Read Ninia Yali HOSEA 12 Bible Online

HOSEA 12 - Ninia Yali bible

HOSEA 12

¹TUHAN ele uruk kwit, “Unggul unuk Israel on de An nebe mase nusug lit, seiale enele en laloho eheg; unggul unuk Yehuda on de An Allah mun namu eneg wereg lit dipdoho neg duruk kahi on nele sahaloho deheg, duruk kwit lal-napuk.

²Di ale su ale ap Israel on en hupmu hubet duruk ale etma re, alemaroho neg duruk, obabut de, hol timur fil on en furoho elehap deberuk hag deheg, seiale laloho duruk on enolok ale mel deheg, duruk on ai it enesahalimu en logap deberuk. Iren sali Asyur enap nim watuk kwit, ahalue walug o Mesir eneg ale seberuruk on ulug lahuk uruk,” isi.

³ TUHAN de wene unggul unuk Yehuda on nim wereg; Aren it Israel on oho it enebut fam unggum og-esahu. Aren it enobabut duruk ale fam unggum og-eseheg, ambiangma debeseheg duhu.

⁴ Indipmu Yakub isinga ahummu wereg li em de are biren omalik Esau anyo sebeloho febag neg; ne Yakub mundoho sauwe atfagdeg oho Allah nim yeik hambog-hambog atfag.

⁵At ap malaikat on eke nim yeik hambog-hambog atuk men de at along atfag. Airoho debagdeg at oba yatuk kwit, fanoap nabin ulug heng-debag. Ai en Betel etma Allah Yakub akit watfag ma, nit nenembu ai inim enele matfag.

⁶Allah aire At TUHAN di ale su ale duk ale neg deg on. Unuk de TUHAN ai. Unuk ai fam ap homi at apne wauk kamag ulug enda boruk.

⁷Aireg ma anggere, hit Yakub ambiangma on su yei, Henakni Allah fam henenda dip deberuk kwit, sombandoho at akit waharuk kamek. Heneluk wereg lit de henenda hundig deheg, bekitdoho deheg, duruk wereg lit henenda hambuk halug henakni Allah en duruk ale neg nangno hauk kamek.

⁸TUHAN ele unggul unuk Israel on fam uruk kwit, “Hit ap Kanaan on hag bekitdoho duruk kahep fug; munangge-manangge onggo wauk on omano en inim hundig henekit hundurik waharuk on omano fam hiren ilit angge ilit hauk kwit seiale lal-enepuk kahep.

⁹ It enele uruk kwit de, ‘Nit ketia dung atuk kahe uruk, niren laloho hwelauk kahe angge ai fam dung atuk kahema, ap eke en nenenggali wareheg, duk fug alereg’ uruk.

¹⁰Famen de An henakni TUHAN Allah, hit og-heneplug Mesir en wilibik waharihik on anyo en de hit atam o sabo fam sal-heheg wereg ma An henakit waharukmu welatuhup hag eke welamuhup ulug henobahakuk.

¹¹An den nabi nim mundoho nele matihik deg, ena og-hauk hag fam wene humdoho og-esauihik, it fene en An den hit An nomaliki fahet wene melaleg lahi ale mundoho hweag-esauihik.

¹² Ai dirihikmen de, o Gilgal etma kembu neg mot-duruk kwit mezbah emberimmu sapi waroho yaleheg duruk on foma wereg. Famen de it ap kembu mot-duruk on etma re waramuhup, ne mezbah o Gilgal wereg on etma re yabukmu helep kabog lahabeg angge on aruhu,” isi.

¹³ Yakub nit nenembu anyo buroho o Mesopotamia lebagdeg at ohwe hwelaroho, ap etma on amingming angge atlug wereg lit ap ai an domba hwalduk katfag.

¹⁴TUHAN en ap nabi on misig eke ap Israel o Mesir hele waregman og-eneplug wiliplug hwal-enepuk kamag ulug mondotfag.

¹⁵Ap Israel on mundoho en dil ale famen TUHAN olok humon enepsi reg it demdoho unggum og-esauk katsi. TUHAN en fobik it unggum og-esahu ai iren dil ale famen ap homi amu on en TUHAN enalitno duruk kamuhup ai fam unggum og-esahu.