Read Ninia Yali DANIEL 1 Bible Online

DANIEL 1 - Ninia Yali bible

DANIEL 1

¹ Raja Yoyakim ap homi Yehuda on tahun henahan melal-enepuk kwit wereg ma, raja Babilonia on hun Nebukadnezar anyo lebagdeg o Yerusalem lat-enebik lebag.

² Airoho debag ma Tuhan en Nebukadnezar ai en Raja Yoyakim along elehapdoho folug, di angge su angge onggo hum angge TUHAN Obam wirigmu welatfag on etmano huhul hwealowag ulug hweag-esebag. Ai ebag ma re ap homi enebe mel waroho og-eneplug waharuk kwit de enangge di angge su angge humdoho huhul webag on etmano walug watfagdeg, at anggembu obam wirigmu etmano febag.

³Airoho febagdeg, ap eke at raja obam etma yabuk duruk katfag on fahet enowe welatfag on unuk Aspenas ai fam uruk kwit de, “Ap homi enunggul unuk Israel on sabu het eneplug lebag on etman, ap sauwe on, enebe it raja enambiangma en ondoho on mel, ap enunuk bogdeg en ondoho on mel, eke momal-enebin.

⁴Momal-enepuk kwit de enebe mun fano halug, di angge su angge enoluk furebouk alereg on halug mel, sekolah yatdoho watsi on halug mel, yabuk an nobam duruk kam ale higit on mel, enenda hebeleg on mel, halug momal-enebiyug. Momal-eneplug de nit ap homi Babel on nenele hweag-eseheg, nenele fam baleg on mamul-enebeheg, duruk kamuk,” ulug hweag-etfag.

⁵Raja en airoho ebagdeg eke uruk kwit de, “It enesiburu mel, enahaik mel de, an nahain elekwe on fahet og-nesauk kahep ai hag og-esauk kwit, tahun henahan fam airoho mundoho hweag-esahundeg de, yabuk an nobam olma duruk kamuhup en og-eneplug manu,” ulug hweag-etfag.

⁶Airoho ebag ma re omalik Yehuda on foma momal-enepfag. Ne, it etare Daniel ha, Hananya ha, Misael ha, Azarya ha, eta.

⁷It omalik eta airoho momal-enepfagdeg de enunuk keron soal-enepuk kwit de, Daniel unuk de Beltsazar soaleheg, Hananya unuk Sadrakh soaleheg, Misael unuk Mesakh soaleheg, Azarya unuk Abednego soaleheg, debag.

⁸Airoho soal-enepfag ma weregman de Allah en raja autsi enowe anyo obabut de Daniel endarulug enda hundig welamag ulug debebag. Airoho debebag ma wereg lit de at Daniel en endaman de, “Hun raja asiburu mel ahaik anggur ahaik mel, nauk on etma nalug, nebe siaho fahat-dauk kahi hano, nerim. An nauk karuhuk fug,” ulug ai bebagdeg hun raja autsi enowe anyo fam uruk kwit de, “An siburu mel ik mel etma on nalug nebe siahapdoho fahat dihi hano re, we on og-nutuk kamuk,” ulug hweag-etfag.

¹⁰Airoho hweag-etfag famen de, at Aspenas en hun raja fam akol en de mel ebag, “It enesiburu mel enahaik mel diroho og-esauk kamuk ulug raja ebe en hweag-nitsi mu re, airoho dihi ha fug alereg. Hit aireg on neg nauk kamuhupmen de at raja en de, ap sauwe fomane enebe fano deg kweleg, it Daniel mel neg de enebe dot-dot kuruk etma re nunggwelug, ulug an nebe hiren dila ale famen nanggolop baloho noaruhu,” ulug hweag-etfag.

¹¹Ai ebag ma, ap eke it Daniel ori mel enebe henahan etano hwal-enepuk kamag ulug at Aspenas en unduhuk febag on anyo wene ai fahet uruk katfagdeg diroho hweag-etfag,

¹²“Nenobabut baluhun en de nenenggik num en eta fam de siburu mel, yerum mel, ik mel we on neg nauk kamag ulug og-nesauk kamuk.

¹³Airoho og-nesauk men neg nenenggik num en welamuhukdeg, it omalik fomane siburu raja nauk ale higitdoho og-esaukmu nauk kamuhup on etma nim hil kumu nesahun. Airoho kumu nesahunmen deg lamuhuk ale ai nesahundeg neg de diroho dimin ulug bohun,” ulug hweag-etfag.

¹⁴Airoho hweag-etfag ma re ap it Daniel mel hwal-enepuk katfag on anyo en de, “Fano,” ulug ebagdeg enobabut baloho ulug enenggik num en welatfag.

¹⁵Airoho welatfagdeg kumu esauk men de it Daniel ori nim anyo re enebe buhun-bahan deg lit enomamne wereg latfag, famen de omalik fomane raja asiburu nauk ale higitdoho nauk katfag on etmano re enebe sabu atuk mu esebag.

¹⁶Airoho esebagdeg it Daniel mel hwal-enepuk katfag on anyo en de, raja en siburu mel ik anggur ahalue mel, og-esauk kamag ulug ebag higitdoho og-esa fug angge, we siburu mel yerum mel, ik mel we on neg og-esauk katfag.

¹⁷Airoho og-esauk kweleg Allah en de omalik ohwan etano fam di wene su wene lisu baleg on enoluk aheg, enenda mun wereg on aheg, dukwag ulug debesebagdeg, at Daniel neg de ena hauk on mel, inil oluk wereg lit ena hagdoho hauk on mel fahet diroho fahet ulug selegdoho hweag-esauk kamag ulug og-etfag.

¹⁸It airoho debesebag ma wereg kweleg atam at raja en uruk kwit, “Tahun henahan wereg lit di wene su wene mamul-enebiyug,’ ulug ebag higitdoho re mundoho mamul-enepfagdeg, at Aspenas en de it ap omalik etmano abit og-eneplug hun Raja Nebukadnezar akit lebag.

¹⁹Airoho og-eneplug lebag ma at raja en de it omalik etmano nim wene matuk kwit enobabut balduk men de, it omalik on fomane re dot hareg latfag famen, it Daniel ha, Hananya ha, Misael ha, Azarya ha neg de enenda mundoho hebeleg lit di wene su wene amu on oho mun enoluk neg deg latfag ma esebagdeg de, yabuk at raja obam olma etma duruk kamag ulug hweag-esebag.

²⁰Airoho hweag-esebag ma yabuk duruk wereg kweleg, at raja en di wene su wene obam atuk mu, “Airoho diroho aruhu on fahet aha” eheg, fureboukwag ulug senggegdoho hweag-ereheg, dukwag ulug at autsi di o su o at apma wereg lit yabuk duruk katfag on etmano mundoho en hweag-nomag ulug hweag-esauk katfag-domog etmano en onggo hweag-utuk mu enobabut balduk katfag famen de, it ap fobik aruhu ale ulug hweag-esauk katfag on mel, ap hwal ahun en di ale su ale mun nik ale duruk katfag on mel, onggo hweag-utuk katfag on etma re horog hareg latfag. Famen de it Daniel ori nim neg de enenda mun hebeleg wereg lit, di wene su wene mundoho enoluk deg wereg lit hweag-utuk katfag on ai neg de mundoho demdoho on neg hweag-utuk mu hauk katfag.

²¹Airoho duruk kwit welatfagdeg en at Daniel neg de yabuk hun raja obam olma etmano duruk kwit weregman neg de hun Raja Koresy obam Persia on anyo en ap homi Babel on sebeloho at apma febag huli etma duruk katfag.