Read Ninia Yali HOSEA 4 Bible Online

HOSEA 4 - Ninia Yali bible

HOSEA 4

¹TUHAN en it ap homi o su wereg on nim wene wereg. Anggere Israel on yei wene nangginoho uruk on ai furoho holduk kamek, “Kwenang su fam de furoho duruk on mel, enenda hundig duruk on mel wereg fug. It ap homi oma wereg on en An Allah anyo ulug demdoho enambilik fam fag-duruk fug.

²Iren duruk kamuhuk bolug hombuk balduk famen uruk ale higitdoho duruk fug;[8] it de seiale eheg, ap wareheg, herako weheg, babi laheg, durukmu siag ale dopno-dopno hum ail laharuk kwit, ap watuk on neg ekenim dopno ail lauk.

³Ai fam de kwenang su mundoho bug iring aruhu, mun-man angge kwenang au fam oluk wereg angge mundoho waramuhup. Oluk-oluk angge kolo kwe daruruk on mel, kwenang fene wereg angge mel, ik laut ilonggoma wereg angge mel, mundoho eleg amuhup,” isi.

⁴TUHAN ele hweag-esauk kwit, “Hit Imam on suma yei, hiren An nomaliki on siahap debeseheg suahal bet enebeheg, duk fug, hit neg de An den siahapdoho henobaharuk kahimu anggere hiren nomaliki siahap debesouk fug.

⁵Nukoho en hubanggo re hit siag ale neg duruk kahep, ai hagdoho it nabi on oho airoho neg duruk. Ai fahet hit henesinga Israel ai An den elehapdoho fohuk.

⁶Hit imam on en An nobam funobahauk fug angge duruk kahepma ap homi An nomaliki en oho An nobam funobahauk fug angge duruk mu, henamelmeldoho welamek. Hit de An den hweag-hesauk kahi ale omano domako embeseruk kahep. Ma re An den oho hit domako embesehuk. Hit henomaliki An nobahet imam on welam alereg ulug An den it fahet fag-duhuk fug.

⁷Hit henebe humdoho dopno atuk kwit hit henesiag oho dopno-dopno dil An nobam foruk kahep. Yaho hit imam henap sure! Airoho duruk kahep ai fam, hit henebe deg lahep ale oho An den fobik aham debehuk: Ai Hit de eke nim leho henobaharuk kamuhup fug, we enal belesim wat-hesauk kamuhup.

⁸Hit de An nomaliki en siag duruk fam hit henenggik werehap-dauk kahep, ai fam it siag neg duruk kamag boruk kahep.

⁹Ai fam ap homi enobam anggin-fanggin hauk eta hag hiroho airoho hahup! An den de hiren duruk kahep ale eta higitdoho unggum henobam og-hesahukmu hahup.

¹⁰Hit henebe re di on su on ap homi en feik waharuk angge etmano nauk kamuhup famen obokdoho neg welamuhup. Hiren dewa di angge su angge hesilduk on ulug anyo apne wauk kamuhup famen, hiren An anyo embeselug kembu ilah amu on etma fam apne wauk kamuhup ai fam, ap homi eke nim endag-atuk kamuhup fug,” isi.

¹¹TUHAN ele uruk kwit, “Yaho An nomaliki yei, anggur endamon oho ket on en oho hiren fanoroho duruk ale wenggelukwag ulug on etma elehapdoho henobahasimu welahep.

¹²Hiren e kong baleg dorangge fam biloho hweag-nesowag ulug heng uruk kahep! Ma domuk misig eke en biloho hit neneluk alep ulug henenda boruk kahep ale etma hweag-hesauk! Hit de hwe eke ahun wereg on deg liren uang heraruruk kwit hambena neg duruk on hag deg lit An fotog nealug ilah amu on mutlug lauk kahep.

¹³Kembu mot-duruk kahep kwe etma re duk-duk emberim kwe mel, dom-dom emberim kwe mel, hiren at kembu fahet waroho yale foluk amben fano angge omano e indip humon apma etma re mun sakoma ulug yalduk kahep. Famen de ambiangma re nanggin atuk? Henahwelani omano hambena on neg atuk, ne heneyamal homi omanore babi neg lauk!

¹⁴Famen de An den it duruk ale fahet unggum og-esahuk fug, aire hit famen ohore lalug it uang heraruruk kwit hambena duruk on etmano enakit kembu obam wirig kwe etma yabuk durukmu hinim hambena[9] dik lauk kahep. Airoho lalug hit it nim seberoho foruk angge omano kembu dewa fahet yaloho foruk kahep. Ma airoho duruk kahep ale etma fahet wene ap en uruk kwit: Ap homi enunggul unuk Allah ebe wereg ale fahet wenggelduk ale eleg angge duruk on de it enebe nal-amuhup.

¹⁵Hit ap homi Israel on en An nobam henenda dipdeg lit duruk kahep fug! Famen it Yehuda on en oho hiren duruk kahep ale eta hagdoho duhup hayog ahi boruk kahi. Hiren o Gilgal ulug oho ne o Betel[10] ulug oho wene kabog-dul ulug duk fug. O etman TUHAN Mun oluk wereg ahun anyo unuk fam hombuk baluk fug.

¹⁶Yaho hit Israel henap de henenda mun haroreg lahep on! Airoho deg lahepma re keroho An den domba enggela leimu hwalduk hagdoho hwal-henebihi ha alereg?” isi.

¹⁷Israel enap de kembu en enenda kahalsi. Anggere it de embeseyek.

¹⁸It enebe anggur humdoho nauk angge en siomorulug de it enendama enahayeg hauk aleroho hambena neg duruk anggere embeseiyug. Ite enalong debeseruk ale aire maben hag bolug enal belesim wat-esauk ale aire fano bolug duruk.

¹⁹Ai fam it enebere hol en fi esaukmu hagdoho eleg amuhup. Iren kembu dewa fahet ulug waroho og-utuk angge omano fahet it enenggali amuhup.