Read Ninia Yali DANIEL 4 Bible Online

DANIEL 4 - Ninia Yali bible

DANIEL 4

¹Raja Nebukadnezar en wene unduhuk febagdeg ap homi enunggul unuk enap mel, di enap su enap mel, o kwenangma enele amu-amu on wereg kwe mel monde febag on de su: “Nori-nerekwi henenda seroho!

²An den de Allah Mun Leho wereg on anyo en an nobam nik aleroho mel, along duk fug on mel disi ale fahet dindilmin.

³Aren along duk fug on aire mun humdeg! Ne, nik aleroho disi on aire mun ha fug deg! Allah ebere mundoho-mundoho fahet raja inaruhu, At de li mundoho-mundoho fahet along wereg on welaruhu,” ulug ebag.

⁴An nebere nobam welahimu etmano nenda seroho wereg lit nangge eberoho neg wereg ma welatihik.

⁵Famen hup misig fam an nohoruk kwit na og-heheg, ne na fam hag nil heheg dirihik deg we an nebe lilipna nabuk alereg on etmano neg hauihik.

⁶Airoho hauihikdeg an den ap enoluk enggat on o Babel fam etma wereg on etmano watlug na wauihik on anyo fahet ebe enamegdoho hweag-nirik wamag ulug enayonggo ferihik.

⁷Famen ap hwalenap mel, enambol fam angge mel, di ale su ale duruk ale enoluk enap mel, ne sohwalanggen awene enoluk deg enap mel etmano wahausa ma an den na og-hauihik ale anyo dindil esauihik famen ap misig en oho, ai ebe diroho fahet hauihin ulug enegdoho hweag-nitsi fug.

⁸Airoho duswa ma weregman fobik en at Daniel unuk eke Beltsazar an nanggembu dewa unuk higitdoho soaleg on anyo wahasi. Daniel ebere dewa [3] enamu eneg on omano enaheime en obam louk deg latsi. Airoho deg ma an den at obam an na og-hauihik ale anyo oho dindil itihik. An den dindil utuk kwit,

⁹“Beltsazar it ap di ale su ale enoluk deg enap melal-enepuk on welahen hahun ao, hat hebere dewa [4] enaheime amu eneg on etmano hendama hoporeg lahenma, di on su on etma re heraho ale eke wereg fug ale aire an noluk deg. Ma re an den na og-hauihik ale fahet dindilduk kahi ale su holug de ebe diroho fahet ulug enamoho hweag-nimin.

¹⁰An nebe nohoruk kwit na og-hauk men[5] de, e eke o kwenang bik-bulmu wilibig latsi.

¹¹E aire ebe yit-yaron; obahare re humdeg lit omamnereg ma ap homi o kwenangma wereg on abirangge en inil hauk kam alereg latsi.

¹²Enggela mundoho ket deg ma anggen humdoho yihig mu ap homi kwenangma wereg on de enebe ilitdoho na alereg latsi. Di angge su angge maro on de e anyo apma faraik waharukmu, suwe en de enggik fene etmano ena wit-dauk katswa. Ne, di on su on enoluk wereg on de e ai anggen nauk kam alereg latswa.

¹³Airoho deg ma hihireg, an hihi ale anyo fahet meneni yatdoho wenggelduk men, malaikat misig eke bohol fam en wambik waharuk kaha; at ebere obam lik-louk deg lit ape hebel-febeldoho deg latsi.

¹⁴Aren ele hwiroho uruk kwit, ‘E ai muhuk folug enggik baloho-baloho feheg, ne enggelare mundoho lol-eseheg, ne anggen de kwenang kwe del-fol eseheg. Ne, di on su on enoluk wereg angge apma faraik waharuk on mel suwe ena e enggik fene wutuk on mel etma sil-eseheg diek.

¹⁵Airoho duluhup famen e ai erat neg kwenang elma welamag ulug embeseiyug. Bosiemanggen yihig fam mel tembaga on fam mel het-debelug de enggela leimu etma embeseiyug. Airoho debeluhupmu re at ebe lil en wareheg, enoluk wereg angge nim welaheg, oluk wilibig angge nim welaheg, dukwag.

¹⁶Ne, ap homi enda wenggelduk on at obam wereg on aire ahamdoho re mene en wenggelduk hagdoho neg degman tahun sabiren dukwag.

¹⁷Aire nit malaikat kahaleg wereg lit fik-fouk deg lahe on ehe alere ai. Niren airoho ehe aire ap homi di kwe su kwe wereg lit etma Allah Mun Leho wereg on aire ap homi raja unduhuk wereg lit melal-enepukmu etma along wereg on, ne kerajaan aire ap Aren momaloho foruk on fam og-esa alereg, ne ap duk fug alereg boruk on fam famen oho og-om alereg ulug fag-dukwag ulug ehe,’ uruk katsi.

¹⁸Beltsazar ao, an den na og-hihi alere ai. Anggere ketiare haren ebe diroho fahet wehen ulug hweag-nimin. Ap homi kerajaan an den on au fam enenda wenggeleg on mel, di ale su ale enoluk on mel etma misig en oho eke uk fug alereg, famen we hat neg de dewa [6] amu eneg on enaheime hobam wereg ma ehen ha alereg,” ulug hweag-etfag.

¹⁹Airoho hweag-etfag ma holfagdeg, Daniel unuk eke Beltsazar uruk katfag on anyo youk lebagdeg il misig hagdoho etano ahum firoho welatfag. Airoho wereg ma an Raja Nebukadnezar en at fam uruk kwit, “Beltsazar, hat de an na wihi on ai fahet mel, ebe diroho aruhu ale fahet ulug ai mel fahet hat hahum fituk eleg,” ulug hweag-itihik. Airoho irihik mu at Beltsazar en onggo uruk kwit, “Nakni o, di ale su ale aruhu ale fahet hauihin aire it nakni haselei on fam alep aire fano hat hobam atuk alere fug.

²⁰E nakni haren hehen aire mun yit-yaron deg ma ambiang en de bohol huli fam deg ma, ap homi o kwenangma wereg on abirangge en oho inil fu hauk.

²¹Enggela oluk wereg ne anggen ohore humdoho yihig mu re ap homi kwenangma wereg on fam nowag ulug de ilitdoho og-esa alereg. Di on su on enoluk wereg angge etmano re e ai apma faraik waharuk ne di suwe su suwe re e enggikmu ena wit-dauk.

²²Nakni, e yit-yatdoho wilibigmu omamnereg ahan aire nakni hat hebe fahet. Nakni hat hunuk de bogdoho neg bohol huli etma deg ne nakni hat halong welahen alere saharoho re o ambiang-ambiang etma fam deg lahen.

²³Nakni haren hil hauk men ohore malaikat eke boholman wambik waharuk kwit, ele uruk kwit de, ‘E ai muhuk folug ebe elehap debehup, famen e erat neg de kwenang elma etma welamag ulug embeseiyug. Airoho debelug sabu bosiemanggen on mel tembaga on mel fam het-debelug de enggelangge leimu etma embeseiyug. Airoho debehupmu re at ebe lil en watuk kweleg it enoluk wereg angge maro on mel weregman neg tahun sabiren dukwag,’ urukmu holdihin ai.

²⁴Nakni, ha hauk hag fam hauihin on aire ebe diroho fahet hauihin, ne Allah Mun Leho wereg on anyo amu en nakni hat hobahet wene kongdoho isi on de su.

²⁵Nakni hat hebere ap homi kabogdeg enesahalimu en muko wilibi hobahakumu o leimu etma olomene hag angge mel seberoho welaruhun. Airoho wereg lit tahun sabiren eta hunduko re nakni hat hebere no sapi en hagdoho enggelangge nauk kwit hebe kwenang ohoma nohorukmu re lil howatuk karuhu. Airoho welaruhun deg neg de nakni haren hambilik fam fag-duruk kwit Allah Mun Leho wereg on ai neg de ap homi kerajaan etma fam along wereg, ne kerajaan etma re Aren ap momaloho foruk on fam og-esauk.

²⁶Malaikat en uruk kwit e ai erat kwenang elma welamag ulug urukmu hauihin on aire, nakni haren hambilik fam fag-duruk kwit Allah re o kwenangma suma along wereg ulug uhunmu neg de nakni hat nikangge raja inaruhun.

²⁷Airoho aruhu anggere nakni hat de an hamingming angge en ihi ale airoho neg din. Nakni haren siag eke duk fug, ite fano ale on deheg, katuk deg ale on deheg, ap homi enangge eleg on[7] henda hundig-enebeheg, diyug. Airoho duhun fam de nakni hat hendama hahayegdoho welaruhun,” ulug hweag-etfag.

²⁸Abirangge etma re an nebe Raja Nebukadnezar fam amag.

²⁹Airoho ebagman bigalem nesanggo en welatlug an nobam o Babel emberimmu ambe yabuk yaho on anyo fam lag-wag uruk kwit,

³⁰an den uruk kwit de, “Furiek, o kota Babel fam nik aleroho deg angge! An nebe nalong welahi ale mel, nomamne welahi ale mel, nunuk bogdeg welahi ale mel, nanggiluk deg lahi ale mel eneg amag ulug an den o Babel au ibukota welamag ulug witihik!” ebag.

³¹Airoho ebag ma an owan nele fotogdoho uk elegman bohol fam en ele uruk kwit, “Raja Nebukadnezar su hesanggo holin! Hat hebe raja wereg lit halong welahen on anyo re hat famen oko weheik.

³²Hat hebere ap homi lohwaleg enesahalimu en muko wilibi hobahakumu maro on mel seberoho o leimu etma wereg, tahun sabiren hunduko etare no sapi en duruk hagdoho hat de enggelangge nauk karuhun. Airoho welaruhun deg neg de haren hambilik fam fag-duruk kwit Allah Mun Leho wereg on aire ap homi en kerajaan fam etma along wereg. Ne, Aren ap momalduk on fam kerajaan ai og-esauk ulug uhun,” uruk katfag.

³³Eta li em neg ele airoho ebag ale anyo ebe demdoho atfag. An Nebukadnezar anyo ap homi enesahalimu en muko wilibi nobahasimu sapi en duruk hag enggele angge nauk katihik. Nebe re lil en nowatuk katsi. Noruk de suwe ikwesahop oruk yatdeg hag atsi, ne nenggiahap de suwe enggiahap hag atihik.

³⁴Tahun sabiren etano mundoho atsimu, an nalukwe boholma lahabegman de an nonggwareg deg ale furobahat-dauk on anyo nikangge nobam aik wahasi. Airoho atsimu an den Allah Mun Leho wereg on anyo mot-duruk kwit, an den At oluk mundoho-mundoho wereg on ai unuk leho feheg, apne lahabe feheg, dirihik. An den uruk kwit, “Allah aire li mundoho-mundoho fahet etma raja unduhuk welamag. Fobik mundoho-mundoho etma At neg along on welaruhu.

³⁵Ap enunggul unuk o kwenangma wereg on etma re iren duk ale eke wereg fug. Allah en neg malaikat boholma inim ap homi kwenangma inim along wereg lit fahat enusug. Aren enda boruk ale re ap misig en oho eke sahale folug duk fug alereg, Aren duruk ale fahet ap eke en ambong seroho hein og-ha fug alereg,” ulug ebag.

³⁶An anyo nebe deg ale furobahat-dauk on anyo nikangge nobam aik wahasimu re, an den ap homi melal-enepuk katihik mu kerajaan fam nalong wereg on mel nunuk bogdeg wereg on mel, nanggiluk wereg ale mel nikangge nobam og-nitsi. Airoho og-nitsi mu an nebe it nautsi pegawai en mel, it ap kaindeg en mel, og-napswareg an nebe kerajaan melal-enepuk katihik mu etmano welamag ulug nobahausa, ne an nalong welatihik ale ohore atam we maben hag famen mun alongdoho atsi.

³⁷Aireg ma re ketia an, Nebukadnezar en raja boholma along wereg on ai mot-deheg, leho feheg, apne weheg, duruk kahi. Aren duruk alere demdoho on neg deheg, katukdoho deg ale neg deheg, duruk, ne ap enawonog fam duruk on de Aren sebeloho fesouk alereg ulug ebag.