Read Ninia Yali DANIEL 10 Bible Online

DANIEL 10 - Ninia Yali bible

DANIEL 10

¹Hun Koresy ap homi Persia on fahet raja inatfagdeg melal-enepuk weregman neg de tahun henahaneg on wereg kweleg wene eke at Daniel unuk eke Beltsazar anyo fam hweag-etfag. Wene ai ebe demdoho famen, ebe di fahet ulug furoho furebouk fug on[19] hweag-etfag. Airoho hweag-etfag ma at Daniel en ai ebe keroho fahet ulug furebemin ulug duruk men de, wene ebag on anyo fahet ebe diroho fahet ulug Daniel a og-hauk hag fam hweag-utuk mu hebag.

²Eta li em de an Daniel minggu henahan hoporoho fong waroho welatihik.

³Airoho wereg li em etare an nebe nauk angge unduk ebe on mel, ne ino angge mel nenggeg, anggur ahaik mel nenggeg, ne noruk feyaleheg, dirihik fug.

⁴Tahun ai fam bigalem keram on tanggal 24 wereg kweleg de an nebe Ik Tigris hum ahaik ai aegma unduhuk latihik.

⁵ Airoho unduhuk lit nalukwe lahabohoman de ap misig eke asum de hekel lenan il sako on fam yihig angge wandeg ma ombahaluk de emas ebe on fam bug deg angge hauihik.

⁶Ebe fam en de ombagbag de no permata ombagbag hag durukmu, ne orohole re oweal hag deg laheg, ne il de indok hagdoho yeg deheg duruk katsi. Enggik mel eyog mel de no tembaga asilong oho on hag helag-felag angge deheg, ne ele re ap homi humdoho enele urukmu hag eheg duruk katsi.

⁷Airoho deg ma an namu en neg na og-hauk hag fam ai hauihik. Ne, ap homi an ninim welatswa on en de inil hausa fug famen de it enebe enakol en heye laswareg herag aik lausa.

⁸An namu neg etano lin neausa ma re an na og-hauk hag fam hauihik on mun youk la aleroho on anyo fureberuk katihik. Famen de an nebe furoho hambuk da fug aleroho atihikdeg norohole mun uaroho atihik.

⁹Airoho deg lit ele uruk on nesanggo holdihikdeg an nebe nape moroho norohole belabeg kwenangma sungguk-manggukdoho ying-atihik.

¹⁰Airoho atihikmen de enggik eke en an sen-neasimu re an nebe anyo nape enggat dauihikdeg nenggik mel nelenggen mel dimirebelug inatihik.

¹¹Airoho inatihik mu malaikat anyo en an nobam uruk kwit, “Daniel, hat de Allah en enda hundig hapuk. Anggere hebe enggat dalug inatmihin deg de an den nele imin on su fanoroho holin. An de hat hakit wamag ulug mon-nabik waha” ulug hweag-nitsi. Airoho hweag-nutuk kweleg etano an nebe nowag elek-elek anggeril inatihik.

¹²Airoho inatihikmen aren an nobam uruk kwit, “Daniel, hakol duk fug. Haren nukoho keram on anyo fam honggwareg en sebele fahat dalug henda wenggeleg on atmin ulug duruk kwit somban irihin on anyo re Allah mundoho esanggo holsi. Ne, an de haren somban irihin on anyo onggo wahi ai.

¹³ Malaikat o Persia along baloho wereg on anyo en nukoho 21 en eta fam an nalong elehapdoho femin ulug disi. Airoho disimen de it malaikat melal-enepuk on en misig eke unuk Mikhael anyo en an let-nabik wahasi. Ne, at ebere an den o Persia etma folug wahi.

¹⁴Haren ena og-hauk hag fam hehen on aire nukoho alukwema fil etma aruhu ale fahet hehen. Ne, ande ap homi hat hunggul unuk on fam fobik keroho aruhu ulug hat fureboukwag ulug wahi,” ulug hweag-nitsi.

¹⁵Airoho ulug aren an hweag-nutuk kweleg anyo re an norohole wambo irihikdeg nele uk fug aleroho atihik.

¹⁶Airoho atihikmen fobik en malaikat ebe ap higit angge anyo en enggik biloho nambilikmu bal hasi. Airoho disimu an den at fam uruk kwit, “Nakni an de na og-hauk hagdoho hauihik on ai en nobam anggin kwelabe nobahasimu re nobabe eleg atihik ai.

¹⁷An den ap enamingming angge en enaknisi enelohotma unduhuk hagdoho deg lahi. Mu re an den nakni hat hobam nele keroho ihi ha alereg? Nomamne mundoho eleg ahareg, sat neg ahi angge” ulug irihik.

¹⁸Airoho irihik mu aren nikangge an nebe bal-neasimu an nomamne atuk mu hauihik.

¹⁹Airoho atihikmen aren an nobam uruk kwit, “Allah en hat enda hundig hapuk. Anggere hat henda si eheg, hakol aheg, duk fug, ketia folo homamne amin!” ulug hweag-nitsi. Aren ele airoho uruk kweleg etano re an nebe eke nim nomamne atuk mu hauihikdeg an den uruk kwit, “Nakni haren an nomamneap eke nim kwelabe nobahaken, anggere nakni haren hele imin behen on aire in” ulug hweag-itihik.

²⁰Airoho irihikmen aren onggo uruk kwit, “Hat nebe hat hakit wahi ale aire ebe diroho fahet waha ulug hat de holuk deg a? Aire Buku Demdoho on anyo fam baleg ale fahet hweag-hitmin ulug wahi. Mu, ketiare an nikangge sombandoho re malaikat o Persia along baloho wereg on[20] ai nim weim yapmin en lamin. Airoho lil lauk em neg de malaikat it Yunani fam enalong baloho wereg on watmisi. Amu on eke en an let-nabuk fug alereg, we at Mikhael it Israel on, negara hiren on fam along baloho wereg on ai en neg let-nabuk alereg,” ulug hweag-nitsi.