Read Ninia Yali YEHEZKIEL 9 Bible Online

YEHEZKIEL 9 - Ninia Yali bible

YEHEZKIEL 9

¹Ai debelug an den hol hauk men de Allah en hwiruruk kwit, “Hit ap unggum An den on walug kota su fam wamuhup on omano suma manik o. Waharuk kwit de henesehen etmano hwelalug manik o” uruk katsi.

²Airoho isimu ambine neg ap folfalik en angge enesehen haroho sokole TUHAN Obam wirigmu en utara fil etma dag filen kwik waharuk katswa. Airoho waharukmu it nim de ap eke asum il sako angge linen on wan deg angge eke nim waharuk kwit de lisu balduk angge enggikmu seneko waharuk katsi. It omano kwik wahaswareg de no mezbah perunggu on fam wirigmu etano unduhuk latswa.

³Ai en Allah Israel on ininim wereg ale anyo ambogbag helag-felag angge no kerub [16] omano fam en disimen de seleg anyo obale weregma etano en hihiloho re o TUHAN Obam kwik laukmu sokole fam etano lauk katsi. Airoho laukmu re TUHAN en ap asum linen on wan deg on anyo wol-disireg hweag-utuk kwit,

⁴ “Lamihindeg, o kota au fam en enobabut heimaldo ale mundoho duruk katswa fam, ap homi enenda hesiloho siagmiroho wereg on etma enekit o kota unggut ilitdoho lalug de eneg ale debeseik lakiuk” ulug hweag-utuk katsi.

⁵An holduk men Allah ele ap enemu on eke enobam uruk kwit, “Hit at ombolim laluhupdeg de o kota ai unggut ilitdoho etma ap homi enebe domog enelaheg bouk fug angge mundoho enowariyuk.

⁶Hiren de ap on homi on, lohon doron, sauwe on sobal on et, enowaruhup. Famen de it ap homi enelahama eneg ale deg on etma misig ulug oho eke bal hahup fug. Indip An Nobam wirigmu suman indip diek” ulug hweag-esasi mu re it eneyabuk anyo indip duruk kwit de ap Israel on enowesi melal-enepuk on o TUHAN Obam wirigmu welatswa on etano dam enowatswa.

⁷Allah ele it enobam uruk kwit, “An nobam wirig su emere feseyek! Oluluk kwe re ap wareg en hopo ukwag dohore, indip diek” isi. Ai isimu re it omano en ap homi o kota fene[17] enowatuk ale indip dusa.

⁸Ap homi airoho sen heg warenepukmu aire an etma namu neg welatihik. Airoho wereg lit an norohole belabeg kwenangma sahaun doho nele uruk kwit, “TUHAN Mun Leho welahen on, nakni, haren airoho holok en ap homi Israel on ando enoluk o Yerusalem wereg on omano enowatuk katmihin a?” Ulug hweag-itihik.

⁹Airoho irihikmen Allah en onggo uruk kwit, “Ap homi Israel on mel Yehuda on mel de siag mun humon duruk katswa. Iren di kwe su kwe ap wat-enepuk kwit o Yerusalem su mundoho sing-ap debeswa. Iren uruk kwit An TUHAN en o kwenang su embesesireg niren duruk kahe on omano il hauk eleg uruk.

¹⁰Mu re An den it fam enelaheg oho enebuhuk fug. An den it enobam debehuk ale etare iren oho ap amu on fam deberuk katswa aleroho debeseruk karuhuk” isi.

¹¹Ai en de ap sum linen on labulig on anyo watlug TUHAN fam hweag-irik waharuk kwit, diroho hweag-utswa, “TUHAN en diroho diuk airoho diuk ehen ale anyo mundoho aha” ulug uruk katswa.