Read Ninia Yali YEHEZKIEL 48 Bible Online

YEHEZKIEL 48 - Ninia Yali bible

YEHEZKIEL 48

¹Kwenang huli utara fil en dulug timur fil lauk angge ai, indip ik Laut Tengah etman lauk kahareg, huli kota Hetlon en kobokwe o kota Hamat mel, Hazar-Enan mel, fam kwik lauk on en de huli kota Damsyik mel, kota Hamat mel, huli-hulimu etma fam. Unggul unuk ombolim on su re enebe hundomog de kwenang anggwe on timur hulimu etman lahareg barat en Laut Tengah huli etman misig heg hweloag ulug on ai en utara en dulug selatan fil hwelebag alere enenuk biling heg su: Dan Asyer Naftali Manasye Efraim Ruben Yehuda

⁸Foma ombolim on de kwenang ai eke duruk ale fahet amu eneko fohup. Kwenang ai yat doho re 12,5 kilometer en indip utara en lahareg selatan fam etma. Huli timur fil en nim barat fil en nim lahareg etma ilit angge higitdoho neg debehup. Aire foma minggit heg unggul unuk Israel on og-esahup on eta hagdoho. TUHAN Obam de kwenang eta fam fobik wuruhup.

⁹O ai foma etmare, TUHAN fahet eneko fohupmu welaruhu on aire kwenang huli eke yatdoho re 12,5 kilometer en, ne anggweroho re 10 kilometer [102] en deg laruhu.

¹⁰Kwenang ai bik bulmu etmare TUHAN Obam wiruhup. It imam on de kwenang enegma ai on etman eke hwelahup. It hwelahup fil on de 12,5 kilometer etma timur fil en dulug barat fil, ne lima kilometer en de eke utara fil en dulug selatan fil etma wereg on hwelahup.

¹¹Kwenang eneko fohupmu aire it Imam Zadok omaliki on ai enangge amuhup. It en TUHAN fahet enebiroho duruk kwit, it ap Lewi foma it enenggul unuk misig on en, it Israel fomane omano siag durukmu ininim siag dusa etma hag duruk fug.

¹²Ai fahet de Zadok omaliki ai kwenang ap Lewi on og-esaswa on aluluk kwe etma og-esahup. Kwenang eneg on ai mun oswama on wereg laruhu.

¹³Kwenang ap homi Lewi on fahet aire yatdohore 12,5 kilometer ai timur fil en dulug barat fil, ne anggweroho re 5 kilometer en ai utara fil en dulug selatan fil ai ebe kwenang imam en on nim erareg wereg.

¹⁴Dorangge ulug oho kwenang ai on en iren onggo wahup fug, ne amu angge nim oho aeg waruhup fug; Kwenang Israel en on mun fanoma etma ap amu on enenggik mu eke fohup fug. Kwenang ai TUHAN fahet mun eneko weregma, At angge atsi anggere.

¹⁵Kwenang eneko wereg on en foma selatan fil etma kwenang ai abuhuno lohon wereg on eta yatdoho re 12,5 kilometer wereg, ne, anggweroho re dua setengah kilometer en wereg. Ai ouswa deg fug anggere ap homi etma welamuhup on ai en enggelangge domba hwalduk kamuhup en de bul etma re kota misig eke wiruhup fano.

¹⁶Kota aire unggut ohwandoho neg wuruhup, ai en unggut hundomog etmare dua seperempat kilometer en neg wuruhup.

¹⁷Kota ai abirangge maseroho etmare, kwenang bumbuk healoho ebe domog en yatdoho re 12,5 kilometer en deg laruhu.

¹⁸Foma timur fil oho barat fil oho hundomog kwenang bumbuk healoho welaruhu on ai hundomog lima kali dua setengah kilometer en deg laruhu. Kwenang biren healeg laruhu on etare ap homi kota etma wereg on en eneyabuk wiroho yag daukmu welaruhu.

¹⁹Ap homi Israel on kota ai fam wereg lamuhup on en de kwenang ai fam yabuk witdauk kamuhup.

²⁰Kwenang abirangge et angge, kwenang eneko wereg on ai nim kota fahet on ai nim et anggere unggut ohwan fam wirigmu, unggut hundomog ilitdoho re 12,5 kilometer en.

²¹Kwenang TUHAN Obam fahet fouk doho fouswama ai en mel, Imam Lewi on fahet ai en nim, kota ai on en mel, timur fil nim barat fil nim etma re it ap etma melal-enepuk karuhu on enobahet welaruhu. Kwenang ai yatdoho lahareg timur fil yatdoho re timur huli-hulimu etma, ne foma barat fil de Laut Tengah etman lahareg, kwenang Yehuda en on nim, Benyamin en on nim etma huli wereg.

²³Kwenang enegma ai en kwenang selatan fil wereg on etma re it enunggul unuk amu-amu on fahet wereg. Kwenang ai anggwe deg alere, timur hulimu etman dulug barat fil en Laut Tengah fam degma, kwenang ebe yohwan duruk kwit utara fil en biling biling yohwandil selatan fil lahup alere: Benyamin Simeon Isakhar Zebulon Gad

²⁸Foma selatan fil kwenang Gad on en nim huli-hulimu etma re o Tamar en barat emberim fil en lahareg, ik Kades-Meriba eleruk busandoho etma, ai en foma barat apma fil de o Mesir huli en de huli Laut Tengah huli fam etma.

²⁹TUHAN Mun Leho wereg on ele uruk kwit, “Airoho neg kwenang ai it enunggul unuk Israel on yohwan esakiyuk” ulug hweag-nitsi.

³⁰ Sokole kota Yerusalem kuruk kwe re, abiranggere ebe nesanggo en yendeg latsi. Obahat ohwan eta ebe hundomog etma ilitdoho re dua setengah kilometer en, ne asokole humon de re henahan yendeg latsi. Sokole ebe hundomog etma unuk de it Israel enenggul unuk deg aleroho sokole misig heg fene soaleg latsi. Sokole utara fil unuk de Ruben, Yehuda, Lewi nim, soaleg latsi; sokole obahat timur fil on de unuk Yusuf, Benyamin, Dan nim soaleg latsi. Sokole selatan fil on unuk de, Simeon mel, Isakhar, Zebulon nim, enunuk soaleg latsi, sokole barat fil on de, Gad, Asyer, Naftali nim enunuk soaleg latsi.

³⁵Obahat abirangge ai yatdeg alere sembilan kilometer en. Ketia su huli en angge re kota ai unuk uruk kwit de, “TUHAN ETMA WEREG!” Uruk. 157