Read Ninia Yali YEHEZKIEL 4 Bible Online

YEHEZKIEL 4 - Ninia Yali bible

YEHEZKIEL 4

¹Allah ele uruk kwit, “Ap homi waratuk on su yei, helep kwenang dangge on fam unggut hilinggoho wirig on misig eke wamihindeg holohotma folug, emberim fam de kota Yerusalem wereg ale ilit angge balin.

²Airoho debelug de kota ai ap en huk duhup ale fahet mel, ikalog-kalog elan elan habuluhup ale mel, kwenang kabog dil lahakup ale mel, it enobam kemah saluhup ale mel, o fak lehet oho on ai maseroho etma housaloho kukoho fik-fouk duhup angge mel, ilit din.

³Waruk panci besi on eke walug, sure obahat kota ai besi on fam wirig bolug, panci besi on ai hat wereg ma dulug kota Yerusalem dulug etma feyuk. Airoho debelug de o kota ai fil halukwe deg lit haren o ai bin kurukmu hagdoho deg lamuk. Airoho duhun on aire unggul unuk Israel on fahet eneg angge ilit aruhu.

⁴Ai debelug de hat hebe re hware fil kwasikdoho yinggig lamuk, An den[7] Israel enesiag hat hobam hilili fohuk. Airoho hobahamin mu re, nukoho 390 en eta fam it enesiag ai fahet hat de yinggig lit nenek duruk karuhun. Nukoho misig hat airoho yinggig laruhun aire Israel on tahun misig fam unggum og-esahuk aleroho.

⁶Ai mundoho debelug de eke nim bekit fil hwareroho yinggig laruhun airoho yinggig lit de it Yehuda enasiag onggo unggum anyo nukoho 40 en fam hauk karuhun, nukoho misig hat airoho yinggig lit hauk karuhun on aire it fam tahun misig unggum og-esahuk aleroho.

⁷Yerusalem kukoho maserik waharuk ale ai fureg nu, henggik holum watuk ale kota ai ibil mum hakiuk. Ne an den it enobahet unggum fesehuk ulug deg lahi ale etma fahet it hweag-esakiuk.

⁸An den hat sabu het habuhukmu hat hebe endenoho mel bekit filen hware fil enden aheg, hware fil en bekit fil enden aheg, duk fug angge neg weregman de maserik wamuhup on ai ambiangma fotog aik lahu.

⁹Ketiare gandum ebe on mel jelai mel nali anggen mebon mel, nali eke polong, sekoi anggen mel, gandum anggen al on mel walug de abirangge etma misigmu hahambik debelug roti wirin. Aire hat hebe nukoho 390 en hebe hware fildoho yinggi lit nauk karuhun on.

¹⁰Roti aire, henda wenggeloho yohwan debelug nukoho hundomog de we 230 gram en neg nauk karuhun. Ne eta dahandoho nauk karuhun fug.

¹¹Ik nauk karuhun on ohore huli baleg, ma re nukoho misig fam de we waruk ik nauk on biren neg nauk karuhun.

¹²Indok de ap homi enal wirig bug atsi on etma fam nonggwale folug roti hat nauk on it ap homi inil hanim indok ai fam weraho folug nakiyuk” isi.

¹³TUHAN ele uruk kwit, “Ap Israel on o kwenang it enapelegma etma hwik enebik lahukmu nauk angge Musa wene melaleg fam ousa[8] wereg angge omano airoho nauk kamuhup” isi.

¹⁴Airoho isi famen de an den onggo hweag-utuk kwit, “Yehei TUHAN Mun leho welahen on nakni! An nebe dotman angge ketia huli en nauk angge saliog angge wam wareg angge a, mene olok on en senggel lug ayeg ando a, an nauk kahi ale eke wereg fug, nebe oho emet dauk kahi fug. Etma saliog angge on de an de nauk kahi fug” irihik.

¹⁵Airoho irihikmu Allah ele uruk kwit, “Fano ap homi enal wirig ai obalmare, sapi al fam roti werariuk” isi.

¹⁶Ai isireg At ele eke nim uruk kwit, “Ap homi waratuk on su yei, An den de fobik nauk kamuhuk on ulug o Yerusalem fam foukdeg on etma elehap debehuk mu ap homi nauk angge obok en enobam si ulug enenda fituk kwit de iren ik nauk on mel siburu nauk on mel enenda-enenda nauk kamuhup.

¹⁷It enahaik mel roti mel eleg atuk on de enenda fituk kamuhupdeg, it enesiag ambiangma re enebe waramuhup” isi.