Read Ninia Yali YEHEZKIEL 42 Bible Online

YEHEZKIEL 42 - Ninia Yali bible

YEHEZKIEL 42

¹Ai en de ap anyo en an og-naplug ambe dag fil etma lasireg o wirig eke TUHAN Obam wirigmen foma utara fil wereg on anyo unug nitsi, o ai TUHAN Obam wirigmu o humon wirig on ai en de yatdoho fug.

²O wirig ai yatdoho re lima puluh meter en, ne anggweroho re dua puluh lima meter en.

³O wirig ai en ombandu misig de alukwe o ambe olohotma lisoho wirig on anyo fil degma, anggweroho re sepuluh meter en ne ombandu ekere hwenie helep on dagma wirig on anyo fil degma latsi. O wirig aire soba henahan weregmu; soba ebe domog de lohon hihiloho kwelabeg kweleg soba apma on neg de wilibig latsi.

⁴Ambe etma alukwe fil, ambe ilonggo on fam de hug ele eke weregma hug ele ai anggweroho re lima meter en, yatdoho re lima puluh meter [88] deg latsi. Sokole re utara fil yendeko wilibig latsi.

⁵Hug ele ambe emberimmu wereg on olohotma etma re ele hum deg kweleg apma wereg on de onggog degma latsi ale aire ambe soba emberimmu on fam de mun onggog degma re apma on de hum deg latsi.

⁶Ambe etma re soba henahan fam wirigmu, o bumbuk elekwe wirig on e hulug lahabeg latsi omano hag hulug lahabeg latsi fug.

⁷Soba apma on foma yatdoho re dua puluh lima meter en hagdoho aire obahat amu en neg deg latsi, ne foma humdoho dua puluh lima meter en ohore, ambe-ambe angge wirig latsi. Soba mun emberimmu on ai fam en o wirig ai abirangge fam etma re ambe-ambe angge welatsi.

⁹Ambe apma fil o wirig au ambiang timur fil etma mel, obahat indipmu etma mel de sok misig eke yendeko ambe olohotma dag fil on fam wilibig latsi. O TUHAN Obam wirig men ombandu selatan [89] fil etma re, o misig aleroho wirig angge welatsi, ne o ebe re o foma barat fil wirig on ai en de yat deg latsi fug.

¹¹Ambe etma olohotma re hug ele eke, hug il utara fil wereg anyo hag wereg latsi. Ilit deg ale mel, obabut wirig ale mel, sokole yendeg ale mel de mun higit deg latsi.

¹²Ambe etma apma fil en ombandu selatan fil, obahat indipmu en ambiang timur fil etma oho sokole misig eke wereg latsi.

¹³Ap ai en an nobam uruk kwit, “O biren wirig on eta mun eneg on. Etma re ap imam en TUHAN ilhanim inaheg, wam waroho yalduk angge mun eneg on omano etman nenggeg duruk kamuhup. Etman neg waroho foruk on mun eneg on foruk kamuhup anggere: gandum anggen baleg nim, nenasiag apeleg-apdoho nenobahaukwag ulug TUHAN heng duruk on nim, ap enangge obalma foruk on nim, oho foruk kamuhup.

¹⁴It imam lahe TUHAN Obam wirigmu etman yabuk mundoho debelug dag fil olohotma etma wilibik lalug halug de, sum it en yabuk o amu enegma ai duruk kwit wanduruk on omano hogdoho ambe etma fam foruk kamuhup. Mundoho debelug it enesum amu on wandalug ap homi kabog degma enekit lauk kamuhup” ulug hweag-nitsi.

¹⁵Ap ai en TUHAN Obam wirigmu en ilonggo fil omano mundoho ilit disireg, aren an og-naplug sokole timur fil on fene en wilibik lasireg de, o TUHAN Obam wirig on anyo maseroho ilit disi.

¹⁶Domuk ilit angge anyo fam ambiang timur fil wal-hasimu: 250 meter en deg latsi.

¹⁷Ai debelug aren foma ombandu utara fil nim selatan fil nim barat fil nim wal-hasi; men de ombandu omano domog yat deg latsi alere higit doho 250 meter en deg latsi.

²⁰Airegma re kwenang TUHAN Obam wirig on de kwenang unggut ohwan hilinggig on degma, ombandu omano domog de 250 meter en deg latsi. Kwenang aire fak lehet misig fam maseroho kwelabegma, fak lehet ai en de kwenang TUHAN obahet eneko wereg on nim kwenang hesangge on nim fahet hulireg welatsi.