Read Ninia Yali HOSEA 11 Bible Online

HOSEA 11 - Ninia Yali bible

HOSEA 11

¹ TUHAN ele uruk kwit, “An den de Israel ebe dotdeg kweleg nenda hundig dirihik, An nomalik ai ebe o Mesir en wilibik wamag ulug wol-dirihik.

²Famen An nomalik wol duruk kweleg de at anyo An fam endenoho nobahalug ebe yaratil lauk katsi. Aren de kembu Baal mel dewa amu on mel fahet, di angge su angge walug og-irik laheg, amben fano angge dupa yal ereheg, duruk.

³Airoho duruk famen de at ebe lauk alere An den mamul-itihik famen, at ebe An nenda hundig en mako bugdoho wauihik famen duruk. An den at ebe hwalduk katihik, famen Aren airoho napuk katsi ulug fag-duruk fug.

⁴An den elaheg halug nenda hundig fam, At ebe re kumbi liloho hondoko feik waharihik, At ebe fam ouk-bouk hauk ale etma An den neg seap deberihik, Nenda fano en at nauk on[20] nauk kamag ulug og-utuk katihik.

⁵Ap homi Israel on etma re An nakit sombandoho waharuk ale enerim deg, ai fam it enebe sombandoho o Mesir lahup, ne unggul unuk Asyur on en it sebel-enusug lamuhup.

⁶Weim yapuk alere o kota iren on ilonggo elekwe etmat abik kuhupmu re sokole humon hilinggig on etma mundoho siahap esahup, ne An nomaliki re mundoho elehap debesehup. Airoho aruhu ale aire iren enenda bolug deheg,

⁷An enerim en nobahalug lauk ale fahet enomamne aheg, duruk ai fam aruhu. Mu re it enebe mundoho anggin-fanggin hauk kwit, let-nenebukwag ulug enele hwiruruk kamuhup famen de ap en eke fiselaroho fesehup fug” isi ebag.

⁸ TUHAN ele eke uruk kwit, “Yaho hit Israel on, An den hit henobahalug laheg, fotog heseheg, dihi ha fug alereg. An den o Adma on mundoho elehap debeserihik hag henobahaki ha alereg a? Ite o Zeboim[21] on fam debeserihik hag henobahaki ha alereg a? An den hat fam nenda hundig hapuk ale fahet mun hum deg ma re mun nenda elegdoho etma re dihi ha fug alereg!

⁹Hat de An nolok ai fam unggum og-huruhuk fug; ne An den hat hebe luluhundoho hobakuk fug. An de ap on fug An den Allah deg lahi. An de namu eneg on deg lit hat hebe hinim welahimu re hat fam nolok fohuk fug,” isi.

¹⁰TUHAN ele uruk kwit, “An den singa ele kouwa duruk hagdoho it eneselei on enakolap debesehuk li em de An nomaliki etma An nombolim lahup. An nomaliki re mo obuk uruk fil en An napne wakoho folo-folo wamuhup.

¹¹It de o Mesir en suwe folo-folo daroho lauk hag wamuhup, ne o Asyur en de suwe bel hagdoho wamuhup. Airoho wamuhup mu re An den it enebe sombandoho og-eneplug it enonggwareg enobam olma feseik lahuk, ulug An TUHAN en nele mundoho ihi” isi ebag.