Read Ninia Yali HOSEA 8 Bible Online

HOSEA 8 - Ninia Yali bible

HOSEA 8

¹TUHAN en uruk kwit, “Ap eneselei on de suwe ikwesahop en aren senggelduk angge senggelikoho sebelik waharuk hag, An nobam etmano it selei on en weim yabik waharuk anggere, weim waha ulug eneg ale bohweap fu diek! An nomaliki en de An ninim wene sali watuhuk on anyo dahandoho deheg, An den hweag-esauk kahi on anyo sahaloho deheg, duruk.

²Iren An nobahet nenakni Allah uruk, ne it enebe re An nomaliki An nebe enoluk deg on uruk,

³kwit en it de fano angge hwelauk ale etma enerim duruk. Ai fam de it enebe ap selei on en mug-esahup.

⁴An nomaliki en An boruk ale hein og nea fug angge ap raja momaloho unduhuk foruk. Iren de it melal-enepuk on etma An den fano boruk eleg kweleg unduhuk feseruk. Iren de emas, perak mel iren on hwelalug kembu ahut wiroho duruk fam it enebe mun siag aik lauk.

⁵An den ap homi Samaria on en sapi emas on fam apne wauk on ai fahet mun nerim esauk kahi. An den it enobam mun nolok enepuk kahi. Iren kembu apne wauk men neg enebe alema re fahat-dauk kwit weregman neg de ke huli welamuhup no?

⁶Sapi iren apne wauk on aire it Israel enap lalduk ale enoluk on en laleg angge! Aire ebe Allah fug anggere mun luluhun esahup fano!

⁷An nomaliki en hol yatuk halug de sielu bal-dauk kamuhup! Gandum yabuk yaho on wirik atuk eleg halug de it nauk on fahet tepung werehap-dauk kamuhup fug. Famen gandum etma mun wirik alepman famen ohore ap enunggul unuk amu on en nauk kalep.

⁸Waruk kwenang on erap duruk hag, Israel on de mun siag ahesa, ne enebe re unggul unuk we amu on deg hagdoho ahesa. Ma re Israel en di ale su ale duk fug ale on aha.

⁹No keledai maro on en kwani hauk hag Israel on en enemu enenda boruk ale neg duruk. Iren de Asyur en let nenebukwag ulug herarik lauk, ne enunggul unuk amu on mel ninim seberukohon ulug onggo balik lauk.

¹⁰Famen An den it enebe andog debeselug it unggun og-esahuk.[13] It enebe raja Asyur on en al berel esaukmu re we horog ketia eiya fam ouk en nenek-yobaruhup en deg.

¹¹Ap homi Israel on en enesiag elehap duruk kwit ulug mezbah humdoho wutuk kweleg de, it enesiag duruk kwe obale etmano ohore hum ale neg deg!

¹²An den it mamul-enepuk on fahet ulug wene humdoho baldihik famen de, iren aire nit ninim en duk ale eke wereg fug ulug abirangge etmano domako embeseswa.

¹³Iren de wam waroho An nobam og-nutuk alere mun enahayeg deg, ne wam anyo ino baleg de it nauk, famen An TUHAN en de iren airoho waroho feik waharuk angge etma nerim deg lahi. Ketiare An den it enesiag duruk on etma ebereg lit de it enesiag onggo unggum enobam fesehuk; An den it enebe nikangge sombandoho o Mesir mon-enebuhuk!

¹⁴Ap homi Israel on en enobam sili-bumbuk wit-dauk famen iren de wal-enepfag ahun anyo enapeleg atuk. Ap homi Yehuda on en enobam kota hembit angge et wutuk, famen An den it enobam bumbuk mel, enobam kota mel etma han nowag ulug indok belabik waruhuk,” isi.