Read Ninia Yali HOSEA 6 Bible Online

HOSEA 6 - Ninia Yali bible

HOSEA 6

¹It ap homi Israel on enele uruk kwit, “Manik nit sombandoho TUHAN akit lakohon. Aren nit ouk-bouk nenobam foruk, famen aren nit nikangge hiling nenebuhu lit deg, Aren yebilangge ap nenobahasi anggere Aren neg nenayebil oma het-nenebuhu fug no a.

²Nukoho birenam henahanam eya fam Aren nit fano hiling nenebuhu mu nit neneluk At along apma fano welamuhuk.

³Ai fahet de yaho niren dik-demdoho TUHAN neneluk amul mu At demdoho nit nenekit waruhu lit deg, seleg kwelabik waharuk hag, osit belabik waharuk angge en kwenang sako duruk anyo hag waruhu,” uruk kahep.

⁴Famen de TUHAN ele uruk kwit, “Yaho hit Israel nim, Yehuda nim! An den hit nim nunggwe ale dimin? Hit henenda hundig napuk kahep on anyo hena mel, lil mel, hubet folo-folo eleg atuk anyo hag eleg atuk.

⁵Ai fahet de, An den nabi on An den hit unggum og-heseheg, elehapdoho henobahakeg, duhuk ulug wene katukdoho balduk kahi ale omano hweag-hesowag ulug mon-enebik waharuk kahi ai. Mu re An den hit fam en nendareg lahi anggere mun enegdoho seleg deg.

⁶ An mun nahayeg deg lahi alere, nobahet folug yalduk kahep on etma re we hareg famen, hit An heneluk atlug henenda hundig napuk kalep, boruk kahi.

⁷Famen de o Adam[12] etman hag, hiren sali An ninim watuhup on anyo dahandoho duruhup.

⁸O Gilead etma kota ap enolok on en hoporeg ma, ap watuk on humdoho wereg.

⁹Imam kota ai wereg on etma re ap kwema laukmu kwe bal eneplug enangge del-dauk on esan hag deg. Kobokwe o enegma Sikhem laul ulug lauk on oho kwe bale feselug enowatuk! Kwasik ale ai iren enenda wenggele folug eneluk deg liren duruk.

¹⁰Israel wereg on fam etma hauk kahimu di ale su ale An nalitno ale neg duruk on de: An nomaliki kembu mot-duruk on fam enonggwareg en emere fahat-dauk.

¹¹Hit anyo henobahet de, yaho hit ap Yehuda on yei, An den hit oho unggum og-hesahuk ulug wepdeberihik, aire hit en duruk kahep ale etma fahet” ebag.