Read Ninia Yali HOSEA 3 Bible Online

HOSEA 3 - Ninia Yali bible

HOSEA 3

¹TUHAN en an nobam uruk kwit, “Hat hebe nikangge lalug de hwe uang heraruruk kwit hambena duruk on ai fam henda dik lakin. At aire ap homi Israel on en An nebe nobahalug laheg, ilah amu on apne weheg, ne kue kismis kembu fahet[6] folug og-ereheg duruk famen An den nenda hundig enepuk kahi hag haren oho at ai henda hundig diyug,” ulug isi.

²Ai isimu re an den hwe anyo wamin ulug de uang perak on lima belas en hundutihik deg, ne gandum [7] anggen 150 kilogram en onggo ferihik.

³An den at fam uruk kwit, at de an nangno neauk kwit li alongdoho welaruhu. Ne, airoho wereg lit etare aren hambena deheg, babi deheg, duruk karuhu fug. Ne, an den oho at horogma aik lauk karuhuk fug, irihik.

⁴Ai hagdoho unggul unuk Israel on oho duhup; Li anunuroho it enowesi raja oho melal-enepuk on oho eleg angge welamuhup, ne wam waroho fouk eleg angge welaheg, ousa ulug obale hilinggig eleg angge welaheg, ne fobik diroho welamuhup ulug fagdoho hweag-esauk on, kembu oho, hwal ale oho eleg angge welaheg, duhup.

⁵Famen li andigim aik waruhu on fam de unggul unuk Israel on nikangge sombandoho enakni TUHAN Allah akit waheg, ne enowe raja hun Daud ambiangma on anyo akit waheg, duhup. Airoho watlug iren TUHAN fam along bolug enakoldoho leho feheg, Aren fanoap enepuk angge etmano hweleheg, duhup.