Read Ninia Yali YEHEZKIEL 45 Bible Online

YEHEZKIEL 45 - Ninia Yali bible

YEHEZKIEL 45

¹Kwenang ai owan yohwandoho it enunggul unuk domog og-esa fug kweleg de misig eke TUHAN obahet amu eneko fohup. Kwenang fohup on ai ilonggo ele yatdoho re 12,5 kilometer en, ne nunggulig de 10 kilometer [93] en fohup. Mu re o etma fam de mun amu eneg weregma uruk kamuhup.

²O TUHAN obam wutuk on fahet de kwenang ai en ombandu ohwan debehupmu re, ombandu amu-amu re 25 meter en heg debehup deg obale eta fam at TUHAN Obam wuruhup.

³Kwenang ai fam en yatdoho re 12,5 kilometer en nim, nunggulig de 5 kilometer en nim etan minggiroho re kwenang amu enegma etma TUHAN Obam wuruhup on fahet fohup.

⁴Kwenang aire amu eneg on degma re it imam TUHAN Obam wene kabog durukmu yabuk duruk on fahet fouk debehup. Kwenang ai on en foma re it enobam weregma wit-dauk on fahet debehup, ne foma re TUHAN Obam wutuk on fahet debehup.

⁵Kwenang ai fam en fomane eke 12,5 kilometer en nim nunggulig de 5 meter en nim de ap Lewi on TUHAN Obam etma yabuk duruk on fahet fohup. Mu re etma it enebe welamuhup mu[94] fahet kota-kota wuruhup.

⁶Kwenang amu eneko fohup on ai wereg kweleg de kwenang amu on misig eke yatdoho re 12,5 kilometer en nunggulig de 2,5 kilometer en deg angge kota misig eke wiri folug ap homi Israel on hesangge wereg ale fahet amumu fouk debehup.

⁷It Ap enalong wereg on mel pemerintah mel fahet oho kwenang eke fouk debehup. Kwenang it fahet on aire, TUHAN obahet on ulug eneko fohupmu etan dil-dil de Laut Tengah huli etma, timur fil en huli-huli re kwenang amu eneko fohup on fam etan de o kwenang ai en timur fil etma huli. Anggere kwenang ai ilonggo ele yat deg laruhu alere, it enunggul unuk Israel on og-esahupmu hwelahup etma hagdoho deg laruhu.

⁸Kwenang etma re it ap enalong wereg on mel pemerintah nim ap homi Israel on enanggwenang fam melal-enepuk on enobahet fohupmu re, iren An nomaliki enenggik omamne fam sebel-enusug lamuhup hayog, ite kwenang alongdoho etma re ap homi enunggul unuk Israel on enangge amag ulug og-esahup en duhup.

⁹TUHAN Mun Leho wereg on anyo en uruk kwit, “Yaho hit ap Israel fam henalong wereg henap suma, hit siag neg duruk ale re mundoho dehep aho! Hiren henendan bolug ap homi holduk on sebeloho feseruk kahep ale ai bale feyek. Hiren de demdoho ale nim katukdoho duruk ale nim duruk kamek. Hiren dik-dem misig-am ulug oho An nomaliki enanggwenang fam en muko wilip-enebuhup hayog. Ulug An TUHAN Mun Leho welahi on en wene ai hit henobam ihi.

¹⁰ Hiren de anggin ilit duruk angge mel, lelenggatuk angge mel de demdoho on fam neg duruk kamek:

¹¹Hiren lelenggatuk kwit satu efa fam lelenggatuk halug de ilonggoma yohwareg on aire satu bat amu firogdoho eleg atuk angge keraldukmu hag fam keraluhup. Ilit angge anyo fam kumu halug duruk on aire satu homer fam duruk kamuhup. Airegma re hiren lelenggatuk angge etma re diroho duruk kamuhup: 1 homer [95] = 10 efa = 10 bat nim higitdeg.

¹²Hiren anggin ilit duruk kamuhup on de diroho: 1 syikal [96] de = 20 gera nim higit deg, 1 mina re = 60 syikal nim higit deg laruhu

¹³Gandum walug feik waharukmu indip weregma ilit duruk kamuhup anggere su: 1/60 en gandum erang on balug foruk kamuhup: 1/60 en hit henangge zaitun anggen dahanlug foruk kamuhup. 1/100 en aire e on fam en anggen yihik foruk kamuhup. (Hiren ilit duruk kwit de bat fam neg ilit diuk: 10 bat = 1 homer inim higitdeg, ne aire = 1 hor nim higitdeg.) Domba re: ap eke en owam 200 en wereg halug de domba misig nim higitdeg laruhu. Hiren de gandum anggen folug og-nereheg, An TUHAN nenda nahayeg hoag ulug og-nereheg, An den fanoap nenebukwag ulug heng nabeheg, duruk on etma og-numuhupmu re hit henesiag etma napeleg-apdoho foruk karuhuk. An TUHAN Mun Leho welahi on anyo en wene melaleg su duruk kamuhup en ihi.

¹⁶Ap homi o kwenang ai fam welamuhup on abirangge en de foruk angge omano walug ap enalong wereg on mel pemerintah Israel on mel fam og-esa lauk kamuhup.[97]

¹⁷Hiren nukoho leho on fahet mel, Bigalem keron enam daukmu mel, nukoho sabat fahet mel, nukoho amu on fahet mel ebetuk kwit fahet de Ap along wereg on ai en wam An nenda nahayeg hoag ulug waroho yalduk on mel, gandum yalduk on mel, ne ap homi Israel on abirangge fahet anggur folug og-utuk on de iren neg onggo balduk kamuhup. Aren de enunggul unuk Israel on fahet enasiag apeleg-apdoho foukwag ulug mel, gandum foruk kwit mel, An nenda nahayeg hoag ulug waroho yalduk on fahet mel, TUHAN en fanoap nenebukwag ulug yalduk on fahet mel de aren neg fouk deberuk karuhu” isi.

¹⁸TUHAN Mun Leho wereg on en omaliki fam uruk kwit, “Bigalem misig tanggal satu fam de hiren An Nobam anyo ho duruk kwit, sapi yohombuk ket sauwe on misig eke ahapmale eleg on waroho og-nutuk kamuhup.

¹⁹Imam en de wam enasiag eleg-ap dukwag ulug watuk on anyo amep walug de e oag An nobam olma wereg on eta fene ho esauk karuhu, ai en mezbah wirig anyo unggut ohwan fene nim, sokole humon ambe healeg ilonggoma on fam kwik lauk on fam e lahabegdoho wirig on fene mel ho esauk karuhu.

²⁰Ne ai hagdoho re tanggal tujuh bigalem ai fam oho re, ap enebe domog en siag wenggele folug dusa on oho wong degman dusa on fahet oho, airoho neg duruk kamuhup. Hiren airoho duruk fam de An Nobam amu eneg wereg ale anyo hwale foruk kamuhup.

²¹ Ne tanggal empat belas bigalem misig fam de hiren soni pesta Paskah esetuk kamuhup. Airoho duruk kwit, nukoho sabiren fam de ap homi en roti fituk angge eleg on neg nauk kamuhup.

²²Nukoho keram on fam de ap along wereg lit melal-enepuk karuhu on anyo en de at onggwareg nim ap homi mundoho nim enesiag elegap nenebukwag ulug de sapi yohombuk misig eke waroho foruk karuhu.

²³Nukoho ebetuk kwit wereg on ai oan ambiangma atuk eleg kweleg nukoho sabiren eta fam wereg lit de at ai en de TUHAN fam sapi yohombuk sabiren nim domba yohombuk sabiren nim mun ahapmale eleg on waroho foruk karuhu. Nukoho hundig-hundig de aren kambing yohombuk on misig eke enesiag elegapdoho foruk on fahet waroho foruk karuhu.

²⁴Eta airoho duruk kwit, ekere gandum de 17,5 liter de sapi yohombuk on hundomog fahet, ne domba yohombuk on fahet de tiga liter zaitun ahalue foruk karuhu.

²⁵ Pesta O Sabo anyo fahet esetuk kwit de bigalem sabit on fam tanggal lima belas salim indip dulug de ap along wereg laruhu on anyo en de wam eke atam waroho fohu hagdoho, enesiag elegap dukwag ulug mel, TUHAN enda ahayeg hoag ulug mel, gandum mel zaitun mel folug og-nutuk karuhu” isi.