Read Ninia Yali DANIEL 12 Bible Online

DANIEL 12 - Ninia Yali bible

DANIEL 12

¹ Airoho hweag-nitsireg Malaikat sum lenan on wandeg on anyo en nikangge ele uruk kwit, “Nukoho ai salim de at Mikhael Malaikat humon hat hunggul unuk on kahal-henusug wereg on ai enam aik waruhu. Ai en de li eke anggin-fanggin humon hahup li atam ap enunggul unuk di ap su ap wereg li oho hausa fug on welaruhu. Famen de ap homi hat hunggul unuk on mundoho enunuk buku Allah en on fam lisu baleg wereg on etma re enahap wendar-enebuhu.

² Ne, it enesahalimu en ap homi humdoho waratswa on etma nikangge enoluk inamuhup; inamuhupmu re fomane re enoluk mundoho-mundoho on anyo hauk kwit welamuhup, ne fomane re anggolo humon nenek duruk kwit mundoho-mundoho welamuhup neg.

³Ap homi melal-enepuk on enenda wenggeleg on etma re o bohol fam ombagbag wereg ai hag seleg ombagbag duruk kamuhup. Ne, it eke en fano on deheg, dipdoho on neg deheg, duruk kamag ulug mamul-enepuk katswa on etma re sohwalanggen hagdoho mundoho enaseleg duruk kwit neg welamuhup,” ulug hweag-nitsi.

⁴ Airoho hweag-nitsireg malaikat anyo en eke hweag-nutuk kwit, “Daniel, buku fisela duk eleg angge weregman neg o ahae fotog aruhu anggere, ketia hwililip debelug de ahulue somug hag angge fam ware folug eneg aleroho fein. Ap homi humdoho en de di on su on atuk ale etma fahet fureboul ulug bilinguruk kamuhup. Famen de iren duruk kamuhup on aire we alemaroho neg duruk kamuhup,” ulug hweag-nitsi.

⁵Airoho hweag-nitsimen de an den ap biren on wereg ma esauihik. An esauk men de ap eke re ik elan suma fil unduhuk latsi, ne ap ekere ik elan etlema fil unduhuk latsi.

⁶Airoho unduhuk lit, at eke en de at eke ik eleruk fil horogdoho unduhuk latsi on anyo fam hein og-hauk kwit, “Fulu bolan ale atuk on oma re nangginig li em ambiang kobog ik lahu?” Ulug hein og-hauk katsi.

⁷ Airoho hein og-haukmu an hol-hauk men de malaikat anyo enggik boholma lahabe foruk kwit Allah oluk mundoho wereg on anyo unuk fam hombuk balduk kwit diroho uruk katsi, “Airoho atuk on etma re duruk kwit weregman neg tiga setengah tahun duhu. Ne, ap homi Allah omaliki on enobam anggin-fanggin feseruk kamuhup on etma mundoho ambiangma aik lahumu neg de di on su on mun fulu bolan ale ale atuk on etma oho fotog aik lahu,” uruk katsi.

⁸Airoho uruk katsi mu abirangge uruk on etma an den hol hauihik famen de ebe diroho fahet uruk ulug an fureberihik fug. Airoho dirihikdeg an den hein og-hauk kwit, “Nakni, abirangge etma re keroho ambiangma fotog aik lahu?” Ulug hein og-hauihik.

⁹Hein og-hauihikmen aren onggo uruk kwit, “Daniel, wene su on de o ahae fotog ik waharuk eleg kweleg etare heraho laruhu anggere ketia lakin.

¹⁰ Ap homi humdoho re enabut baleheg, ebeapdoho feheg duhu. Ap homi siag neg duruk on de siag neg deheg, duruk kamuhup; we it enenda wenggeleg on neg de ebe diroho fahet ulug furebehup.

¹¹ Wam di angge su angge folug nukoho hundig-hundig Allah og-utuk ale bale-fousa huli anyo en angge eke mun namelmel on enolok mun siag[26] on uruk on anyo unduhuk fousa huli ai re nukoho 1.290 en baloho lahu.

¹²Ne, it eke dipdoho neg duruk kwit weregman neg nukoho 1.335 on ai huli aik lahup on etma re enahayeg boruk kamag.

¹³Hat Daniel de dipdoho neg duruk kwit weregman o ahae fotog huli aik lakiyug. Hat hebe re wararuhun, famen de o ahae fotog salim de onggo hwelahun en holuk inaruhun,” ulug hweag-nitsi. 1