Read Ninia Yali HOSEA 7 Bible Online

HOSEA 7 - Ninia Yali bible

HOSEA 7

¹Airoho ebagdeg TUHAN en uruk kwit, “Hundig-handig An den nomaliki Israel on enebe hiling enebeheg, buhundoho feseheg, dimin bolug duruk li em etano esauk kahimu re we enesiag neg deheg, enolok fam deheg, neg duruk. Iren de seiale lal-lal aheg, ap homi enobam kulug herag da kweheg, ne koboke kwe en deloho hweleheg, duruk.

²Iren enolok fam duruk ale etma fahet An den ebet nenebuhu anyo mel enendama ebet aik waharuk fug. Famen de it enesiag en sal enusugmu An den mun ebenamegdoho esauk kahi.”

³TUHAN ele uruk kwit, “Ap homi holduk on en enele seiale en lal heheg raja mel at autsi apma yabuk duruk on mel enendama enahayehap debesoul ulug duruk kwit enobabut enolok fam duruk.

⁴It enebe abirangge re ap yohwatni dipdoho duruk eleg on. It enehummu enerim bolug duruk on etma re ap roti wutuk on en, aren menenduk angge anyo owan fouk debouk fug li em indok ambulbul debouk fug angge wereg anyo hag deg.

⁵Nukoho raja en pesta duruk li em de ap homi etmano en raja mel autsi apma yabuk duruk on mel ik anggur ahaik siomo enebukwag ulug og-esalug mun morue ale duruk. Airoho deberukmu ambiangma re raja anyo it ap yohwatni etmano nim ahayeg-ahayeg ale duruk.

⁶Indok ulanggen ohoma nonggwaleg hag iren enolok fam deboul ale ulug duruk on etma airoho deg, ne it enolok enahum ahe anyo hupanggo enahummu laharuk kwit neg welatlug, hubet de indok ambulbul mun olok on kulung duruk.

⁷It enolok ahe laharuk on anyo fam enowesi melal-enepuk on etmano mundoho enowatuk. Iren raja omano eke atam eke fobik deg enowatswa. Famen enebe fam orohole siag miroho etma atuk kweleg de ap misig en ulug oho An den let enebukwag ulug nobam somban uruk fug,” isi.

⁸TUHAN ele uruk kwit, “Unggul unuk Israel on de unggul unuk amu on at maseroho wereg on etmano nim misig seberurukmu, it enebe re roti hwilim deg on hag deg.

⁹Iren unggul unuk amu on nim seberuruk ai fam it enomamne eleg atuk ale anyo fubi deberuk fug. It eneluk welamuhup fahet mundoho ambiangma aik waharuk famen it de enapelegdoho wereg.

¹⁰Israel on en enawonog atuk ale anyo re mundoho ebenamegma deg ma it enesiag duruk ale anyo indip enam atuk ai. Mundoho etma atuk famen iren sombandoho An enakni TUHAN Allah anyo nakit waheg, An hera nabeheg duruk fug.

¹¹Israel de suwe yalma kubil on en lag-wag uruk hagdoho duruk. Keram iren Mesir fam let nenebiek ulug heng enepswa. Ai en ombolim de Asyur fam let nenebiek ulug buroho heng enebik lausa!

¹²Famen iren hundig-hundig airoho laul ulug laukmu re ap en sabu yep debelug suwe luhutuk hagdoho An den sum ahe yihig leho folug welaruhuk. Iren enesiag duruk ale An noluk deg ale eta fahet An den it unggum og-esahuk.

¹³Iren An nobahalug lauk anggere it enebe alemat atuk kamag. It de An nim ildoho duruk anggere it enebe mundoho luluhun atuk kamag. An den it enahap wendat-eneple ulug nenda boruk kahi famen iren An nobahet duruk on etma re we hwenaroho on neg duruk.

¹⁴Iren enenda dik-demdoho fam An nobam somban uruk fug. Iren somban uruk kwit halug de it enebe nohorukmu etmano ying-atlug, ap homi An nobam demdoho boruk eleg on en duruk hagdoho oba yatuk. Iren lahe gandum mel anggur mel heng napuk kwit halug de ap kembu dewa apne wauk on en duruk hagdoho enebene enahap bal-dauk kwit heng napuk. Iren mun dik-demdoho An nele sahaloho duruk.

¹⁵It enebe re An den kul enepihikdeg wirige feserihik famen it enebe misig atlug An nele sahalduk.

¹⁶It de hundig-hundig dewa enalong wereg fug angge etmano mutlug lauk. It fahet de wereg bouk fug alereg, it enere sehen enggela sapulag on hag deg. It enowesi melal-enepuk on en de enawonog fam enele uruk, ai fam de it enebe dog ambiangman enowaruhupmu waramuhup, it ap homi Mesir on en unda yag enepuk kamuhup,” isi.