Read Ninia Yali HOSEA 10 Bible Online

HOSEA 10 - Ninia Yali bible

HOSEA 10

¹Israel de e anggur anggen saharoho yihiruk on hag. Angge di angge su angge fam dungon atuk kwit de iren mezbah humdoho wutswa. Di on su on sigdoho atuk kwit kembu apne wauk kwe ahut ilitdeg etmano buhun-bahandoho wutswa.

²Ketiare ap homi hwenaroho duruk on etma it enesiag onggo ambiangma hahup. Allah en de iren mezbah wutswa on etma luluhun esahureg, iren kembu apne wauk kwe etma meiyal esahu.

³We horog il misig welatlug iren uruk kwit, “Nit de TUHAN fam nenakol boruk kahe fug mu re nit nenowe raja wereg fug. Anggere nit fahet raja wereg ale aire nunggwelug no?” uruk kamuhup.

⁴Iren de enele en werehap dil laheg, enele seiale fam sali wareheg, sali ebe demdoho fug on famen wareheg, duruk. Wene melaleg de iren aham-faham haukmu re katukdoho duruk on anyo re yabuk fano wirig angge fam osuk angge asig on wilipuk hag saharoho wilipuk.

⁵Ap homi kota Samaria wereg on de enakol amuhup; ne it enebe mel, imam mel o Betel[17] fam etman sapi emas on obahet duruk on etma re, iren kembu orohole buhun-bahan deg on anyo mundoho eleg atuk en enenda hesilduk kwit oba yaruhup.

⁶Kembu etma re o Asyur harulug lahupdeg raja leho wereg on anyo enda ahayegdoho og-umul en ulug walug lahup. Israel on en de duhuk ale ulug wene melaleg wereg on anyo duhup fam it enenggali aheg, siag aheg duhup.

⁷Samaria re mun luluhun aruhu mu enowe raja re e asenggep eke ik en harulug lauk hagdoho walug lahup.

⁸ O Betel[18] duk fam kembu obam wirigmu ap homi Israel on en kembu mot-duruk kwe etma mundoho luluhun esahup. Iren mezbah wirig on fene etma re enggelangge mel alog-alog angge mel wilibuhu. Airoho duhumu iren dom fam enele hwiruruk kwit, “Nit sal-nenebin” eheg, ne duk-duk fam wol-duruk kwit, “Nit sebel nenebik ma” eheg, uruk kamuhup.

⁹ TUHAN ele uruk kwit, “O Gibea[19] fam debag huli anyo en anggere, ap homi Israel on de An nele sahaloho siag duruk ale anyo bale foruk fug. Ai fam de o Gibea fam oho re weim enobam aik waruhu.

¹⁰An den ap homi siag neg duruk on etma enowarik kuruk kwit unggum og-esahuk. It enunggul unuk amu on de enebe misig sebe ulug it inim dog yapuk kamuhup, ne it enebe re enesiag hum ale etma fam unggum og-esahuk.

¹¹Endam Israel de sapi ket sauwe on hagdoho mamulig on en gandum anggen lolduk ale oluk on hag deg latsi. Airoho deg ma An den at anduhun ebe angge ai fam lisulug lauk angge anyo bug debouk fug alereg latsi. Famen ketiare at yabuk anggindoho dukwag ulug An den ningdoho deberuk karuhuk. Yehuda on de kwenang moholukwag ulug An den mingming duhuk, ne Israel de damuloho enerukwag ulug hweag-uruhuk.

¹² An den uruk kwit, ‘Hat Israel su! Heyabuk keron sene folug anggen a yatuk on de katukdoho duruk on ai yarin, ne anggen balduk on de haren An nobam dik-demdoho henda hundig napuk kahen on ai fanoap hobaharuk angge on bal-dauk kamin. Haren An hakni TUHAN hera-napuk ale fahet li mundoho horog aik waha. An watlug nangge fanoap debeseruk kahi angge anyo re osit belabik waharuk hag belap-hesa waruhuk.’

¹³Famen airoho duk on wereg kweleg haren ahamdoho amu on duruk kahen; haren siag ale duruk on fahet neg duruk kwit, anggen yihig hagdoho re katukdoho duruk eleg on anyo balduk kahen. Hat de hele seiale uruk on fam anggen yihig bal heheg, nauk kahen” isi. TUHAN en ele nikangge uruk kwit, “Yaho hit unggul unuk Israel on su! Hiren de henangge kereta emberim fam lahalug dog yapuk angge anyo mel, ne henautsi sehen seneg enap hum-hamdoho wereg ale anyo fahet mel fam dip-debelug duruk kahep,

¹⁴ma re ap homi holduk on de weim enobam aik waruhu, ne hit henobam hembit angge helep huhulowag wirig on etma mun luluhun esahup. Airoho debehupmu o etma re Raja Salma en kota Bet-Arbel weim fam elehapdoho foruk kwit homi enomalik nim al berel isil lasimu deg latsi etano hag deg laruhu.

¹⁵Yaho ap homi o Betel welahep on, hiren siag mun hum aleroho duruhupmu re, hit henobam de airoho eta aik waruhu. O mo kwelabik waharuk li em weim yapuk ale indip duhupdeg duruk kweleg eta hit henowe raja re wararuhu,” isi.