Read Ninia Yali HOSEA 2 Bible Online

HOSEA 2 - Ninia Yali bible

HOSEA 2

¹Anggere hit henori on etma fam wol-enepuk kwit, “Allah omaliki on” eheg “TUHAN en enda hundig-henepuk on” eheg, duruk kamuk isi.

²TUHAN en uruk kwit, “Yaho nomaliki, henesinga re An nohwe fug, ne An de at ahun fug. Anggere aren babi deheg, uang heraruruk kwit hambena deheg, duk no re awene baliyug.

³Ne, aren lahe uang heraruruk kwit hambena neg duruk halug, at ebe endag-atsi li em abulukwe kohouk endag-atsi hag amag ulug An den asum nonggol esahuk. An den at ebe kwenang iringgig on mel unggul ahap neg deg hag debeheg duhukmu at ebe ik ahe en wat aruhu.

⁴Hit at omaliki re An den nenda hundig henebuhuk fug; hit de uang heraruruk kwit hambena duruk on ambiangman endag-atuhup.

⁵Henesinga re hwe hambena mun enggali eleg angge neg duruk on. Aren uruk kwit, ‘An den it nenda hundig deg on ik mel siburu mel, kain wol, kain lenan mel, zaitun ahalue mel, anggur mel og-nutuk on etma enekit lamin.’

⁶Ai fam, An den at ebe alog-alog angge fam hukdoho kwelabe fohukdeg, at anggobokwe re fak lehet fam kwe bale fohuk.

⁷Aren it enda hundig enepuk on etmano mug-eneplug lahu famen it enekit aik lahu fug. Aren it hera enebuhu famen it hweag-enebuhu fug. Airoho duhureg aren uruk kwit, ‘An de endam nebe fanoreg latihik, ne ketia re mun nong-hong deg lahimu re, An de nahun keram on fam sombandoho akit lamin’ uruk karuhu.

⁸Hit henesinga en de An den gandum, anggur, mel zaitun ahalue mel, ne emas, perak mundoho aren kembu Baal apne wauk kwit duruk angge etma fahet mel, ‘TUHAN en og-nitsi on’ uhu fug lit deg.

⁹Ai fam, anggen yihig balduk li em de An den og-itihik angge, anggur mel, gandum mel, sum wol, kain lenan, mel An den at asum wan-duruk on amag ulug og-itihik on etma nikangge lit dahuk.

¹⁰An den de it enda hundig enepuk on enolohotman abuluke kohouk debehuk. Mu re it etma misig en oho An nalong wereg on fam en loloho fohup fug.

¹¹Iren pesta esetuk on etma An den bale fohuk, aire iren bigalem misig fam esereheg, tahun misig fam esereheg, nukoho sabat fam esereheg, duruk on etma bale fohuk. We il horogdoho re iren on Baal obahet duruk on etma mundoho bale fohuk.

¹²Aren anggur mel zaitun mel fahet it enda hundig enepuk on etmano enobahet durukmu ambiangma hwelauk on ulug uruk on etma An den mundoho elehap debehuk. Anggur yabuk wirig mel ara yabuk mel etmano An den ahamdoho enggela ohwei debehuk; mu re maro on en mundoho siahap deberuk kamuhup.

¹³Aren nukoho Baal obahet amben angge dupa werako feik laheg, ne An anyo mundoho apelehap nobahalug, at ebene alili angge lahaboho at enda hundig enepuk on etmano mug eneplug lauk ale ai fahet An den unggum og-uruhuk. An TUHAN en mundoho nele ihi” isi.

¹⁴TUHAN en uruk kwit, “Ai fahet An den o ili angge leimu walug lahukdeg, etman An den nele buhun fam onggonoho enda wahuk.

¹⁵ Ahan anggur omano nikangge at og-uruhuk, ne anggin-fanggin donggoma boruk on aire An den enenda ebereg wereg on debehuk. Mu re etma aren ebe sauwereg lit hagdoho o Mesir en ket wilibik waharuk kwit deg latsi hagdoho An og-napuk karuhu.

¹⁶Airoho dulug aren de An nebe fahet nahun uruk karuhu, ne nom Baal[4] uruk karuhu fug.

¹⁷Iren Baal unuk eke uk no ulug An den debehukmu re Baal unuk ai iren mundoho enapeleg amuhup.

¹⁸Eta li em de An den di on su on enoluk wereg angge nim sali watuk kwit An nomaliki enele ying enebuk fug ulug sali waruhuk. Weim yapuk on etma An den bale feheg, ne An nomaliki enobam enanggwenang fam etman dog angge mundoho oko amumu embeseik lahukmu, it enebe enakol eleg angge mun enenda seroho welamuhup.

¹⁹Israel hat de An den nohweap habuhuk, An nohwe fem on mundoho-mundoho fahet habuhuk. An den hat hebe nenda hundig habeheg, nenda husug laheg, duruk karuhuk, An den de demdoho neg deheg, dipdoho neg deheg, duruk karuhuk.

²⁰An nele sali irihik ale higitdoho, An de hat nim lombo amuhuk, Haren An nebe fahet de, an nakni TUHAN ulug fag-duhun.

²¹Eta li em An nomaliki Israel[5] on en somban urukem, An den holduk karuhuk. Bohol fam en An den osit belabik waharukmu, anggur anggen mel, gandum anggen mel, zaitun ahalue mel foruk karuhu.

²³ An den it nomaliki enobam enehayegdoho neg welamag ulug debesehukmu, it enebe enanggwenang fam yugdoho welamuhup. It eke enobam uruk kwit, ‘Enda hundig enepuk eleg on’ uruk on etma fam, An den nenda hundig enepukmu kahi ale fahet unug esahuk, ne it eke enobam uruk kwit, ‘An nomaliki on fug’ uruk on etma fam, ‘Hit de An nomaliki’ uhukmu, Iren onggo uruk kwit, ‘Hat de nit nenakni Allah’ uruk kamuhup” isi.