Read Ninia Yali YEHEZKIEL 5 Bible Online

YEHEZKIEL 5 - Ninia Yali bible

YEHEZKIEL 5

¹TUHAN ele uruk kwit, “Ap homi waratuk on su yei, karog olok on wamihin deg ai fam de horuk mel banisong mel, ai mun hohoboroho balin. Ai en horuk baleg anyo anggin ilit hauk angge fam ilit halug henahan minggiri feiyuk.

²Minggirig on etan kabog eke re haren kota ai bulmu etma o ai walinggik wamuhup on ahae fotog aruhumu yaluhun. Kabog bireneg foma eke re karok olok on anyo fam kota maseroho etma king kongdoho hwik esakiyuk. Kabog henahaneg ekere kolo kwe etlema del fol esahun mu, An nengkarog olok on fam kong heheg hwik esahuk.

³Horuk etma on dorangge lohon de hasum jubah siregma etma hetdoho hwelabe feiyuk.

⁴Ai en horuk etma on dorangge lohon oko indokma kwelabe feseluk indok nauk kweleg embeseiyug. Etma indok aire ap homi Israel on enebe da kete lahu” isi.

⁵TUHAN Mun leho wereg on en ele uruk kwit, “Fuhakin, su re o Yerusalem anyo. Kota su An den kwenangma indip anumu it negara-negara amu on aluluk kwe debelug ferihik.

⁶Famen Yerusalem en An nawene melaleg domako embeseswama, it ap unggul unuk amu on en siag duruk on etma maben hag deg kweleg it neg de alongdoho duruk on deg, ai en it negara enaluluk kwe maseroho wereg on etman holoho duruk eleg on de ha hag deg kweleg iren de mun nikdoho holoho duk fug angge wereg lit An nawene melaleg omano mel holoho duruk ale mel enerim deg” isi.

⁷TUHAN Mun Leho on ele uruk kwit, “Yerusalem yei, holin o! Hat wene An den melal-hapuk kahi on omano mel, diroho airoho duruk nu uruk kahi on omano mel fu deberuk kahen fug. Hat de mun alongdoho handuhun kwani duruk kwit de it enunggul unuk haluluk kwe wereg on etman de mabendoho duruk kweleg haren de alongdoho duruk kwit, it enunggul unuk etman eneitogdoho duruk ale omano muko neg duruk kahen.

⁸Ai fam An TUHAN Mun Leho welahi on, en uruk kwit hit An naselei on welahep ma hat it unggul unuk amu-amu on inil famen unggum og-huruhuk.

⁹Haren duruk kahen ale abirangge etmare an nerim boruk ale duruk kahenma, ap homi haren on fam de unggum mun nik on duruk kahi fug ale on mel, ne fobik oho airoho duhuk fug on og-hesahuk.

¹⁰ Enaknisi enesingasi en enonggwareg enomalik nauk kamuhup, ne enomaliki en de enonggwareg eneknisi enesingasi nauk kamuhup. Airoho An den it unggum og-hesahuk. Eneluk wereg on de di kwe su kwe An den muko del-fol esahuk.

¹¹Ande Allah noluk welahi on, TUHAN Mun Leho on, sure An nebe nele: Haren An nobam wirigmu emere feheg hat duruk kahen ale kwasik on mel, an nalitno boruk kahi on mel deheg, duruk kahenma re An den helaheg bouk fug angge en alberel habuhuk.

¹²Ap homi foma sepertiga re ouk amben siag on mel siburu obok mel o kota su fam aik waruhu on ai fam en mel mundoho waramuhup. Foma sepertiga re karog en o kota dag fil kong heheg enowaruhup. Ne foma sepertiga en de An den o unggut-unggut ilitdoho del-fol eseheg, karog seneko sik-mug esahuk.

¹³Hat de an nolok mun ilmu siag doho hobahakeg, suahal haroho hobam aheg, neg durukmen homo nobaharuk ale hahun. Airoho etma mundoho aruhumu neg de, haren an nobam dipdoho duk eleg angge duruk kahen fam an nolok hobam fohuk en an TUHAN en nele hweag-hutuk kahi on ai fahet demdoho bohun.

¹⁴Hat de o moluluk doho lahabeg on hag aruhunmu it enunggul unuk hat welahen kwe maseroho wereg on en enalitno hapuk kamuhup; ne ap homi kwe etma fam lauk on en de ohwal healug lauk kamuhup.

¹⁵An den hat bet hapuk kwit nolok en unggum og-hutukmu, enunggul unuk amu on abirangge haluluk kwe maseroho wereg on omano en heauk kwit, heimaldo hapuk kamuhup. It en hat enelitno hapuk kwit inil fu healug me enepe hapuk kamuhup.

¹⁶An den hat nauk angge fik fouk deberuk kahen on omano mundoho elehap debehuk deg ap homi obokdoho neg welamag ulug debesehuk. It ouk ai hauk kwit, obok de dog enggar kar on inilonggoma kwik lalug ouk hauk hag mel, ap enebe elehap enepuk mel hagdoho hahup.

¹⁷ Siburu obok ai neg fug famen de nin eke ouk amben siag on mondorik waheg, enolok en dog yapuk kwit, ap homi haren on elehapdoho fesehup ale mondorik waheg, mene olok on omano waharuk kwit, it enomaliki houm heg noag ulug mondorik waheg, duhuk. Ulug An TUHAN en mundoho nele ihi” isi.