Read Ninia Yali HOSEA 9 Bible Online

HOSEA 9 - Ninia Yali bible

HOSEA 9

¹Yaho hit unggul unuk Israel on, hiren nukoho leho on etmano fahet ebetuk kwit halug de it enunggul unuk amu on en duruk etma hagdoho duruk kam fug. Hit de henakni Allah anyo embeseruhupdeg At obam dipdoho welam fug angge duruk kahep. Gandum anggen lolduk kwe[14] omano mundoho re hit henebe uang heradauk kwit Dewa Baal fam hambena duruk kahep, ne hit de gandum dewa ai en onggo og-nesauk ulug hwelauk ale fahet henahayeg deg lahep!

²Famen we il misig welatlug eta fam hit de henangge gandum anggen mel, zaitun ahalue mel, anggur mel mundoho elegdoho welamuhup.

³Yaho hit Israel on de kwenang henakni TUHAN en hit og-hesasimu etma femdoho welamuhup fug. Hit on foma re nikangge sombandoho o Mesir lahup, ne foma re o Asyur fam etman nauk angge re saliog angge on[15] etmano nauk kamuhup.

⁴Hit ap bohon enanggelegma etma wereg lit hiren anggur mel wam mel TUHAN endama ahayeg howag ulug folug og-utuk kamuhup fug. Hiren nauk kamuhup on etma re ap waratuk mu fongma wereg lit naukmu emet enepuk anyo hag emet henepuk karuhu. Nauk angge etma re we henahummu homo henebukwag ulug nauk kamuhup famen dorangge eke o TUHAN Obam wirigmu etmano og-umul en ulug walug lauk kamuhup fug.

⁵Nukoho soni esetuk kwit TUHAN along bolug leho foruk salim de, hiren ai ebetuk ale fahet di ale su ale duruk kam fug ale atuk karuhu.

⁶Anggin on henobam aik waharukmu, ne hit henebe og-heneplug o amu on fam laukmu, it ando hit henesahali kwe wereg on etma re ap homi Mesir on en enowatul en ulug andog debeselug o Memfis en sal enepuk kamuhup. Enggelangge mel alog-alog angge mel de hit henobam wirig laruhu kwe etma mel henangge onggo wereg angge perak mel etma fam salduk karuhu.

⁷ Unggum hwelahup li em mundoho aik waha, iren duruk on etma ambiangma hwelahup li em fahet li horog aik waha. Israel on en ambiangma hahup en wereg! Hiren uruk kwit, “Nabi heime mun sohou on obam wereg lit duruk on! At ebere mun wenenebo on!” uruk kahep. Hiren airoho uruk kahep ale aire hit henesiag humdeg ma an henerim napuk kwit uruk kahep.

⁸An de nebe nabi wereg lit hit TUHAN omaliki henolugap henobaharuk kamag ulug Allah en mon-nabik wahasi, famen di kwe su kwe an lauk kwe etmano re suwe fahet hagdoho an sabu yep napuk kahep. O kwenang Allah onggwareg on etmano fam en ap homi nit nabi etmano il nenepuk.

⁹ Hiren duruk kahep on etma re mun henolok hum aleroho, ap en o Gibea[16] en duruk katfag hagdoho duruk kahep, ma re hit kwasikdoho duruk kahep on etma Allah en ebet hahureg, hit henesiag fam unggum og-hesahu.

¹⁰ TUHAN ele uruk kwit, “Keram An den Israel hweag-dauihik li em de ap en o ik inggi leimu en anggur anggen hweag-dalug enahayeg hauk hagdoho hweag-enepihik. An den keram it henombasi esauihik li em de ap en e arah anggen keram on halug enahayeg hauk hagdoho nahayeg hauihik. Famen ketia it enebe Dom Peor fam lalug kembu Baal apne wauk katfag fam enebe emet atuk katfag hag, de it oho dewa iren enenda hundig duruk on ai ebe emereg hagdoho emet atuk mu An nerim boruk kahi.

¹¹Israel on enalong wereg ale aire suwe daroho longgo uruk hag eleg aruhu; iren enomalik enahummu aheg, enomaliki endag enebeheg, duruk kamuhup fug.

¹²Famen iren enomaliki endag eneplug kuloho logap enepuk kamuhup famen oho An den wauk karuhuk; misig ulug oho eke enoluk feseruk karuhuk fug. Yaho hit Israel on, An den hit fotog henesauk li em etare we henebe alemaroho welamuhup!” isi.

¹³TUHAN nakni, an den esauk men de it enomalik etmano sik-mug esalug binggi enowatuk mu esauk kahi.

¹⁴It ap etma fahet An den Hat hobam nunggwangge heng habihi ha alereg? Homi iron etma re ibiliap debesein! Ne, it enomalik etma ag mon-enebuk fug angge embesoukwag ulug debesein!

¹⁵TUHAN ele uruk kwit, “Iren enolok hasimeg duruk on etma re o Gilgal en indip debag. Airoho debag li em eta huli en An den it nerim enepuk ale indip dirihik. Ne, iren enolok fam duruk ale ai en An den o nanggwenang fam suman muko wilibi fesehuk. An den it fam nenda hundig enebuhuk fug; It enowesi melal-enepuk on abirangge en de An nele sahale folug neg duruk.

¹⁶Ap homi Israel on de An den unggum og-esahukmu, it enebere a yaho on omanggen bug aheg, anggen yihuk fug angge welaheg duruk hag amuhup. It enomaliki ondoho lamuhup fug; ne it enomaliki ondoho lamuhup famen oho An den mundoho binggi enowaruhuk” isi.

¹⁷Ap homi Allah omaliki en de Allah an den obahet duruk kahi on anyo At ele holduk ale nenerim ulug embeseswa ma, it enebe re ap homi enunggul unuk amu on enesahali kwe dag watuk kamuhup.