Read Ninia Yali YEHEZKIEL 44 Bible Online

YEHEZKIEL 44 - Ninia Yali bible

YEHEZKIEL 44

¹Ai debelug ap anyo en an og-naplug o TUHAN Obam aluluk sokole foma timur fil yendeg on anyo fam lasi. Sokole ai sok laregma,

²TUHAN ele an nobam hweag-nutuk kwit, “Sokole su re mondabi lareg laruhu husuhup ouswa. Ap misig ulug oho eke kwik waruhu hayog, An TUHAN Allah Israel on anyo re sokole su fene An mundoho nobam kwik waharihik deg welahi. Mu anggere, sokole aire mundoho lareg neg welaruhu.

³Famen de fobik it enalong wereg lit melal-enepuk kamuhup on omano neg de sokole ai fam lahupdeg nauk angge amu eneg on An nil hanim wereg on nauk kamuhup. At de sokole ai fene neg ambe humon anyo fam kwik watlug, sokole ai fene neg wilibik lauk karuhu” isi.

⁴Ai en ap anyo en an og-naplug lasireg sokole utara fil TUHAN Obam wirigmu yendeko kwelabeg fil etma nobahaik lasi. Mu an den fureberuk kwit, TUHAN Obam wirigmu omano haukmen de, TUHAN ebe wereg ulug eneg doho re seleg helag felag angge duruk katsi. Mu an norohole belabeg sahaun irihikdeg mot-dirihik,

⁵ai en TUHAN en an hweag-nutuk kwit, “Ap homi waratuk on su yei, hat holduk kahen ale mel hauk kahen ale mel etma fik furebeyuk. An nobam wirigmu su duruk kamuhup ale fahet wene melaleg mel diroho airoho diyuk ulug mel hat hweag-hutuk kahi. An nobam wirigmu samel samel kuruk kamuhup, samel samel kuruk kamuhup fug ulug de lisu furoho bale fein.

⁶Ap homi Israel on it nele sahalduk on etma fam hweag-esakin, An de TUHAN Mun Leho welahi on deg lahimu it enebe emere fahat doag ulug embesehuk ale aire nerim deg lahi.

⁷It en An nobam wirigmu emere fouswa, aire it ap dagma on enahap baleg eleg on An nawene melaleg higitdoho duruk eleg on etma kwik loag ulug hweag-esauk mu, ahalue mel An nobahet waroho yalduk angge amep mel, foruk angge mel walug kuruk on ai fam emere fouswa. It en duruk ale namelmel ale etma duruk fam it An ninim sali wareg lahi ale omano dahan-ap deberuk.

⁸It enonggwareg enemu neg An nobam wirigmu etma wene kabog duruk kwit di ale su ale duruk fug. Ite ap bohon iren yabuk dukwag ulug feseruk on etmano en duruk.

⁹An TUHAN Mun Leho welahi on wene unduhuk foruk kahi anggere, it ap bog on mel, enahap baleg eleg on mel, An nele holoho duruk eleg on mel de An nobam wirigmu dik demdoho kuruk kamuhup ale wereg fug. Wene aire it ap bog on ap Israel enesahalimu yugdoho wereg on fahet oho uruk kahi ai” isi.

¹⁰TUHAN ele an nobam uruk kwit, “An den ap Lewi on unggum og-esahuk ai it ap Israel enunggul unuk amu on iren An embeselug kembu mot-duruk on etma nim seberoho unggum og-esahuk.

¹¹An nobam wirigmu etman it yabuk duruk kamuhup on de we yabuk durukmu let-enepuk ale nim, sokolma kahaleg on nim neg An nobahet duruk kamuhup. Ite An nobahet waroho yalduk on ulug mel og-nutuk on mel omano senggeleheg, kongdeheg, duruk kwit, iren An nomaliki enobahet de femdoho duruk kamuhup.

¹²Famen de it en ap homi Israel on enobahet mundoho kembu mot-duruk ale duruk katswa fam, ap homi Israel on yep dobahat daswama, siag fam luhut atswa ai, airegma An TUHAN Mun Leho welahi on en, hombuk balduk kwit, it ai mundoho unggum og-esahuk uruk kahi ai.

¹³It de An nobahet eke enebe imam on atlug yabuk deheg, ite An nobahet angge amu eneg wereg on omano fam bal heheg, ite obale mun amu enegma anyo kweheg, mundoho duruk kamuhup fug. Aire iren naldo baldo ale duruk katswa on omano fahet unggum hahup ai.

¹⁴Ketia An den it yabuk unduhuk feseruk kwit, An nobam wirigmu yabuk siag hag on duruk kamuhup en unduhuk feseruk kahi ai” isi.

¹⁵TUHAN Mun Leho wereg on en ele uruk kwit, “Unggul unuk Israel on en An fotog neauk lire hun Zadok omaliki on Imam Lewi enap dipdoho An nobahet nobam wirigmu etma yabuk duruk kamuhup. Ai fahet we ketia oho iren neg wam waroho amug mel amep mel walug An nobahet folug og-nutuk kamag.

¹⁶We it ememu neg An nobam wirigmu kwik watlug mezbah fam An nobahet waroho foruk angge fam duruk kwit, An nobam wirigmu etman wene kabog duruk mu etma oho iren neg melal-enepuk kamuhup.

¹⁷ It lahe ambe olohotma on fam kwik lakoho sokole fam kwik lauk kwit de it sum linen on neg wanduhup. It yabuk ambe ilonggoma on fam mel An nobam ilonggoma nim yabuk duruk kwit halug de sum wol on wanduruk kamuhup fug.

¹⁸It ahanhan eneplug lisag enebukno ulug de, sum eneyog sum linen on bahaluk eleg angge wanduruk kamuhup. Inim enenggulmu oho linen on bug duruk kamuhup,

¹⁹ It lahe o dagma ap homi kabog durukmu etmano wilibik lalug halug de, it imam en de sum yabuk duruk kwit wanduruk on omano o An nobam wirigmu en ambe mun enegma omano en nonggoloho folug enesum amu on wanduruk kamuhup, aire sum eneg on etman nomaliki alemat[92] enebuk no ulug airoho duruk kamuhup.

²⁰ It imam on halug de eneruk enenggulowag hohoboroho baluhup fug, eneruk ai baluk fug angge oho embesehup fug famen de su huli baluhup ulug wereg aleroho neg horogdoho balduk kamuhup.

²¹ It lilomul ilonggoma on fam kwik lakoho anggur ahaik on nauk kamuhup fug.

²² It imam de enohwesi duhum on Israel on halug neg hweleheg, it imam on en sohwe on halug neg hweleheg duruk kamuhup famen de, ap eke en embeseruk on de hwelauk kamuhup fug.

²³ Imam en ap homi An nomaliki hweag-esauk kwit, ke on An nobahet eneg on, ke on eleg on, ne agama en ke on horeg on ke on emereg on ulug eneg doho deberuk kamag ulug hweag-esauk kamuhup.

²⁴Wene minggirig on enam atuk halug de, elehap dukohore, An den wene diroho airoho duruk kamuhup ulug og-esawihik ale etma higitdoho duruk kamuhup. It en soni agama fahet on esetuk kwit, wene melaleg ale mel diroho airoho duruk nu wene mel higitdoho duruk kamuhup. Nukoho sabat An nobahet eneg on anyo leho foruk kamuhup.

²⁵ Ap imam on de ap wareg bal hahu fam fong en sebeluhu ai fug. Famen akni isinga omalik wareg nim neg de, are ap on mel erek hwele on ap owan hwelauk eleg on mel wareg en sebeluhu ai neg de eleg.

²⁶At ebe mundoho fongen sebelduk halug mundoho ho dalug, at en nukoho sabit en eke nangno hauk karuhu,

²⁷ai en at ebe lalug An nobam wirigmu etma ilonggoma ambe balegma etman nobahet waroho yale nobahalug ebe ho atilauk kwit An nobam wirigmu etma yabuk duruk kamag. Ulug An TUHAN Mun Leho welahi on en nele mundoho ihi.

²⁸ It imam en yabuk imam on aire An den ap homi Israel on fam en endag atil lauk kamuhup on fam duruk kamuhup ale ulug og-esawihik on etmano og-esawihik ai. Ande it enangge welahimu re it imam etma enangge amu on eke welaruhu fug.

²⁹ It aire An nobahet gandum mel wam siag apelehap doho foukwag ulug waroho foruk on mel, ap enangge obalma ulug foruk on mel etma fam eneluk welamuhup; Di angge su angge An nobahet ulug eneko nobaharuk kamuhup angge etmare it neg og-esauk kamuhup.

³⁰It imam on de anggen dahanduk kwit mun fano on eneko atam dahanduk on munangge manangge etman An nobahet foruk kamuhup angge etma halug it og-esauk kamuhup. It ap homi Israel en de hundig-hundig roti wutuk kwit, roti atam on de it imam enobahet. Ai fam de it Israel enobam olekwe hundomog An den fano-ap enepuk karuhuk.

³¹ Suwe bak amu on oho amu en wararuhu on mel, mene olok on en senggeluhu on mel etma it imam on de nauk kamuhup fug” isi.