Read Ninia Yali YEHEZKIEL 41 Bible Online

YEHEZKIEL 41 - Ninia Yali bible

YEHEZKIEL 41

¹Ap anyo en an hondog naplug lasireg ambe bul etma kwik lasi, ambe ai unuk de obale mun amu eneg urukmu anyo lasi. Lasireg, at en de hug ele etma fil deg on anyo ilit disi on de: Yatdoho re tiga meter [84] en,

²anggweroho re lima meter en deg latsi. Obahat biren ombandu foma-foma eta ayuhuk wilim deg latsi alere dua setengah meter en. Ai en aren ambe mun amu enegma anyo ilit dohore: yatdoho re 20 meter en anggweroho re 10 meter deg latsi.

³Ai en at ebe ambe bul etma kwisi. Kwisireg de aren hug ele etma fil deg on ilit duruk katsimu, yatdoho re satu meter, anggweroho tiga meter en, ne obahat biren mangnoroho ombandu elahalet wilim deg ale re tiga setengah meter [85] en deg latsi.

⁴Ai en aren ambe ai oho ilit duruk kwit, wirig alere unggut ohwan wirigmu, yat deg ale mel, anggwe deg ale mel sepuluh meter en deg latsi. Ai debesireg at en an hweag-nutuk kwit, “Ambe mun amu enegma anyo re su” ulug hweag-nitsi.

⁵Ai mundoho debelug ap ai en obahat TUHAN obam wirig ilonggo fil en wal hauk kwit, wilim deg ale tiga meter en, obahat TUHAN obam wirig maseroho etma ambe welatsi on anggweroho re dua meter welatsi.

⁶Ambe etma soba henahan wirigmu, soba etma ilonggo domog de ambe baleg 30 heg deg latsi. Soba etan obahat dag fil de maben deg kweleg obahat apma on neg deg wilim degma re, ambe baleg etmano huli heg foruk kwit de o TUHAN Obam wirig anyo yendeg folole fouk fug angge wirig latsi.

⁷TUHAN Obam wirig on obahat aire dag fil en fu haukmu re apman angge emberimmu etma re higit ale neg deg latsi. Ne o TUHAN Obam wirig on ai obahat dag fil en, ambe baleg on etano dag fil etma re yal humon biren angge weregma, ap homi en de o soba apma on fam en de bireneg on fam mel henahaneg on fam mel laharuk katswa.

⁸Ambe baleg etman obahat dag fil wilim deg alere dua setengah meter en. O wirig etma sokole yendeg alere TUHAN Obam wirig fil yendeko utara fil etma deg latsi, ne ambe baleg foma re sokole selatan fil deg latsi. O TUHAN Obam wirig on maseroho etma re atog lisoho re dua setengah meter en; ne ebe wirig alere kwenang fam en de tiga meter en, andulire TUHAN Obam wirig on ambe baleg omano obahat fahet oboule fousa on nim higit deg latsi. Ne o atog lisoho dag fil wirig on dulug o it ap imam en yabuk durukmu dulug etma re ambe eke koloreg on wirigmu ilonggole healeg alere TUHAN Obam wirig men bekit fil nim hware fil nim etma re sepuluh meter en deg latsi.

¹²Ambe baleg foma fil en barat fil etma re, o wirig humon eke weregma o ai ebe yatdoho re 45 meter en ne anggweroho re 35 meter en, ne o ai obahat wilim deg alere dua setengah meter en deg latsi.

¹³Ap anyo en TUHAN Obam wirig anyo ilit hasimu: yatdoho re 50 meter en. TUHAN Obam wirig on ambol fil en, o wirig humon foma barat fil ai yatdeg ale ohore 50 meter.

¹⁴TUHAN Obam wirig on alukwe fil en timur fil ambe olohotma wereg on bekit fil nim hware fil nim fam alukwe deg on ohore 50 meter en neg.

¹⁵Ap ai en o wirig humon ambe olohotma on foma barat fil fureg on ai oho ilit hasireg anggwereg alere 50 meter en deg latsi, aire obahat bekit fil hware fil et seberoho deg latsi. TUHAN Obam wirigmu anyo en ambe re alukwe fil wereg on nim, ambe Mun eneg on nim, Ambe Mun Amu Eneg on nim etare,

¹⁶alili angge e on fam hilinggigmu, kwenangman angge bekit jendela fam etma re e on fam neg ayuhuk sebeloho hilinggig latsi.

¹⁷Obahat ilonggo fil etma abirangge re alili angge ilitdeg on de hwesesengge oho angge neg dopno deg latsi.

¹⁸Aire e lua nim kerub ilit angge misig inim, no kerub etano biren angge sahalimu re e lua misig ilit deg welatsi. Kerub aire orohole biren degma,

¹⁹orohole misig eke re ap orohole on aire e lua hware fil wereg on anyo fil alukwe fu deg latsi, ne orohole bireneg on de no singa orohole on anyore e lua bekit fil wereg on anyo fil alukwe fu deg latsi. Airoho degma hwesesengge oho angge etma re o TUHAN Obam wirig anyo ilonggo elekwe etma abirangge deg latsi,

²⁰aire hwenieman angge re sokole emberim fam huli deg latsi.

²¹E sok wirig on o Mun Enegma anyo re unggut ohwan deg on neg fam wirig latsi. Ambe Mun Amu Eneg on olohotma etma re amu angge eke ebere mezbah e on fam wirig angge hag welatsi.

²²Weregma yatdeg ale re satu setengah meter en ne anggwe deg alere satu meter en. Unggut-unggut mel, eyangge[86] mel e fam buhun duswa. Ap anyo en an hweag-nutuk kwit, “Su re meja TUHAN weregma olohotma wereg au” isi.

²³Ambe amu eneg on fil hug ele ambiangma etma re sok misig eke welatsi, ai hagdoho re eke Ambe Mun Amu Eneg on fam lauk fil, hug ele unggutmu etma oho sok eke welatsi.

²⁴Sok ai ebe biren fam laregma bul en husuruk katswa.

²⁵Sok o ambe amu enegma anyo re alili angge e lua ilit angge mel, kerub mel hwesesengge oko o obahat fam deg hagdoho ilit deg latsi. Ambe alukwema on fam dag fil etma re huli-huli e on fam baleg latsi.

²⁶Obahat ombandu bireg eta fene re jendela yendeg latsi, ne obahat fene re e lua[87] ilit angge hwesesengge oko dopno deg latsi.