Read Ninia Yali YEHEZKIEL 47 Bible Online

YEHEZKIEL 47 - Ninia Yali bible

YEHEZKIEL 47

¹ Ap ai en an nikangge sombandoho hondog naplug TUHAN Obam wirigmu kurukmu sokolma etma lasimu, nil hauk men ik eleruk sokole ai apman fululuk doho timur fil etma wilibik laukmu hawihik, mu TUHAN Obam ohore alukwere timur fil deg latsi. Ik ai sokole TUHAN Obam yendegma etman wiliplug, selatan fil etman mezbah ayuhukwe etma hwaninggoho lauk katsi.

²Ai en ap ai en an og-naplug sokole utara fil on fam og-naplug wilibik lasireg, sokole timur fil on fene hondog naplug lasi. Ik doron ai sokole anyo ombandu selatan fil etman wirig atuk katsi.

³Domuk ilit hauk angge anyo fam ilit hauk kwit, ap ai en an hondog naplug timur fil ik anyo wilibik lauk fil etma lasireg yatdoho 500 meter huli etma lasireg, an hweag-nutuk kwit ik ai dahaloho nindig amin isi. Eta ik ahummu kurukmen de ik de ebe neyog nangguli huli deg latsi.

⁴Ai en aren eke 500 meter ilit disi, ne etan ik de nelenggen huli deg latsi. Ai en aren 500 meter en eke ilit disimen de ik ahum de nobahare huli fam deg latsi.

⁵Eke nim at en ilit hauk kwit, yatdoho 500 meter eke wal-hasimu, etma ik mundoho ilonggoma atuk kwit kwebekwe eneyog fam la fug ale deg latsi. Mu ap ik dahaloho nindig amul boruk kwit halug de, ik hurug nindig atuk kam ale deg latsi.

⁶Ai atsimu ap ai en ele an nobam uruk kwit, “Ap homi waratuk on su yei, abirale su fik-fureberuk kamin” isi. Ai en an og-naplug ik som lasimu,

⁷an nil haukmen, ik ayeg foma-foma etma e humdoho wilibig latsi.

⁸At ele an nobam uruk kwit, “Ik aure timur fil lauk kwit o su fene lauk kwit, Ik Yordan fene en dulug Laut Mati fil etma lauk. Ik ai lahe Laut Mati fam lauk halug ik laut asig on ai unduk fano atuk.

⁹Ik ai wilibik laukmu etma, munangge manangge ikan amu amu angge humdoho welaruhu. Ik Laut Mati on anyo oho ik ai en fano-ap duruk karuhu, ne ik ai wilibik laukmu etma eneluk enepuk karuhu.

¹⁰Ik eleruk o En-Gedi etman lahareg, ik eleruk eleruk o En-Eglaim huli fam etma, ik elan foma foma etma ikan matuk enap neg hopo deg lit, sum ahe belapuk kamuhup. Ikan di on su on ik ai ahummu etma wereg on ai ik Laut Tengah fam wereg hag deg.

¹¹Famen de ik elan kwe en ik lup-lup deg kwe etma, mun sebel am fug angge ik anyo mayu ahaik deg laruhu.

¹² Ik ayeg foma-foma ilihik wirihik etma e anggen yihiruk on munahan manahan humdoho wilibig latsi. Enggelare bug atuk katsi fug, anggen etmano eleg atuk katsi fug. E etmano re ik o TUHAN Obam wirigmen wirig atuk anyo fam de, bigalem hundomog de anggen keron yihiruk karuhu. E etma anggen de nauk on debelug enggela re ouk hiling enepuk on fahet welaruhu” isi.

¹³TUHAN Mun Leho wereg on en ele hweag-nutuk kwit, “Sure kwenang huli bal heheg unggul unuk Israel on enebe nesanggo en anyo enobahet yohwan esahun on. Unggul unuk Yusuf on de huli biren[100] on hwelahup.

¹⁴An den mundoho hombuk balduk kwit kwenang aire hit henombasi og-esahuk ulug, hombuk baldihik. Ai dirihikmu anggere kwenang ai waluhupdeg higitdoho henori nim yohwan diyek.

¹⁵Huli hulire utara fil en dulug, Laut Tengah huli en lahareg timur fil en lahareg, kota Zedad en,

¹⁶O Berota mel, Sibraim fam, (kota etmare kota Damsyik mel Hamat) mel, dulug bul eta wereg. Ai en kota Hazar-Enan o kota Hauran nim huli-hulimu etma fam welamuhup.

¹⁷Anggere, huli utara fil de indip Laut Tengah en dulug, huli re timur fil o kota Hazar-Enan fam; degma re kota Damsyik mel Hamat mel de huli-hulimu etman utara fil wereg ai.

¹⁸Huli foma timur fil en selatan fil de, o Damsyik mel Hauran mel dulug obale ekema eta. Degma Ik Yordan de kwenang it Israel barat fil on en nim it Gilead timur fil on en nim huli hulimu bul etman dil-dil o Tamar[101] Laut Mati elanma etma fam deg.

¹⁹Huli selatan fil en barat apma fil de, Tamar en dulug lauk kahareg ik eleruk Kades-Meriba fam deg, ai en barat emberim fil de, yatdoho lahareg Mesir huli en dulug, huli ik Laut Tengah huli etma.

²⁰Huli foma barat fil de Laut Tengah en bale fesi aleroho, ai en lahareg, utara fil o misig eke barat fil o Hamat kwik laukmu etma huli.

²¹Kwenang ai yohwanduruk kwit, hit henenggul unuk domog Israel on deg lahep aleroho yohwan duhup;

²²ne kwenang aire hit henangge on mundoho welamag. Ap bog on hit henesahalimu welamuhup on mel, ne enomaliki etman endag amuhup on mel oho re, kwenang etma on hwelahup fano. It ai Israel on mundoho atswa boruk kamuhup, it unggul unuk Israel on kwenang yohwan duruk li etma it oho helep anggen wal hauk angge wal hahup deg hwelahup.

²³Ap bog on kwenang og-esauk kwit de it unggul unuk Israel on nim wereg ai furebelug inim wereg ale eta hagdoho inim kwenang hwelauk kamuhup. Ulug An TUHAN Mun Leho welahi on en nele demdoho ihi” isi.