Read Ninia Yali DANIEL 9 Bible Online

DANIEL 9 - Ninia Yali bible

DANIEL 9

¹ Darius hun Ahasyweros amloho obam Media on anyo ap homi Babel on fahet raja inatsireg melal-enepuk li em tahun keram on anyo fam de, an Daniel en de buku Allah wene baleg etmano kumururuk men de, TUHAN en ele Nabi Yeremia fam hweag-utuk kwit de, kota Yerusalem de meiyaleg weregman neg de 70 tahun aruhu, ulug hweag-etfag ma hweag-esebag angge lisu baleg wereg ma hauihikdeg nendama yatdoho ebetihik.

³Airoho ebetihikdeg de nakni TUHAN Allah enda nesowag ulug de sum karung on lahaboho, nambilik hweang nebe ul fam hwerieg wereg lit somban nele nelahegdoho somban irihik.

⁴Airoho somban uruk kwit de ap homi an nunggul unuk on en nim en siag duruhuk on etmano nakni TUHAN Allah fam fag-dirihik. An den fag-duruk kwit diroho irihik, “Nakni TUHAN Allah hat hebe humon deg lahenma niren hat mot-hapuk kahe, nakni. Nit homaliki en, haren diroho diyug airoho diyug ulug hweag-nesauihin on etmano dipdoho duruk kwit, hat hobam enenda hundig hapuk on fam de haren it fam henda hundig enepuk kwit welaheg, wene sali wat-nesauihin on anyo hagdoho dipdoho neg duruk kwit welaheg, duruk kahen. Famen de niren Hat hapma wereg lit hele holoho wereg ale nenerim en siag deheg, niren kwasikdoho deheg, duruk kwit, Haren diroho diyug airoho diyug ulug hweag-nesauihin on ai dahandoho deheg, hele sahaloho amu on deheg duruk katuhuk ai nakni.

⁵

⁶Airoho duruk kwit de it ap Hat hamingming angge nabi en Hat hunuk yiko wene Haren hweag-esauk katihin on ai nenombasi abirangge hweag-eseheg, it ap raja fam hweag-eseheg, melal-enepuk on fam hweag-eseheg, ap homi nit nenunggul unuk on abirangge fam hweag-neseheg, it nenambu-nenombasi fam hweag-eseheg, duruk katswa famen de nenesanggo holuk eleg angge embeseruk katuhuk on aire siagdoho duruk katuhuk.

⁷Airoho duruk fam Haren higitdoho neg duruk kahen famen de, nit ap homi Israel on nenebe abirangge ketia nenenggali hauk kahe. Ap homi Yudea on mel Yerusalem on mel, horog kwe etma wereg on mel en Hat hobam dipdoho welam fug angge duruk katuhuk ai fam buhuloho o yat kwe mel horog kwe mel monde-nenobahaik waharihin mu di kwe su kwe welahe on etma nim en nenenggali hauk kahe.

⁸Ap nit nenombasi en mel, nenowesi raja-raja en mel, nenowesi melal-enepuk katswa on en mel, Hat nenakni TUHAN hele sahale folug mundoho siag neg duruk katswa ai fam nenenggali hauk kahe, nakni.

⁹Niren hat hele holoho welam ale nenerim en hele sahale folug siag duruk katuhuk famen de haren nit nenebe henda hundig nenepuk kwit siag duruk kahe on elehapdoho nenobaharuk kahen ai, nenakni.

¹⁰TUHAN Allah nenakni, Haren wene diroho diyug airoho diyug ulug melaloho hweag-nesaukmu it ap hat hamingming angge nabi en hweag-nesauk katswa famen niren hole folug duk fug angge embeseruk katuhuk.

¹¹Nit ap homi Israel on abirangge en hat hawene melaleg anyo sahale folug hele holuk fug angge duruk katuhuk. Airoho duruk kwit hat hobam siag duruk katuhuk ai fam, haren homan debeseruk karuhuk ulug irihin ale Buku hat hamingming angge Musa en on anyo fam baleg ale higitdoho nit homan nenobaharihin.

¹²Haren nit nenowesi enalong wereg lit hwal-nenepuk wereg on etmano nim fam hweag-nesauk kwit, ap homi o kwenangma wereg on di obam su obam etma mundoho unggum siag on enobam fouk eleg anggere, hit o kota Yerusalem on neg de henobam fohuk ulug abug irihin aleroho dirihin.

¹³Haren mun siag on henobam fohuk ulug irihin on wene Musa wene melaleg anyo fam lisu baloho fesi on ai abirangge ai nit nenobam ferihin, famen de nenakni TUHAN Allah, niren hat hendama hahayeg amag ulug eke duruhuk fug. Nenobabut kwasikdoho duruk kahe on ai embeselug haren hawene hweag-nesauk kahen on etma higitdoho duk eleg angge welahe ai, nakni.

¹⁴TUHAN Allah nenakni, haren duruk kahen alere mun higitdoho neg duruk kwit katukdoho duruk kahen famen niren hat hele holuk eleg angge neg duruk kahe. Ma re haren siag on nit nenobam nenobahakuk ulug foukdoho ferihin on anyo mundoho nenobam ferihin ai.

¹⁵TUHAN Allah nenakni, hat henggik omamne fam hat homaliki o Mesir en og-eneplug wilibik waharihin ai fam hat hunuk bogdeg ma ap homi en ebet heauk. Famen nit homaliki en siag deheg, kwasikdoho deheg, duruhuk.

¹⁶Nenakni, haren endam henda nenusug lit del-nenepuk katihin ai hagdoho, ketia hahumu ahe lahalug o kota Yerusalem mel honggwareg handom amu eneg on[15] anyo mel siaho ferihin on ai hahumu fano amuk. Nit nenebe en mel, nit nenombasi en mel nenobabut siagdoho deheg, kwasikdoho deheg, duruk kahe ai fam ap homi nenaluluk kwe wereg on en nit homaliki fahet enendaman seramap nenobahakeg, o kota Yerusalem enal belesim ware feheg, duruk.

¹⁷Allah nakni, an den hayonggo foruk kahi on nim heng hapuk kahi on nim etma nele hesanggo holin. Ap homi amu on en Hat demdoho Allah welahen enoluk amag ulug, Hobam atag siaho fousa on ai fobik hobam fano atlug hat hobahet nikangge fanorebeiyug.

¹⁸Nenakni Allah hesanggo husi folug nenele holeheg, hil fenggenoho re nit nenebe mel, nenobam kota Yerusalem Allah wereg ma ulug hunuk yiko urukmu anyo mundoho siaho fousa ma, mun siagdoho welahe ale etma mel kumu nesakin. Nit nenobabut fano duruk kahe ulug hweag-hutuk kahe fug. We haren neg nit henda hundig nenepuk kahen ulug hobam hweag-hutuk kahe, nakni.

¹⁹Nele hesanggo holug de niren siag duruk kahe on etma elehapdoho embesein. Hat hobam kota mel, homaliki nenebe mel de Aren on ulug hat hunuk on uruk ai en de, folo-foloroho neg din ulug hayonggo foruk kahi nakni,” ulug somban irihik.

²⁰An den airoho nakni TUHAN Allah hweag-utuk kwit an nonggwareg fahet nim, ap homi Israel nenunggul unuk misig on fahet nim en Allah ele sahale folug siag duruhuk ai en elehapdoho feheg, at obam mun amu eneg on siaho fousa on anyo nikangge obalma buhundoho wurukwag ulug mel hweag-ereheg, dirihik.

²¹ Airoho somban uruk men de ap homi en o hupmu angge Allah owam waroho yal-utuk li em eta higitdoho malaikat unuk Gabriel an atam na fam hag hauihik on anyo nebe higitdoho darulug wahasi.

²²Wahasireg an hweag-nutuk kwit, “Daniel, an de wene fobik aruhu on ai furebemihin en ulug ebe enegdoho hweag-hitmin en wahi.

²³Haren de Allah en hweag-nomag ulug heng duruk li em etare hele holeheikdeg onggo mundoho eheikdeg wereg. Airoho holeheikdeg hebe enda hundig husug lit wereg ai en de, an den wene fobik aruhu ale hweag-hitmin ulug wahireg hweag-hitmin ai en de ha og-hauk hag fam hil hehen on aire ebe diroho fahet hehen ulug hweag-hutuk kweleg hesanggo furoho holeg lamuk.

²⁴Enenggik deng-deng angge wenako 7 kali 70 tahun welamuhuk on ai ebere, ap homi hat nim hunggul unuk misig on o henobam kota amu eneg on ai fam en siag deheg, kwasikdoho deheg, duruk katuhup on mel, Allah en elehap debelug de fano neg duruk kamag ulug debeheg, durukmu re diroho aruhu ulug ha og-hauk hag fam hehen on ai ebe demdoho aheg, TUHAN onggwareg en on obam[16] mun amu eneg wereg on ai siahap debeswa on ai fobik buhun-debeheg, duhu ale fahet, Allah en huli-huli fesireg fobik ebe ai huli fam aruhu ale fahet hehenma.

²⁵Wene hweag-hitmin su holuk atlug fu debeiyug: O Yerusalem meiyaleg on ai fobik nikangge wurukwag ulug wene indip wilipsi on ai fam en de ap melal-enepuk on Allah en momaloho fesi on ai waruhu huli aire enenggik 7 kali 7 tahun welamuhuk. Airoho wereg latlug fobik en enenggik 62 kali 7 tahun wereg lit o kota ai nikangge wireheg, fak lehet weheg, kobokwe yareheg, duhup on aire mun siagdoho wereg lit duhup.

²⁶Airoho 62 kali 7 tahun welatlug, ap Allah en momaloho unduhuk fohu on ai siag duhu fug[17] famen ebe waruhup. Airoho waruhupmu, ap raja omamne on autsi tentara on en o kota Yerusalem mel, TUHAN Obam mel mundoho meiyaloho elehap debehu. Airoho welamuhup on eta ambiang kobog ik lauk li em de Allah en isi higitdoho ik fu en di angge su angge walug waharuk ai hag, weim yabeheg, di angge su angge mundoho siaho feheg, duhup.

²⁷ Ap raja ai en de 7 tahun fam diroho welamuhuk ulug ap homi enebe humdoho fam wene sali omamneroho wat-esahu. Ne, airoho wereg lit, tiga setengah tahun welatlug de, wam di angge su angge waroho yal-ereheg, og-ereheg, duruk kamuhup fug ulug uhu. Airoho ulug fobik de mun enamelmel on durukmu, mun siag on nalduk on[18] ai o TUHAN Obam wirigmu etma unduhuk fohumu welaruhu. Airoho wereg ma huli atam Allah en at diroho aruhu ulug isi higitdoho ap enamelmel on fohumu welaruhu on anyo siahap debehu huli en de enamelmel on ai eleg aruhu,” ulug hweag-nitsi.