluk amuhup.

⁷Famen de ap homi Israel on enesahalimu, An nunuk mun namu eneg welahi ale anyo unuhuk fohuk. Nunuk aire eke nim emeroho siaho fohup fug. Ai fam di ap su ap enunggul unuk domog omano en An TUHAN Allah mun namu eneg on aire Israel on ulug eneluk amuhup.”

⁸TUHAN Mun Leho wereg on en ele uruk kwit, “Demdoho, nukoho An den abug ihi on ai waruhu.

⁹Ap homi o kota Israel on en fam wereg on etma re bum lin esahup on, aire dog bei angge mel, karog mel, sehen oag mel, dog angge mel, e bayuk obag enepuk angge mel, kabog dul en ulug uluk-uluk wilipuk kamuhup. Abirangge etma re e olmahan yalduk on fahet wahupdeg de tahun sabiren fam yalduk kamuhup.

¹⁰Mu re iren e yalduk on fahet anggolo en ulug yabuk kwe wirik laheg, ohwei kwe murik laheg, duruk kamuhup fug. Aire bum lin esahup angge etma deg eleg ale degma e yalduk on fahet higit deg laruhu. Iren de ap homi it enengge del deheg, huhul hweleheg, dusa on etmano enengge deleheg, huhul weheg, duhup. Ulug An TUHAN Mun Leho welahi on en nele mundoho ihi” isi.

¹¹TUHAN ele uruk kwit “Abirale eta aruhu liem de, An den Gog fam ebe saluhupmu kwenang Israel fam etma og-uruhuk. Kwenang og-uruhukmu re fanggong dahaloho foma nindig atukmu Laut Mati en foma mo lahaik waharuk fil wereg on etma. Etma re Gog nim omaliki tentara nim abirangge sal-enebuhup. Ne fanggong ai unuk de ‘Gog autsi nim esan lohwaleg fanggongma’[77] uruk kamuhup.

¹²Bigalem sabit en anunuroho ai ap Israel on kwenang etma emet aruhu hayog ulug asing singdoho enebe wareg omano andog heg sal-enepuk kamuhup.

¹³Ap homi o kwenang etma fam wereg lamuhup on abirangge en ap wareg sal-enepukmu ai let doho sal-enepuk kamuhup; Airoho duhup ai fam de nukoho An nalong aruhuk salim ai An den onggo og-esahuk. An TUHAN Mun Leho welahi on en nele mundoho ihi.

¹⁴Bigalem sabit en ai mundoho debehupdeg, ap foma wenako fouk debesehupdeg, ap wareg kwenang kwe bibou uruk on etma hera enebil lauk kamuhup deg, ap wareg ebe wereg halug o kwenang ai fam emereg on omano horoho ulug iren kwenangma sal-enebuhup.

¹⁵Kobokwe etma lauk kwit ap owag kololog deg angge inil halug de, it ap wareg[78] sal-enepuk on etmano en inil halug fanggong Gog autsi nim esan lohwaleg fanggongma omano sal-enebukwag ulug eneg angge feil lauk kamuhup.

¹⁶Iren airoho duruk kamuhup fam de kwenang ai emereg on anyo mun ho aruhu. (Ai en fobik fanggong ai fam kota eke unuk Gog esan inim higit on sowaleg laruhu)” isi.

¹⁷ TUHAN Mun Leho wereg on en ele an nobam uruk kwit, “Hat ap homi waratuk on su yei, suwe abirangge mel mene olok on amu on mel it di kwe su kwe en wamuhupdeg it enobahet An den waroho fouk deberihik angge etma nauk kamuhup en wol-enebin. An den soni it fahet duk Israel fene etma fouk debesehukmu, etman iren ino nenggeg enahaik de mep nenggeg duruk kamuhup.

¹⁸Iren de ap enowesi leherim on wareg omano nenggeg, it o kwenangma sebeleg wereg on enamep nenggeg, duruk kamuhup. Ap leherim etma nim it kwenangma sebeleg wereg on etma nim de no kambing yohombuk on mel, ite kambing omalik mel, ite no banteng sei on mel watuk hag enowaruhuk.

¹⁹Ap ai An den ware fesehukdeg, di suwe su suwe mel mene olok on mel og-eneplug waruhukdeg it enesei omano nauk men neg de me eneperoho nenggeg, mep omano nauk angge en siomo duk hag nenggeg duruk kamuhup.

²⁰An nahan doaleg fam de it enehum de kuda abirangge nim, it ap kuda anduhunmu lahalug lauk on nim, it weim enemururu enap nim omano homoroho nauk kamuhup. Ulug An TUHAN Mun Leho welahi on en nele mundoho ihi” isi.

²¹TUHAN ele uruk kwit, “An naseleg fu-nobahaukwag ulug ap homi enunggul unuk domog fene unuhukuk mu, it en An nomamne fam wene katuk doho balduk kahi ale etma iren neahup.

²²Ai liem etan de, ap homi Israel on en An it enakni TUHAN Allah iren on anyo eneluk amuhup.

²³Di ap su ap enunggul unuk mundoho en ap homi Israel on hwik-enebihikmu yatma laswa etma re it enesiag An nilhanim duswama ulug furebehup. An den it fotog esawihikmu, it selei on en enalong elehap debeseheg, weim fam en mundoho enowareheg duhup.

²⁴An den duhuk aire it en siag emereg ale duruk kwit enolok fam neg duruk katswama An den it fotog esawihik” isi.

²⁵TUHAN Mun Leho wereg on ele uruk kwit, “Famen de ketia Yakub ambiangma endag atswa on ap homi Israel on eta An den nenda hundig enebeheg, ne it atam welatswa hag enangge dungdoho neg welamag ulug debeseheg, duhuk. Airoho debesehuk ai fam de An den nunuk anyo leho foruk kamag ulug hwale foruk karuhuk.

²⁶It lahe enanggwenang fam femdoho lombuk doho weregma, ap misig en ulug eke wal-esauk karuhu fug. Mu re iren An enalitno roho siahap nobaharuk em enenggali-ap enepuk katswa ale omano enapeleg amuhup.

²⁷Ande it ap eneselei on enanggwenang fene omano en nikangge sombandoho og-eneplug waruhuk, ne An namu mun eneg welahi ale anyo re An den airoho duruk ai fam di ap su ap enunggul unuk abirangge etman eneluk amuhup.

²⁸Airegma it An nomaliki en de, An enakni TUHAN Allah iren on ai eneluk amuhup. Aire we An den neg hele wareg on hwik-enepihikmu re, it fobik oho An den neg it enobam somban dik waharuk kwit eke misig ulug oho etma embesehup fug.

²⁹Anden Naheime anyo enunggul unuk Israel on enenggulmu hililuhuk, eke nim nomaliki fotog esahuk fug. Ulug An TUHAN Mun Leho on en nele mundoho ihi” isi.