Read Ninia Yali DANIEL 5 Bible Online

DANIEL 5 - Ninia Yali bible

DANIEL 5

¹Nukoho misig salim de Raja Belsyazar en ap kaindeg enebe seribu en angge aren pesta mun ebe on durukmu watlug anggur ahaik na wamag ulug yonggo fesebag.

²Airoho ebag ma watfagdeg it ik nebagdeg siomo deg lit, Belsyazar en de mangkuk emas on mel perak on mel akni Nebukadnezar en o Yerusalem TUHAN obam wirigmu en delfag angge omano walug wamag ulug mingming-enepfag. Airoho ebag aire Raja Belsyazar en boruk kwit, it ap kaindeg mel, at ohwesi mel, ohwesi hweimohe on mel, at onggwareg mel de mangkuk etma fam naul en ulug ebag.

³Airoho ebag ma re mangkuk omano at akit walug watfag ma, it enebe mundoho omano re mangkuk etmano fam ik nebag.

⁴It airoho nauk kwit de iren dewa emas on mel, perak on mel, tembaga on mel, besi on mel e on mel helep on mel fam hilinggig angge etmano mot-duruk katfag.

⁵Airoho durukmu fetagdoho etano neg ap enggik eke en de o hun raja obam obahat dopnoroho enameg fil lampu ombagbag en seleg deg fil etano eke lisu balduk mu re, raja ebe mun selegdoho il hebag.

⁶Airoho durukmu hebagdeg at orohole uarebebagdeg mun akol en de elenggen elek-elek angge duruk katfag.

⁷Airoho duruk kwit ele hum fam de ap hwalenap mel, bolan ale duruk on mel, ambol fam angge duruk on mel, sohwalanggen wenaharuk ale enoluk on mel wol-enebukwag ulug hweag-esebag. Airoho hweag-esebag ma it enebe etano watfag ma raja en uruk kwit, “Ap sa en lisu baleg on ai bilinggimisireg ebe diroho fahet baleg ulug hweag-nitmisi on de an den ap ai fam sum ap raja en wan-duruk on jubah il ungu on mel, ne at leho foruk kwit ulug de siong emas on mel, og-itmin. Eta wereg kweleg de an den ap o kwenang an den melal-enepuk kahi on au fam ap henahaneg on along welamag ulug leho femin” ebag.

⁸Airoho ebag ma re ap enoluk enggat deg enap ulug omano at wereg ma aik watfag famen ap misig en oho eke lisu baleg on anyo bilinggeheg, ebe diroho fahet baleg ulug selegdoho raja hweag-ereheg, debag fug.

⁹Airoho debag fug mu Raja Belsyazar anyo orohole uarebebagdeg ape enda fit atfag; ne it ap kaindeg omano oho enenda nong-hong ebag neg.

¹⁰Airoho debagdeg raja mel ap kaindeg mel enele ngai-wai angge duruk on etmano raja isinga en holfagdeg hwe anyo pesta durukmu ambe anyo fam kwik lebag. Airoho kwik lebagdeg aren uruk kwit, “Nakni hat de holuk mundoho-mundoho neg welaruhun! Nakni hat horohole uarebelug duk fug we henda hambuk dakin.

¹¹Aire nakni haren kerajaan au fam de ap dewa [8] enaheime mun amu eneg on endama hoporeg on eke wereg anggere. Nakni hat hakni en melal-enepuk li em etmano ohore, ap aire oluk enggat deg lit enda wereg deg ma wenggele folug duruk ale dewa enenda wenggeleg en duruk hagdoho mun eneg deg latsi. Ne, nakni hat hakni Raja Nebukadnezar en de at aire it hwalenap mel, hein og angge mel, di ale su ale enoluk deg enap mel, sohwalanggen wenaharuk enap mel, fahet melal-enepuk on unduhuk fesi.

¹²At ebere mun nikaleroho oluk deg lit de enda wenggeleg neg deg ahun, ne aren de ena og-hauk ale fahet ebe dindiloho eheg, aheraho ale enamoho hweag-eseheg, wene kong-duk fug alereg on hwaloho feheg, duruk on. Ap unuk de Daniel famen raja en unuk Beltsazar soalsi. Anggere at ai wol din. Lisu baleg on ai ebe diroho ulug de aren neg hweag-hitmisi,” ulug hweag-etfag.

¹³Airoho ebag ma folo-folo etano neg Daniel anyo walug raja wereg ma watfag. Airoho watfag ma raja en hein og-hauk kwit, “Hat de hun Daniel ap Yahudi on, an nakni en o Yehuda kwenang fam en sabu het heneplug hwik-henebik wahasi on anyo a?

¹⁴An holduk men, hat de dewa mun eneg on enaheime en hendama hoporeg ma, henda enggat deg lit, wenggeloho deheg, henda wereg on fam mun nik aleroho deheg, duruk kahen.

¹⁵Ap di ale su ale fahet enoluk deg enap mel hwalenap mel en lisu baleg on su fahet bilingguruk ale fahet wal-heheg, ne ebe diroho fahet baleg ulug enamoho hweag-nereheg, dul ulug dehesa. Famen iren duk fug ale aha.

¹⁶An horog ketia holduk men de hat neg de aheraho ale enamoho feheg, duk fug alereg on hwaloho feheg, duruk kahen ehesa. Haren lahe lisu baleg on au bilinggimihindeg ebe diroho fahet baleg ulug enamoho hweag-nitmihin halug de, an den sum kerajaan fam wan-duruk on jubah il ungu on anyo mel, siong emas on hat hunuk leho foruk kwit ulug enegdoho mel og-hitmin. Eta nim de an den hat hebe kerajaan au fam ap along wereg on en henahaneg on welamag ulug unduhuk hobahamin,” ulug hweag-etfag.

¹⁷Airoho hweag-etfag ma Daniel en ele onggo re, “Nakni haren onggo etma an og-nom fug ite ap amu on og-esakiyug. An den de lisu baleg on ai bilinggimin deg ebe diroho fahet baleg ulug nakni hat hweag-hitmin.

¹⁸Allah Mun Leho wereg on ai en nakni hakni Nebukadnezar anyo raja leho on welamag ulug unduhuk fesireg at fam alongap debeheg, unuk bogdeg debeheg, disi.

¹⁹At airoho debesimu re at ebe hum ahun wereg ma, ap di enunggul unuk su enunggul unuk en mel, enunggul unuk domog en mel, enele domog en mel, at fam enowag elek duruk kwit enakol duruk katswa. Aren lahe ap watmin boruk halug, at boruk aleroho neg ap anyo ware foruk katsi, ne aren lahe ap eke ahap wendare femin boruk halug de ap anyo ahap wendare foruk katsi. At endaman bolug neg ap eke leho feheg, ne ap eke sebele feheg, duruk katsi.

²⁰Famen at ebe endama leho fahat dasireg, enda haro atlug olok humon atsi mu re at ebe raja wereg lit hwal-enepuk katsi mu etmano en sebele fesimu at along wereg latsi ale anyo eleg atsi.

²¹At ebere ap homi enesahalimu en muko wilibi fesi, ne aren wenggelduk ale ohore wam en wenggelduk hag atsi. Airoho atsireg at ebe no keledai enggelama on nim wereg lit, ebe enggelangge sapi en nauk hag nenggeg, ne ebe kwenang ohoma nohorukmu lil en watuk katsi. Airoho duruk katsireg en ambiangma en neg de aren ambilik fam fag-duruk kwit, ‘Allah Mun Leho wereg on aire ap raja wereg lit melal-enepukmu kerajaan etma fam along wereg, ne kerajaan ai fam melal-enepuk kamag ulug de Aren ap eneko foruk on fam og-utuk’ isi.

²²Famen at amloho nakni hat hebe en de airoho atsi ale etma mundoho holuk deg liren, honggwareg en sebele fahat-dauk kahen fug.

²³TUHAN boholma along wereg on anyo il hanim haren leho fahat-dauk kwit hehendeg hambong si-se angge mangkuk o TUHAN Obam en huhul walug wahausa on etma walug wilibik manik ulug mingming enebehen. Airoho dehen deg, nakni hat mel, it ap kaindeg mel, hohwesi mel, hohwesi hweimohe on mel mangkuk etma fam ik nauk kahep. Nauk kwit de nakni haren de dewa emas, perak, tembaga mel, bosiemanggen mel, helep mel, e fam mel wirig angge etmano, iren enesanggo holeheg, furebeheg, duk fug alereg on etmano mot-duruk kahen. Nakni haren de At Allah nakni hebe holuk wereg ale fahet mel waratuk ale fahet mel hwaloho feheg, hebe holuk wereg lit duruk kahen ale fahet hwaloho feheg, duruk on anyo fam along bolug leho foruk kahen fug.

²⁴Ai fam de Allah en diroho aruhu ale ulug enggik ai en lisu balukwag ulug mondorik waha ai.

²⁵Lisu baleg on aure ebe diroho, ‘Wenag heheg, wenag heheg, anggin wal-heheg, dulug yohwan heheg,’ ulug baleg.

²⁶Ne, baleg on ai ebe diroho fahet: Wenag heheg, ulug baleg aire nakni haren melal-enepuk kwit welahen on anyo re Allah en wenag-heheikdeg mundoho ambiangma fotog ik laha;

²⁷Anggin wal-heheg, ulug baleg aire nakni hat duruk kahen ale fahet wil-wal heheikman de haren duruk kahen on de endama am fugdoho neg duruk kahen;

²⁸yohwan heheg, ulug baleg aire nakni haren kerajaan aure yohwandoho re ap Media on mel Persia[9] on mel fam og-eseheik,” ulug hweag-etfag.

²⁹Airoho hweag-etfag ma folo-folo etano neg at Belsyazar en autsi pegawai etmano fam de Daniel sum jubah ungu anyo wan-debeheg, anggolopma siong emas on borebeheg, dukwag ulug hweag-esebag. Airoho ebag ale debebag ma re Daniel de hun raja en kerajaan anyo fam ap along wereg on en henahaneg on inatfag.

³⁰Airoho debebag ma hup anyo salim neg hun Belsyazar raja Babel on anyo binggi ware febag.