Read Ninia Yali HOSEA 13 Bible Online

HOSEA 13 - Ninia Yali bible

HOSEA 13

¹Endam de unggul unuk Efraim on de along boruk katswa. Airoho boruk kwit unggul unuk ai on en wene melaleg uruk halug, Israel fam unggul unuk amu on en de enakol duruk katswa. Famen unggul unuk Efraim on de Baal apne wausa fam siag duswa. Ai fam at ebe mundoho eleg aruhu.

²Ketia huli en angge ap homi Efraim on aire siag duruk kwit neg wereg; iren de no perak on en ahut ilitdoho wiri folug apne wauk on ahut ilitdeg etma re ap en wenggele folug enenggik fam wutuk on. Iren uruk kwit, “Ahut ilitdeg etma fam wam waroho og-utuk kamek!” uruk. Yaho, ap homi en sapi omalik ilitdeg fam apma sebe uruk ale aire duk aleroho duruk boruk kahep!

³Airoho duruk ai fam, ap homi etma re lil mel hena mel o hubet baloho eleg atuk hag eleg amuhup. It de ul ahe gandum anggen lolduk men hol en fi hauk hag, ne hobu ahauk ele hwaleg kwe en wilip atuk hag amuhup.

⁴TUHAN en uruk kwit, “An de hit henakni TUHAN Allah o Mesir en og-heneplug wilibik waharihik on. Hit henakni Allah re we An namu, Allah eke wereg fug. An namu en neg hit henahap wendat-henepihik on.

⁵ Iliangge lei fene kwenang iringgig kwe omano en An den hwal-henepuk katihik.

⁶Famen hit henebe kwenang fanoma etmano mundoho aik waharuhupdeg, hit henahummu homoroho nenggeg dungdoho nenggeg dulug hit henebe winik-wonog uruk kwit An henapeleg atuhup.

⁷Ai fam singa en senggel enepuk hag An den hit senggel henebuhuk. No olomene unuk macan tutul en hag An den kwema bal-henebuhuk.

⁸An den no beruang omalik longgo urukmu duruk hag henobam heroho sahali uhukdeg, An den de hit henebe dilip-dalap hesahuk. Singa en duruk hag hit henebe welahepma etman senggel henebuhuk, ne olomene olok on en duruk hag henebe miog-mayog heg henobahakuk.

⁹Yaho henunggul unuk Israel henap, An den hit mundoho luluhun hesahuk! Mu re san let henebuhu behep?

¹⁰ Hiren raja nim melal-henepuk on nim heng-enepuk kahep famen, ketia it enebe abirangge kema wereg? Iren hit henomaliki holduk on del-enebuk alereg a?

¹¹ Nolok hasimeg An den raja og-hesauihik, ne nobam haroroho it enebe nikangge lisoho og-enebuhuk,” isi.

¹²TUHAN en uruk kwit, “Israel on en siag duruk katswa on mel naleg-haleg duruk katswa on mel de mundoho lisu baloho wereg, ne baleg aire foroho wereg.

¹³Israel on de enoluk welamag ulug eiyale wereg famen mun moruereg lit li eyale wereg on anyo higitdoho duruk fug. At de omalik fou we horog ketia endag-aikoho duruk famen isinga ahummu en wilibik waharuhuk fug hag deg.

¹⁴ Unggul unuk aure waratuk on omamne fam en An den del enebuhuk fug. Waratuk on, ouk-bouk etma saha-faha esakin! Hat heyabuk mun luluhun duruk kahen on ai din! An de unggul unuk su on nenda hundig enepuk ale embesehi.

¹⁵Israel de enggelangge hesilig on hagdoho sigdeg, famen An den hol timut fil en ahanhan on o iliangge leimu en mondorik waruhuk. Hol ai en ik eleruk wilipuk on mel, bohwe habulig kwe mel mundoho firog dil lahumu, onggo wereg angge etma mundoho eleg ail lahu.