Read Ninia Yali YEHEZKIEL 6 Bible Online

YEHEZKIEL 6 - Ninia Yali bible

YEHEZKIEL 6

¹TUHAN ele an hweag-nutuk kwit,

²“Hat ap homi waratuk on su yei, dom-dom Israel fene etma fu halug it enobahet unggum og esahuk ale hat hobam uruk kahi on au, haren it hweag-esakin.

³An TUHAN Mun leho welahi on nele holeheg funobahakeg, duruk kamag ulug haren it hweag-esauk kamin. Dom-dom mel, duk-duk mel, bule unggul-unggul etma, fanggong-fanggong etma mel hweag-esakin. Dikdemdoho An den fobik karog mondorik waruhukmu, kembu mot-duruk kwe etma lilibug dukwag ulug mondorik waruhuk.

⁴Waroho yal utuk angge obale mezbah omano mel, hilil-halal doho, lilibug lalabag doho feheg, amben angge yalduk kwe etma erapdoho feheg, ap humdoho etma wereg lamuhup on etma kembu olohotma etma enowareheg, duhupmu waramuhup.

⁵An den ap homi Israel on enebe wareg hesa kwe etma lin lan esahukdeg enowag de mezbah wirig on aluluk kwe etma kololog debesehuk.

⁶O kota Israel fam etma mudoho elehap debeseheg, mezbah mel kembu mel welelenggen doho deg-bog debeseheg, amben angge yaldukmu etma naleg-haleg debeseheg, duhuk. Ne iren di ale su ale duruk on etma re mundoho eleg aruhu.

⁷Di kwe su kwe etman ap mundoho warenebuhup, it eneluk lil amuhup on en An TUHAN Allah anyo eneluk amuhup.

⁸It on foma dorangge neg de warenepukmu etman enahap wendat enebuhuk famen de, it ap enenggul unuk domog enesahali kwe etma del fol esahuk;

⁹mu re etma it hwik enebuhukmu etma welamuhup. Ai en it en An fam ebet nabeheg, it enenda an nobam dipdoho duruk wereg fug en an den unggum og-eseheg, sebeloho feseheg, duhuk ale omano fu debeheg, duhup. Iren de An mundoho fotog neaswareg obalma kembu momal daswa. Ai duswama re iren kwasik ale deheg, me nape ale on deheg, duruk katswa on etma fahet it enonggwareg enebe me eneperoho[9] kumu hauk kamuhup.

¹⁰Ai fam de An TUHAN en ebetuk kamag ulug hweag-esawihik ale anyo re enebug we alemaroho isi fug ulug eneluk amuhup” isi.

¹¹TUHAN Mun Leho wereg on en uruk kwit, “Henenda hesilduk kamek o! Oba yi esauk kamek! Ioba yatuk kamek, aire it unggul unuk Israel on en siag humale duruhup on ai fahet. It fobik weim fam en nim siburu obog en nim ouk amben siag on en nim, waramuhup.

¹²It abirangge en An nolok hasimeg duruk ale ai eneluk amuhup. Ap homi yatma hwik enebuhuk on de ouk enobam atil lauk kwit waramuhup; me horogma wereg lamuhup on de sehen fam waramuhup, ne apuhuno wereg on de siburu obok en waramuhup.

¹³Enebe wareg anggere kembu sahali kwe mel mezbah sahali kwe mel, duk yaron fene etma ying beya eheg, dom yaron indip kwe etma mel, e humon indip apmane mel; we il horogdoho re iren kwe kembu obahet waroho yalduk kwe etma mel del fol deg lamuhup. Airoho duhupmu ap homi humdoho en Ande TUHAN ulug eneluk amuhup.

¹⁴Yu An nenggik biloho it enobam indip iren on siahap debehuk mu, lei selatan fam etman de utara fil o kota Ribla fam etma huli re ap eleg doho mun birim uhu. O ap homi Israel on wereg kwe etman misig ulug oho eke lili fohuk fug. Ai fam de ap homi abirangge en de An TUHAN anyo eneluk amuhup” isi.