Read Ninia Yali HOSEA 14 Bible Online

HOSEA 14 - Ninia Yali bible

HOSEA 14

¹Samaria re An nobam il napsireg nele sahaloho duruk en de unggum hwelahu. Ap homi holduk on de weim elman waramuhup; omalik fou on de al berel esahup, homi enomalik enahummureg on de enahum belang esahup” isi.

²Yaho hit unggul unuk Israel on, henakni TUHAN Allah akit sombandoho manik! Hit henesiag en dil ale famen henebe kobogdoho wamburuhup.

³TUHAN obam sombandoho watlug, TUHAN obahet folug og-utuk hag somban diroho obam iyek, “TUHAN nenakni, Haren nenesiag hapelehapdoho nenobahalug, niren somban uruk kahe on ai wakin. Airoho wauk fam niren nenele sali uruhuk hagdoho Hat mot-hapuk kamuhuk.

⁴Asyur en nit nenahap wendat nenebuk fug alereg, ne kuda weim lahabik lauk on en nit let nenebuk fug alereg. Niren kembu ahut ilitdeg nit nenonggwareg en wutuhuk on fam it aire nit nenakni Allah ehe ha fug alereg. TUHAN nenakni, Haren de ap homi enenda koloma yareg on fam henda hundig enepuk kahen,” ulug somban uruk kamek.

⁵TUHAN en uruk kwit, “An nomaliki nele sahaloho duswa on etma An den nikangge og-enebuhuk, ne An den it bet-enebuk fug angge, Nenda abirangge en nenda hundig enebuhuk;

⁶Ap homi Israel on enobahet de An den, kwenang mun iringgig on fam osiren kulureberuk hag deg lahi. It enebere owil angge saharoho wilipuk hag aheg, ne e lak omanggen yatdoho belapuk hag aheg, duhup.

⁷It enebe enoluk wereg lit, yaho angge ahanuk sipuk-sapak laharuk hag eke nim saha uruk kamuhup, ne enebe e zaitun enggela ilmu buhundeg hag welaheg, amben ebeahun deg alere e lak amben hag welaheg, deg lamuhup!

⁸It enebe An nakit sombandoho wamuhupdeg, An nalong apma welamuhup. Gandum yabuk kwenang hesiligmu wilipuk hag, ne anggur yabukmu en duruk hag, mun hafugdoho wilipuk kwit sig atuk kamuhup. O Libanon fam en anggur ahaik fahet unuk bogdeg wereg hag, it enunuk airoho bogdeg welamuhup.

⁹Ap homi Israel on en de it enanggembu ahut ilitdeg omano hwik-esahup; it enebere An den hwal-enepuk wereg lit iren somban uruk on nesanggo holduk karuhuk. E wilibig on enggela humdoho deg hag, An den it kanggunuroho fahat enusug laruhuk. It enobam fanoap deg laruhu angge etma indip de An neg. An TUHAN en nele mundoho ihi” ebag.

¹⁰Ap homi enenda wenggeleg on en de suma baleg on au furebeheg wenggeleheg, deg ale furebeheg duruk kamag. TUHAN diyug ulug uruk on de demdoho on, ne ap demdoho on en de diyug uruk ale etma higitdoho duru kwit wereg. Famen ap siag duruk on de embeselug duruk fam de dahandoho bule wamburuk.