Read Ninia Yali YEHEZKIEL 8 Bible Online

YEHEZKIEL 8 - Ninia Yali bible

YEHEZKIEL 8

¹Tanggal lima bigalem folfalik on fam, tahun oho folfalik on fam nit hwik-nenepswama wereg kweleg ap Yahudi on hwik-nenebik wahaswa on omano enowesi melal-enepuk on an nobam nakit wahaswareg ninim hwerieg welatswa. Airoho weregma fetagdoho etano TUHAN Mun Leho wereg on omamne an nobam atsi.

² Airoho atsimu re an nil lahaboho fu haukmen de, ap higit angge eke weregma hawihik. Haukmen de obahare famen kongdoho apma fil de indok hag deg latsi, ne obahare fam en kongdoho emberim fil de no perunggu on seng deberukmu amulit helag-felag angge duruk hag deg latsi.

³Aren enggik hag angge fam eke angge bil hauk kwit, waharuk katsireg an nunggulmu bal hauk kweleg, na hag hawihik on ai fam an Allah Aheime en og-naplug koloma yatdoho nobahaik lahasireg de og-naplug de o Yerusalem TUHAN Obam wirigmu, ambe lilimol ilonggoma wirig on fam kwik laukmu sokolma il utara fil etano nobahaik lasi. Ne etare kembu ahut wirig on Allah olok-ap kwelapuk on anyo wereg latsi.

⁴ Etano wereg lit kumu degman de seleg Allah Israel on enekni ai en atam Ik Kebar aegman hawihik anyo hagdoho Allah ininim wereg ale anyo enegdoho ulug enam atukmu hawihik.

⁵Airoho hawihikmen Allah ele hweag-nutuk kwit, “Ap homi waratuk on su yei, hil utara fil etma halukwe endenoho fu hakin.” Isi mu an aren hweag-nitsi aleroho kobokwe kwik lauk mu mezbah foma fil etare kembu Allah olok-ap kwelapuk on anyo wereg latsi.

⁶Allah ele an nobam hweag-nutuk kwit, “Ap homi waratuk on su yei, hat hil fam de nunggwangge atukmu hehen? Ap Israel on en naldo baldo ale duruk fam An nebe nobam wirigmu en yarapdoho nobaharuk angge etma furoho kumu hakin! Ma, fobik an den hat hobam wene mun heimaldo on omano unug hirikoho lahi” isi.

⁷Ai isimu an anyo og-naplug de sokole o ambe lilimol dagma on fam wilibik lauk on fam og-naplug lasireg de fak lehet ai fam yendeg eke fololeg angge anyo hoag ulug unug hasi.

⁸Ele hweag-nutuk kwit, “Ap homi waratuk on su yei, yendeg su hum-ap din” isimu an den airoho deberihik deg durukmen de sok misig eke weregma hawihik.

⁹Airoho hawihikmen ele an nobam uruk kwit, “Sok ele ai fene kwik lag, kwik lalug de iren naldo baldo ale etma duruk ale kumu hakiuk” isi.

¹⁰Ai isimu re an anyo kwik lawihik deg hauk mende, obahat fene walinggoho etmare kisu di on su on ilit angge mel, oluk-oluk angge saliog angge[13] on mel omano humdoho ilit deg latsi, ai en eke kembu ap homi Israel on en apne wauk on orohole ahamdeg fahamdeg etma ilit deg latsi.

¹¹Airoho degma re ap homi Israel on enowesi melal-enepuk on enebe tujuh puluh en etma welatswa, etare hun Safan amloho Yaazanya anyo et welatswa. Wereg lit enebe domog en de amben fano angge yaldukmu hobu lahabe foruk angge seneg latswa.

¹²Allah en an nobam uruk kwit, “Ap homi waratuk on su yei, ap homi Israel on melal-enepuk on en ling-long duruk ale etma hil hehen a? Iren de an o kwenang su fam embeselug wilipsi, ne iren duruk ale etma an den enesauk fug boruk kwit de iren ambe kembu en neg hoporeg on ai fam obahet duruk on etma hil esehen a?” Ulug isi.

¹³Ai en TUHAN ele eke an nobam hweag-nutuk kwit, “Hat fobik hil it wene mun heimaldo ale eke durukmu esamihin” isi.

¹⁴Airoho isireg de An og-naplug sokole TUHAN obam utara fil on anyo fam lasireg unug-nitsimu haukmen de etma homi humdoho Dewa Tamus[14] wareg fahet oba yatuk katswa.

¹⁵TUHAN ele an nobam uruk kwit, “Ap homi waratuk on su yei, hat wene ai hil hehen a? Humdoho eke inim heimaldo ale duruk on etma wereg” isi.

¹⁶Airoho isireg an og-naplug TUHAN obam wirig mu lasireg, sok o ambe mun amu eneg on wirigmu kuruk on horogma, mezbah wirig on dulug hug ele eke dulug eta ap enebe dua puluh lima en weregma lasi. It enebere ambe mun amu eneg on anyo enambol yihik lit de enalukwe mo lahabik waharuk on fam timur fil etma enorole belabeg sahaun duruk kwit apne wauk katswa.

¹⁷TUHAN ele an hweag-nutuk kwit, “Ap homi waratuk on su yei, ai duruk ale ai hauk kahen a? Ap Yehuda on su it siag mun heimaldo ale duruk kwit ap homi fam enenda esa fug angge duruk on eta fam de enobam homo debeseruk fug. Iren de abirangge etma an nobam wirigmu suman duruk fam de an nolok-ap ekenim kwelabe nobaharuk. Iren mun heimaldo[15] ale etma duruk kwit an sebeloho nobaharuk angge furin!

¹⁸It de An nolok nik aleroho enepukmu hahup! An den fobik enelaheg beheg, enasiag napeleg-ap debeheg duhuk on eke wereg fug. Iren somban fam hwiroho hweag-numuhup famen de, deg kweleg an nesanggo holuhuk fug!” isi.