Read Ninia Yali HOSEA 5 Bible Online

HOSEA 5 - Ninia Yali bible

HOSEA 5

¹TUHAN en uruk kwit, “Yaho hit imam on henesanggo holiek! Hit Israel on de furebeyek! Hit raja ambiangman ondoho lahep on holiek! Unggum de hit henobam mundoho wambik wahareg wereg. Hiren bilinggoho ayo wit enepuk kwit dipdoho duruk kam on omano, hiren o Mizpa fam sabu yepdeg hag, ne o Tabor Dom fam sapna leho hag debeheg,

²o Sitim fam bohwe ele yatdoho habulig hag debeheg duruk kahep. Ai fam An den hit unggum henobam fohuk.

³Yaho hit Israel henap! An den hit henebe fam deg lahep ale fahet di ale su ale mundoho noluk deg. Ma re haren eke heraho ale hag debehen fug ha alereg. Hat de kembu apne wauk kwit An nobam dipdoho duk fug angge welahen. Ai fam ap homi haron en An napne wa fug alereg,” isi.

⁴Israel enap en siag duruk katswa on fam de it enebe sombandoho Allah akit wam fug ale atswa. It enebe re kembu en mundoho mako bug enepsimu re TUHAN anyo fahet ebet ha fug angge duruk.

⁵It Israel on enawonog atuk alere mun enameg deg ma re it siag duruk ale anyo indip enam atuk. It enesiag elekwe re dungdoho wat-dauk kwit ying-atuk, ne it unggul unuk Yehuda on oho it Israel on nim seberoho ying-atuk.

⁶Iren domba mel sapi mel walug lalug waroho TUHAN og-umul ulug TUHAN herarik lauk famen abirangge etma re we alemaroho duruk. Ai indip TUHAN en it mundoho lin-esasimu At ebe iren hweahauk fug alereg ma.

⁷Iren TUHAN fam dipdoho duruk fug; it enomaliki wereg on etma At omaliki re fug. Ai fam de we il misig welatlug it enebe eneyabuk yaho nim mun elehapdoho fesehu.

⁸O Gibea fam etma trompet furiek! Weim yabukoho eneg ale fahet o Rama fam etma aplohok diek! O Betel[11] fam etma enap diek! Yaho hit Benyamin henap henebe lalug weim yabik kwiek!

⁹Israel ebe fam unggum og-utuk ale fahet mundoho horog aik waha ma re at ebe mundoho eleg aikohoreg. Hit ap homi Israel on holiek, wene aire demdoho aikohoreg.

¹⁰TUHAN en uruk kwit, “It Yehuda on enowesi melal-enepuk on en Israel on enowarik kuruk kwit enanggwenang deloho hwelausa ma An nolok atsi. Ai fam de ik fu waharuk hagdoho An den it enobam unggum feseik waruhuk.

¹¹Israel on mundoho enomamne hasimeg sebel esaukmu re; aren furoho let duk fug on etmano fam let nabukwag ulug heng ik lauk famen at anggwenang akniap deg on anyo eleg aik lauk.

¹²Ai fam An den unggul unuk Israel on mun luluhun esahukdeg, Yehuda on elehap debesehuk.

¹³Unggul unuk Israel on mel Yehuda on mel en it enebe fam mun siag ale aik waharuk on fahet furebehupdeg, Israel on de o Asyur hun raja leho on ai en let nenebik wamag ulug akit lahup. Famen raja en it let enebeheg, enebe deg ale buhun-debeseheg, duhu fug.

¹⁴No singa en housalug sahali uruk hag, An den ap homi Yehuda on mel Israel on mel fam enowarik waruhuk. An namu en neg enebe dilip-dalap esahukdeg embesehuk. Ne, An den it lit eneplug laukmu re ap homi eke fiselaroho wilibi fesouk fug alereg.

¹⁵An nomaliki etma mundoho embesehukmu, it enesiag ambiangma anggin-fanggin hahupdeg An hera nabik wamuhup. It enebe airoho anggin-fanggin hauk kwit etma sahalimu en An hweag-nabuhup ane” isi.