Read Ninia Yali YEHEZKIEL 43 Bible Online

YEHEZKIEL 43 - Ninia Yali bible

YEHEZKIEL 43

¹Ai mundoho debelug, ap ai en an og-naplug lasireg sokole timur fil yendeg on fam og-naplug lasireg,

² etman an den haukmen timur fil en seleg humon helag felag angge dil Allah Israel on enakni wereg ulug eneg doho waharukmu hawihik. Allah ele re ik humon u hag nim ne Allah aseleg en kwenang ombagbag duruk mu nim hag durukmu hawihik.

³Na hag fam hawihik on aire an haukmen Allah wahasireg Yerusalem luluhun durukmu hawihik on anyo hag mel, an Ik Kebar ikman hawihik on anyo hag nim. Airoho hawihikdeg an norohole belabeg ying atlug sahaun uruk kwit mot-dirihik.

⁴Seleg helag felag angge duruk katsi on aire sokole timur fil en yendeg on anyo fene en o TUHAN obam wirig ilonggoma atlumuno kuruk katsi.

⁵TUHAN Aheime en an hamboko og-naplug ambe ilonggoma on fam atlumuno kwisi; mu haukmen de TUHAN Obam anyo re TUHAN wereg ulug seleg weregma hawihik.

⁶Ai en de ap ai an naluluk unduhuk kweleg, TUHAN Obam wirig ilonggoma etman ele an hweag-nutukmu holeg latihik on fam ele diroho isi,

⁷“Hat ap homi waratuk on su yei, su re An nebe nomaliki Israel on enesahalimu wereg lit it enebe li mundoho-mundoho melal-enepuk kwit welaruhuk. It nim ap raja nim en ohore, enangkembu wireheg, ne it enowesi raja enebe wareg[90] kwenang su fam sal-enebeheg, duruk kwit An nunuk mun amu eneg on anyo emere nobaharuk kamuhup.

⁸Atam de it enowesi raja en An nobam sokole mel lang oag mel wereg kweleg iren sokole mel it enobam enebe weregma lang owag mel wutsama re o iren dulug An den on dulug de obahat we misig neg welatsi. Iren de mun heimaldo ale omano duruk kwit An nunuk mun eneg on anyo emere foruk katswa. Ai fam de An nolok en enebe elehapdoho feserihik ai.

⁹Famen ketia huli en de, iren kembu wireheg raja iren on wareg[91] saleg on etmano oko amumu feik laheg duruk ale bale fohup fano. Airoho duhupmen neg de An nebe it enesahalimu mundoho-mundoho welaruhuk” isi.

¹⁰Ai isireg TUHAN ele eke nim uruk kwit, “Ap homi waratuk on su yei, An nobam au fahet ap homi Israel on hweag-esakin, ne iren o au wit atsi ale fahet fik-furoho kumu hoag ulug mingming enebin. It enesiag duruk katswa on etma fahet enenggali hoag ulug diyuk.

¹¹Ne iren enobabut duruk katswa ale fahet mundoho enenggali hilauk em de, An nobam au wit atsi ale fahet diroho wit atsi ulug seleg doho hweag-esakiuk. Aire o ebe obabut deg ale mel, sokole wilibeheg, kwik waheg, duruk on mel, o ebe soba-soba angge wirig ale mel, awene melaleg mel diroho airoho diyuk ulug wereg ale mel etma fahet hweag-esakiyuk. Mundoho etma bale fohunmu re iren inil heheg, di ale su ale hwalduk ale fahet furebeheg, wene melaleg wereg on etma holoho deheg, duruk kamuhup.

¹²Su re TUHAN Obam wirig on au obabut amu hunduko deg ale; o sili abirangge maseroho duk leho on fene etma re mun eneg on wereg” isi.

¹³ Sure mezbah wam waroho yaldukmu ilit angge TUHAN Obam wirigmu ilit duruk ale on fam on anyo. Mezbah ai eyog indip kwe maseroho etma re ik kalog misig eke ilinggo elere setengah meter en ne ele healeg ale oho re setengah meter en neg, ai en elan kwe lahabeg deg alere seperempat meter en.

¹⁴Ik kalogma etman de mezbah apma hwaleg on erahamu huli aire satu meter en deg latsi. Bul de dua meter en, aire mezbah indipmu maseroho etma healeg latsi famen de bul etma neg setengah meter en healeg latsi. Indip henahaneg on aire mezbah emberimmu ai ohore horog setengah meter lohon il dot deg kweleg bul etma maseroho re healeg latsi.

¹⁵Foma henahaneg on su re obale Allah fahet foruk angge yaldukmu; ai yatdoho re dua meter en. Unggut ohwan foma-foma etma andimuk hag angge ilit degma ngganog deg latsi.

¹⁶Mezbah ai emberimmu etma re unggut ohwan wirig latsi; ombandu ilit dohore enam meter en deg latsi.

¹⁷Foma bulmu etma oho unggut ohwandoho wirig latsi, mu ombandu hundomog etma ilitdoho tujuh meter en deg latsi, on ai nim eke alduk misig fil ekere yatdoho lahabeg alere seperempat meter en deg latsi. (Ik kalog ebe anggwe deg alere setengah meter en deg latsi.) Ombandu timur fil etma re yal belaroho mezbah wereg fil emberimmu etma lahabeg latsi.

¹⁸ TUHAN Mun Leho wereg on en an nobam ele hweag-nutuk kwit, “Ap homi waratuk on su yei, An den hat hweag-hutuk kahi ale eta hesanggo furoho holduk kamin. Mezbah ai mundoho wiri folug de, haren wam waroho emberimmu feik lahalug wam amep ebene hilili foluk indok yaliyuk.

¹⁹We Imam Zadok unggul unuk Lewi on omaliki neg An nobahet wamuhup deg wene kabog duhup. Ulug An TUHAN Mun leho welahi on en wene su melal-habihi. It fam sapi yohombuk on misig sauwe on eke enesiag apeleg apdoho fesoukwag ulug waroho yalukwag doho og-esakiyuk.

²⁰Amep dorangge lohon oko walug mezbah anyo unggut ohwan fene andimuk hilinggig kwe mezbah ai fene etma are debeyuk, elan elan foman bul kwe etma oho higitdoho debeyuk. Mezbah ai maseroho etma oho airoho neg debeyuk. Airoho duhun fam haren mezbah ai horuhundeg An nobahet eneko fohun.

²¹Ai debelug sapi yohombuk enesiag ho-enepuk on fahet ai wahundeg obale mundoho wep degma aire TUHAN Obam wirig maseroho obale amu enegma etman dag fil indok yaliyuk.

²²Likiare haren kambing yohombuk ahapmale eleg on eke enesiag apeleg apdoho foruk on fahet waroho yalduk kwit mezbah ai amep fam horuhun. Sapi yohombuk sauwe on anyo fam duhun ale etano higitdoho neg duhun.

²³Hat en airoho mundoho debelug halug de, sapi misig yohombuk sauwe on eke nim kambing yohombuk sauwe eke nim, birenet anggere enahapmale wereg fug on neg,

²⁴wahundeg ai en An og-nirik manu. It imam en de mayu wam biren wareg angge eta emberimmu fole folug, indok yale fohupmu An nobahet folug yalduk on aruhu.

²⁵Nukoho hundig sabit enam aire, kambing misig waroho yaleheg, sapi yohombuk sauwe on waroho yaleheg, kambing yohombuk on enesiag apeleg apdoho fesoukwag ulug on fahet yaleheg, duruk kamuhup. Wam etmare ahapmale elegma eleg on neg yalduk kamuhup.

²⁶Nukoho sabirenam anunuroho etma it imam en mezbah ai mep watuk ale duruk kwit horuruk kamuhup. Ai en it yalik wamuhup angge ulug fik-fouk deberuk kamuhup.

²⁷Nukoho sabit en anyo mundoho debelug, ahae fotog salim de it imam en obahet foruk angge omano mezbah emberimmu wam TUHAN ahayeg hoag ulug on mel, TUHAN en ap homi omano fanoap nenebukwag ulug heng uruk kwit fahet mel yalduk kamuhup. Ai fam An de hit abirangge fahet nahayeg henepuk karuhuk. Ulug An, TUHAN Mun Leho wereg lahi on en nele mundoho hweag-hirihi” isi.