Read Ninia Yali YEHEZKIEL 46 Bible Online

YEHEZKIEL 46 - Ninia Yali bible

YEHEZKIEL 46

¹TUHAN Mun Leho wereg on anyo en ele uruk kwit, “Sokole timur fil yendeko ilonggo fil huratukmu kwelabeg on anyo nukoho folfalik enam yabuk duruk kweleg sok lareg welaruhu. Mu, sokole ai fam de nukoho sabat salim nim, nukoho humon bigalem keron salim inim neg husuruk kamuhup.

²Nukoho eta salim de it ap enalong wereg on omano lilimul dag fil etman ambe humon anyo fene kwik lalug, sokolma e unduko lahabeg on fam etma dimiroho unduhuk lamuhup. Wereg kweleg imam en ap along wereg on anyo on TUHAN enda ahayeg hoag ulug waroho yalduk on yaleheg, TUHAN en fanoap nenebukwag ulug heng duruk on fahet waroho yaleheg duhup. O sokolma ai en at ebe orohole belabeg sahaun ulug TUHAN mot-debelug lahu. Ai en hup atuk huli en sok ai latuk kamuhup fug.

³Sokole ai olohotma etan ap homi mundoho en de nukoho bigalem keron ebetuk salim mel, nukoho sabat ebetuk salim mel, enerohole belabeg sahaun uruk kwit TUHAN mot-duhup.

⁴Nukoho sabat salim de it enalong wereg enap en TUHAN obahet At enda ahayeg hoag ulug waroho yalduk kamuhup on de, domba omalik folfalik en nim, domba yohombuk on misig eke nim abirangge etma ahapmale eleg on neg og-utuk kamuhup.

⁵Domba yohombuk nim mangnoroho re gandum 17,5 liter nim, domba omalik etma nim hundomog ohore gandum liter enenda boruk aleroho foruk kwit gandum foruk angge etma nim de zaitun ahalue tiga liter anyo inim neg yalduk kamuhup.

⁶Bigalem keron fahet ebetuk kwit, ai foruk kamuhup anggere sapi yohombuk on misig nim, domba yohombuk on folfalik en angge abirangge re ahapmale eleg on nim foruk kamuhup.

⁷Sapi yohombuk nim, kambing yohombuk nim eta domog seberoho yalduk on de gandum 17,5 liter en nim, ne domba omalik inim seberoho re, it enambono boruk aleroho nim foruk kamuhup. Gandum foruk angge yalduk kwit etmare zaitun ahalue tiga liter anyo nim neg yalduk kamuhup.

⁸It enalong wereg enap anyo An nobam wirigmu wene kabog dik kul boruk kwit halug at ebe re ambe baleg humon anyo fene kwik lauk karuhu, ne wilip atuk kwit oho kwe ai fene en wilip atuk karuhu.

⁹Ahamdoho re ap homi nukoho hum salim watlug TUHAN mot-dukoho waharuk kwit de sokole utara fil ai fene kuruk kamuhup, ne enobam sombandoho wilibik lauk kwit sokole selatan fil ai fam wilipuk kamuhup. Ne it selatan fil on fene kwik waharuk on de utara fil on fene wilipuk kamuhup. Ap homi re kobokwe kwik wamuhup kwe ai fene wilibik lahup hayog; it de kobokwe foma fil on fene wilipuk kamuhup.

¹⁰Ap along wereg on ohore TUHAN Obam wirigmu kwik waharuk kwit, ap homi nim seberoho kwik watlug, ap homi nim seberoho wilipuk kamuhup.

¹¹Nukoho soni esetuk salim mel, nukoho hum on ebetuk salim mel fam de, sapi hundomog nim, domba omano nim de gandum 17,5 liter en nim neg yalduk kamuhup, ne domba omalik foma nim etma re ap wene kabog dik waharuk on anyo en enenda boruk aleroho neg yalduk kamuhup. Ap wene kabog duruk on en gandum yalduk kwit zaitun ahalue tiga liter anyo nim neg yalduk kamuhup.

¹²Ap along wereg on anyo enda fano en foruk angge TUHAN og-utuk angge indok yalduk kwit, TUHAN enda ahayeg hoag ulug on mel, TUHAN en fanoap nabukwag ulug heng uruk kwit on mel fahet femin ulug durukmu halug de, at obahet sokole bumbuk ilonggoma fil deg aire sok husi fohup. Mu re aren wam omano waroho yalduk kwit de nukoho sabat fam yalduk kwit duruk ale etanoroho neg duhu, famen de at ebe mundoho obam lilaukem de sokole ai nikangge laruhup” isi.

¹³TUHAN ele uruk kwit, “Nukoho mundoho fam o hubet angge re domba omalik misig umur satu tahun deg on ahapmale eleg on waroho TUHAN enda ahayeg hoag ulug indok yaloho og-utuk kamuhup.

¹⁴Ai nim sapliroho re dua kilogram gandum mel, zaitun ahalue re satu liter fam gandum ai fam anggeleg hanggeleg debelug, gandum foruk angge ai TUHAN og-utuk kamuhup; wene melaleg aire hundig weregma duruk kamuhup ale fahet.

¹⁵Hubet abirangge hundig hundig fam de domba omalik misig eke nim gandum nim, zaitun ahalue nim TUHAN obahet folug og-utuk kamuhup” isi.

¹⁶TUHAN Mun Leho wereg on en wene melaleg uruk kwit, ele diroho isi, “Ap along wereg lit melal-enepuk on anyo en kwenang aren on omano en foma at amloho og-utuk halug, kwenang aire amloho anyo angge aruhumu re it ahain elekwe on enangge on deg laruhu.

¹⁷ Famen de at along wereg ahun ai en kwenang foma amingming angge og-utuk halug de, kwenang ai owag oko[98] TUHAN fahet degma ulug fohupmu welaruhu. Kwenang ai re we at nim at onggwareg omalikisi on nim neg enangge welaruhumu, enenggwenang ai it enangge mundoho welaruhu.

¹⁸Along wereg on ai en de ap homi enanggwenang on dorangge oho lohon hwelahu fug. We at onggwareg anggwenang on neg ahwelani omaliki og-esahu. Ap amu on ulug oho eke An nomaliki on de minggiroho og-esahu fug” isi.

¹⁹Ai debelug ap ai en an og-naplug lasireg, sokole fene kwik lauk kwit, ambe mun eneg kwe omano en dulug lauk katsireg, utara fil etma nobahaik lasi. Ambe etma imam fahet fouk doho feseswama. Ap ai en o ambe ambiang barat fil etma unug nitsi.

²⁰Ai en at ele hweag-nutuk kwit, “Ambe etmare, imam en An nobahet foruk angge enesiag ho-enepuk on mel, unggulmu owam mel, gandum foruk angge mel, omano yaldukmu welaruhu. Obahet foruk angge etma dorangge dindik doho ulug eke walug dagma huratukmu etma wilibik lahup fug, airoho duhup halug ap homi siahap enebukno”[99] isi.

²¹Ai en an og-naplug lilimol dag fil huratukmu etma lasireg, unggut ohwan etmano unug nitsi. Hundomog lilimol we mun fem doron ilit anggere yat doho re 20 meter en, anggweroho re, 15 meter en deg latsi.

²³Bumbuk ele hundomog etma helep lehet en neg maseroho kwelabeg latsi. Elehet ai fam helep fam weratuk kwe ulanggen oho latsi.

²⁴Ap ai ele an nobam uruk kwit, “Sure it ap TUHAN Obam wirigmu yabuk duruk enap omano en ap homi en obahet foruk angge omano weratuk kwere ulanggen de etma” Ulug hweag-nitsi.