Read Ninia Yali YEHEZKIEL 40 Bible Online

YEHEZKIEL 40 - Ninia Yali bible

YEHEZKIEL 40

¹Ai salim tanggal sepuluh fam bigalem misig, tahun dua puluh lima fam nit hwik-nenebik lausama wereg liem eta, ne Yerusalem sebel atsi huli en de tahun empat belas on wereg kweleg, an TUHAN en omamne ap napsimu, an og-naplug lasi.

² Na fam hag misig hauk men de Allah en an og-naplug kwenang Israel on fam lasireg duk yaron fam nobahaik lahasi. Mu an den nalukwe fil en kumu haukmen de o wirig balu eke wirigmu abut de kota hag deg latsi mu hawihik.

³ An etma og-naplug lasimu an hauk men de ap on eke seleg helag felag uruk angge perunggu hag angge sokole log on fil unduhuk latsi. Unduhuk lit de enggikmu sabu ilit angge linen on seneg lit e ilit hauk on nim seneg latsi.

⁴Ap ai en an nobam ele uruk kwit, “Ap homi waratuk on su yei, fi furoho holin, ne di ale su ale an den hat fam unug heamin ale etma furebeyuk. Ai fahet an den hat hondog haplug suma wahi ai. Anggere abirangge hamihin ale etma re it enunggul unuk Israel on fam hweag-esakiuk” isi.

⁵ Ai en an nil TUHAN Obam wirig elehet maseroho ohoma kumu hawihik. Men de ap ai en ilit angge e anyo yat deg ale re tiga meter en deg angge fam ilit duruk katsi. Famen de fak lehet ai emberim lahabeg deg ale re tiga meter ne aldap wilim deg ale oho re tiga meter en deg latsi.

⁶Ai en at sokole alukwe timur fil deg on fam lasi. Lasireg de at ebe yal belareg angge fene lahaik lasireg emberimmu lahalug sok elaha anyo ilit durukmen de anggwe wirilig alere tiga meter en deg latsi.

⁷Sok ai ambol fil de hug ele eke ombandu amu-amu re ambe henahan ap kahaleg weregma hilinggig latsi. Ambe baleg on eta ebe domog ilonggo ele re ambi higit deg latsi; obabut de unggut ohwan hilinggig on degma ombandu omano domog yat deg ale re tiga meter en deg latsi. Obahat ambe eke nim hwilireg on de aldip wilim deg alere ambireg latsi on etare ebe dua setengah meter en deg latsi. Hug ele ai lisoho tiga meter eke nim degma, lisoho re ambe humon o TUHAN Obam wirig fil alukwe deg on anyo fam deg latsi. Airoho degma ap anyo en de ambe humon anyo ilit disireg durukmen de anggwereg alere empat meter en, ebere sokole humon anyo ambiangma etma welatsi, ilonggo fil on de o TUHAN Obam wirig anyo nim hirik-horogdoho welatsi. Obahat o TUHAN Obam wirig on anyo fil deg on aire wilim deg alere satu meter en deg latsi.

⁸

⁹

¹⁰

¹¹Ai en ap anyo en hug ele sokolma anyo anggwereg ale ilit disi; men de enam setengah meter en deg latsi ne wilim deg alere re setengah meter en deg latsi. Ai en sok ai wirilig alere lima meter en deg latsi.

¹²Ap kahaleg wereg on alukwe fil ambe baleg etma re ilit angge re tiga kali tiga meter en, obahat eke sebeloho wirig on ai emberim de setengah meter en ne wilim deg ale ohore setengah meter en neg.

¹³Ai en ap ai en eke ambe obahat ambol fil ap kahaleg weregma anyo en de ambe eke kahaleg weregma foma fil anyo huli fahet ilit duruk katsi. Men de ebe 12,5 meter deg latsi.

¹⁴Aren nikale ambe humon ai oho ilit duruk kwit: Yat doho re sepuluh meter en. Ambe ai fahet sokole aire TUHAN [79] obam wirig men de ambe olohotma on anyo dag fil.

¹⁵Sokole dagma on fam en obahat ambe humon anyo o TUHAN obam wirig on nim alukwe deg on anyo fam deg alere 25 meter en.

¹⁶Obahat ambol fil nim ne obahat ambe fahet huli deg on mel fam de jendela doron yendeg latsi. Ne obahat ilonggo fil on alukwe hug ele fil deg on etma re, e palem ilit deg fam alili angge belabeg latsi.

¹⁷Ai en de ap anyo en an og-naplug sokole kwe anyo wilipsireg TUHAN obam wirigmen ambe dag fil on fam og-naplug lasi. TUHAN obam wirig on ai obahat maseroho aluluk kwe etma o ambe 30 en wirig latsi. O ambe etma olohotma re hwenie helep on fam doaloho

¹⁸ambe etma maseroho kwelabeg latsi. Ne ambe dagma on aire sebelegma re ambe ilonggoma on de leho latsi.

¹⁹Etma sokole amu on eke weregma yendeg alere sokole ambe ilonggoma on fam kwik lauk on anyo re sebeleg kweleg ai neg de mun leko wirig latsi. Ap anyo en de sok biren angge eke dulug eke dulug bul etano fahet ilit angge disimen de: 50 meter [80] en deg latsi.

²⁰Ai debelug ap anyo en sokole utara fil on anyo dag filen ilonggo fil kwik lauk on anyo ilit hasi.

²¹Sokole ai fam en ambe ap kahaleg wereg ombandu amu-amu fam mel, obahat hulireg on mel, ambe humon anyo mel, etma ilit angge deg alere sokole timur fil on fam deg latsi ale etano hagdoho deg latsi. Hug ele sokole eta fene hilinggig latsi etma abirangge en de, yat doho re 25 meter en anggwe wiriloho re 12,5 meter en deg latsi.

²²Ai en eke ambe hummu anyo mel, jendela etmano mel, ilit angge e palem hwesesengge oho on mel de ambe timur fil wereg on fam deg ale etanoroho deg latsi. Yal de sabiren angge re sokole anyo fam dung deg latsi, ne ambiang de o ambe humon o TUHAN Obam wirig on en ambe dag fil wereg on anyo deg latsi.

²³Sokole utara fil deg on anyo nim alukwe deg latsi ale re, sokole eke amu on ambe ilonggoma anyo fam kwik lauk weregma re, aire sokole timur fil wereg on fam deg ale etanoroho deg latsi. Ap anyo en sokole biren etano eke en eke fam deg ale fahet de 50 meter en ilit debesi.

²⁴Ai en bekit ap anyo en an og-naplug sokole selatan fil lasireg ilit hasi. Men sokole ai it sokole amu on omano hag deg latsi.

²⁵Jendela ambe etma fam fololeg on de ambe amu on fam deg ale etmano higit deg latsi. Sokole ai ele hug ele yendeg latsi alere 25 meter, ne anggwereg latsi alere 12,5 meter.

²⁶Sokole ai fam lauk on fahet de yal omalik sabit en belaroho lahabeg latsi, ne ambe baleg humon ai oho re ambe olohotma TUHAN obam wirig on anyo fil orohole deg latsi. Ne obahat ilonggo fil deg on de hug ele anyo fil degma re e palem ilit anggeroho alili angge hwesesengge oho latsi.

²⁷Etman sokole eke dag fil en ilonggo fil kwik lauk on yendeko kwelabeg latsi. Ap ai en sok biren eta eke famen eke fam wal-hasimu, 50 meter en deg latsi.

²⁸Ai en ap anyo en an og-naplug sokole selatan fil en de ambe ilonggoma on fam kwisi. Kwisireg de aren sokole selatan fil on anyo ilit hasi, men de sokole dag fil ilit hasimu deg latsi ale etano hag deg latsi.

²⁹Ambe ap kahaleg wereg mel, amben hummu mel, ne obahat ilonggoma on mel de sokole amu on fam wereg ale hag doho deg latsi. Ambe sokole au fam en ohore jendela hilinggig latsi. Hug ele sokole ai fam de yatdoho re 25 meter en ne anggweroho re 12,5 meter en.

³⁰

³¹Famen ambe humon anyo dagma huratukmu fil alukwe deg latsi. Obahat ilonggoma on en hug ele fil alukwe deg on etma oho re e palam ilit deg alili angge hwesesengge ohoma, yal omalik ligin en belaroho re sokole ai fam kwik lauk angge deg latsi.

³²Ai en ap ai en an hondog naplug sokole timur fil anyo fene kulug, bumbuk ilonggoma kwik lasi. Aren sokole anyo ilit hasimu it sokole amu on omano hag higit deg latsi.

³³Ambe ap kahaleg lit wereg kwe mel obahat ilonggoma on fene mel, ambe humon mel etma ilit doho re sokole amu on fene deg latsi hag welatsi. Ambe ai fam ni ne ambe humon fam nim de jendela wirig latsi. Hug ele ai yat deg latsi alere 25 meter en deg latsi, ne anggwe on ilit doho re 12,5 meter en deg latsi.

³⁴Kamar humon anyo alukwe re ambe dagma on fil etma deg latsi. Obahat ilonggo fil dopno deg on hug ele fil alukwe deg on etma re e palem ilit doho hwesesengge oho latsi. Yal omalik ligin en belaroho lahabeg latsi.

³⁵Ambiangma fotogdoho re ap ai en an og-naplug sokole utara fil lasireg ilit angge ilit duruk men sokole amu on omano nim higit deg latsi.

³⁶Ai en eke ambe ap kahaleg wereg kwe mel, obahat ilonggoma wereg on mel, ambe humon mel etma re sokole amu on omano higitdeg latsi. Ambe etma fene mel ne ambe humon fam mel de jendela wirig latsi. Ne hug ele ai yatdoho re 25 meter en ne anggweroho re 12,5 meter en deg latsi.

³⁷Ambe olohotma[81] on de alukwe dag fil hwaleg latsi. Obahat ilonggoma on hug ele anyo fil alukwereg on etma re, alili angge e palem ilit deg fam hwesesengge oho latsi. Yal omalik ligin en belaroho lahabeg latsi.

³⁸Dag fil ambe etma misig eke fam de sokole misig eke utara fil on anyo dopno angge wirig welatsi. Ambe dopno angge ai famen sokole eke yendeko ambe humon anyo fam kwelabeg latsi. Etman de wam waroho foruk on ulug omano horoho forukmu ulug welatsi.

³⁹Ambe hummu ai e ohwan doaleg latsi, ne biren de ombandu deg ale domog wereg latsi. E doaleg eta emberimmu re domba, kambing mel TUHAN endama ahayeg hoag ulug waroho yalduk on mel, TUHAN en enesiag apelehapdoho foukwag ulug heng uruk kwit yalduk on mel, ap enengge obalma foruk on fahet yalduk on mel, senggeloho welatsi.

⁴⁰Ambe humon ai dag fil etma e doaleg ohwan eke welatsi. Weregma biren de ombandu utara fil etma welatsi.

⁴¹Abirangge seberoho re e doaleg ligin en angge wam waroho senggeldukmu fahet welatsi on etare: Ohwan de o ilonggoma fahet ne ohwan foma re ambe dagma on fahet welatsi.

⁴²E doaleg ohwan eke ambe dopnoroho wirig on ilonggoma weregma wam TUHAN enda ahayeg hoag ulug waroho foruk kwit fouk deberuk katswa on aire helep on fam fololoho wirig latsi. Meja ai emberim yatdoho re setengah meter en, emberim fil de unggut ohwan degma, unggut eta domog yat deg ale nim anggwe deg ale nim de tiga perempat meter en deg latsi. Airoho degma e doaleg eta emberimmu re wam waroho yalduk angge omano welatsi.

⁴³E doaleg etma enggapkap fil de anggwe deg alere, 75 mili meter en deg latsi. Wam ino mundoho kongdoho indok yalduk on omanore, e ai emberimmu foruk katswa angge deg latsi.

⁴⁴Ai en ap ai en an og-naplug ambe ilonggo fil on fam etmano lasireg, etma re ambe biren weregma eke re sokole utara fil on anyo aluluk weregma alukwe re selatan fil deg latsi. Ne eke re sokole selatan fil[82] on anyo aluluk weregma alukwe re utara fil deg latsi.

⁴⁵Airoho degma ap anyo en an hweag-nutuk kwit, ambe selatan fil alukwe deg on aire imam TUHAN obam wirigmu yabuk duruk on enobahet fouk deg wereg,

⁴⁶ne ambe eke utara fil alukwe deg on aire it imam mezbah wam waroho yaldukmu anyo hwalduk on omano fahet. Imam etma abirengge re hun Zadok ambiangma on wereg. Aire it enunggul unuk Lewi on en de we hun Zadok ambiangma on neg de TUHAN il hanim etma At obahet kabog dukoho lit laukmu, ulug isi.

⁴⁷Ap ai en ambe ilonggoma on anyo wal hasireg, wirig alere unggut ohwan deg latsi: yat deg ale mel anggwe deg ale mel hundomog de 50 meter en deg latsi. O TUHAN obam ai re barat fil etma weregma waroho indok yalduk angge obale buhun deg aire alukwema welatsi.

⁴⁸Ai en at en an og-naplug lasireg, TUHAN obam wirigmu en ambe alukwe fil anyo lasireg, yal foma omano fene laharuk kwit, aren ambe kurukmu anyo ilit disi. Ilit disimen de anggwereg alere tujuh kali dua setengah meter en deg latsi, obahat de elan biren fil welatsi on aire aldap wilim deg latsi alere satu setengah meter [83] en. Bekit fil hware fil de dimuk eke lahabeg latsi. Ambe olohotma on amu yat deg latsi alere sepuluh meter en ne anggwereg alere enam meter en deg latsi.