Read Ninia Yali YEHEZKIEL 7 Bible Online

YEHEZKIEL 7 - Ninia Yali bible

YEHEZKIEL 7

¹TUHAN ele an nobam hweag-nutuk kwit,

²“Ap homi waratuk on su yei, An TUHAN Mun Leho welahi on en, kwenang Israel on su fam imin boruk kahi; Sure o su fam duruk ale ahae fotog atuk ai” isi.

³TUHAN ele uruk kwit, “Israel henap yaho yei, ketia hit henebe eleg atuk liem aha. Hat de An nolok anyo hahun. Hat de hobabut heimaldo ale duruk kahen on etma fahet an den ayo wiroho biling habuhuk.

⁴An den helaheg habeheg, mun elehap habeheg, duhuk fug. Haren heimaldo ale duruk kahen on etma fam de an den unggum og-huruhuk. Ai fam de An TUHAN anyo hat holuk aruhu” isi.

⁵Sure TUHAN Mun Leho wereg on en unggul unuk Israel fam hweag-esauk kwit, “Di anggin su anggin eke nim eke nim henobam aik waruhu.

⁶Ketia abirangge ahae fotog atuk mu, hit fahet welamuhup ale eke wereg fug.

⁷Yaho hit ap homi henunggul unuk kwenang su fam welahep on suma, hit fahet di ale su ale re mundoho ambiangma aik waha. Ketia re hiren o dom kwe en mezbah fam waroho yalduk kwit duruk kahep on etmano eke wereg fug, ite we naleg-haleg[10] ale neg duruk ale on wereg.

⁸We horog ketia eya fam neg an nolok mun nik aleroho hit henobam foruk ale hahup. Hit henobabut duruk ale higitdoho an den ayo wiroho biling henebuhuk. Hiren siag mun heimaldo ale duruk kahep on etma onggo an den henobam fohuk.

⁹An den hit fahet henelaheg beheg, fanoroho henobahakeg de duhuk fug. An den unggum og-hesahuk aire hit en siag naldo mireg ale etma duruk katuhup ale etma fahet onggo og-hesahuk. Ai fam de An nebe TUHAN welahi ale mel, ne an den hit unggum og-hesauk ale mel henoluk amuhup” ulug isi.

¹⁰Unggul unuk Israel on fahet anggin on enobam fohu sali horog aik waharuk. Enelok fam debeseruk ale re di kwe su kwe sahareg. Ne ap homi en winik-wonog uruk ale re mundoho anum-anum fam aik lahakeik.

¹¹Enolok humon duruk fam de, kwasik ale humdoho wereg atuk. It fam enenggik wereg on mel, it enabug bogdeg ale mel, leho wereg ale mel de mundoho eleg aruhumu obale welaruhu fug.

¹²Li fol-folo waharuk ne nukoho horog aik waharuk su! Allah unggum fesehu on aire ap homi abirangge enobam fesehumu re at onggo wauk on mel, onggo hundutuk on mel, it eke nim dopno doho di angge su angge hwelahup fug.

¹³Allah ahumu olok aire ap sa famen oho re enobam aik waruhumu re it onggo wil noruk enap di angge su angge atam it en onggo wauk katswa angge omano sombandoho eke hwelahup fug. Ap enolok on de lil amuhup fug.

¹⁴Trompet ele fureheg, ap fik-fouk deheg, duhup famen de Allah ahumu olok anyo re ap homi mundoho enobam aik waruhumu re, ap misig ulug oho eke weim yapukmu lahu fug.

¹⁵O kota kwebene kwe etma dog neg yapuk kamuhup, olekwe etma ouk amben siag on nim, siburu obok inim, welaruhu. Ap o kota dagma welamuhup on de sehen en waratuk kamuhup. Ne, kota ilonggoma welamuhup on de ouk amben siag on nim siburu obok nimen waratuk kamuhup.

¹⁶Foma lil amuhup deg heye domma lahakup, etman it suwe bel higitdeg donggo kwe en mug heg wilip enepukmu wereg hag; it enebe abirangge re enesiag dil ale fam de nenek duruk kamuhup.[11]

¹⁷Ap homi abirangge enenggik omamne eleg aruhureg, enelenggen elek duruk karuhu.

¹⁸It kain karung on belahwi sum enebene wanduhup deg, it enebe abirangge fam elek-elek angge duruk kamuhup. It enunggul de enoruk enunggul ahap neg debelug weregma it enenggaliap enebuhup.

¹⁹Emas mel perak mel iren hwik esahup mu kobokwema ahap angge hag kabog deg laruhu. Aire nukoho TUHAN en on fam olok enobam feseruk salim aire it enangge emas, perak mel etman it enahap wendat-enebuhu fug, ahamdoho re it enonggwareg enesiag fam mondoko kwelabe fesehu. Iren de enenda ahe laharuk on homo dobahat daul ulug mel, ne enahumu homoroho naul ulug mel, hwelahup fug.

²⁰Endam de it anangge permata orohole ebe on weregma enawonog atuk katswa, famen de iren enanggembu heimaldo on etmano wit dakoho no etma fam wutsama re, TUHAN en it enangge etma re mun namelmel angge hag debehu.

²¹TUHAN ele unggul unuk Israel on hweag-esauk kwit, “An den hit ap bohon en del heg og-heneplug loag ulug nil fohuk. Ap siag kwasik duruk on en hit henangge etma del dalug emere fesehup.

²²An nobam wirig anyo ap huhul hwelauk on en siaho feheg, emere feheg, durukmu an den diroho suroho lohon duhuk fug.

²³O kwenang abirangge etma fam naleg-haleg[12] aruhu, di kwe su kwe ap wareheg, enolok fam debeseheg, duruk ale neg welaruhu.

²⁴Ap unggul unuk angge enolok humon de hit henobam wirigmu etma ik kwik wamag ulug an den mon-enebik waruhuk. It ap enunggul unuk etman hiren wene kabog duruk kahepma omano mun luluhun durukmu re ap hiron mun ambol-bol naha on famen oho re enoag elek duhup.

²⁵It de enobam si eheg, enehummu siag on enobam aheg, duhumu re enenda se on amag ulug heraruhup famen de iren hweag-dahup fug.

²⁶Di anggin su anggin mel wene siag on mel hundig hundig waharukmu, hiren nabi fam fobik di aruhu ulug uruk on omano mel hein og-enebuhup famen, it oho duk fug ale deg lamuhup. Ne imam en ap homi fam hweag-esa ale on oho eleg neg, ne ap melal-enepuk on oho re it enawene komo eleg aheg duhup.

²⁷Raja fobik oba yareheg, at amloho oho enda si eheg, ne ap homi oho re enakol en enoag elek deheg, duhup. Hiren ap homi amu on enawene baloho ayo wutuk kahep hag, an den oho re hit henobabut duruk aleroho unggum og-heseheg, henawene baloho ayo wit-henebeheg duhuk. Ai fam de hiren An TUHAN welahi ale anyo henoluk amuhup isi.”