Read Ninia Yali YOEL 3 Bible Online

YOEL 3 - Ninia Yali bible

YOEL 3

¹TUHAN airoho ebagdeg eke uruk kwit de, “Eta li em de ap homi Yerusalem on mel, Yehuda on mel atam fanik-fanoroho welatswa eta hag airoho welamuhup en enebuhuk.

²Airoho debeseruk kwit ap homi enunggul unuk domog An den kabogdoho feselug, o Lembah Penghakiman etma og-eneplug lahuk. Og-eneplug lalug de An nomaliki Israel on o di kwe su kwe buhuloho wilibi feseswareg eneyabuk mundoho sumbut dausa. Ne airoho duruk kwit de iren enamingming angge amag ulug An nomaliki sene feselug de sa atmisi ulug helep anggen hagdoho wal-heheg, enamingming angge on aheg, ne onggo it eke fam uang bal deheg, uang aire homi hesangge enepuk on fahet foruk kamul ulug hweleheg, enahwelani duhum on oho enomaliki sauwe on oho onggo bal-deheg, ne uang anyo fam de iren anggur ahaik fahet onggo hundutul ulug eheg, duruk katswa. Ai fahet de unggum enobam fesehuk.

⁴ Hit ap homi Tirus on mel Sidon on mel ne ap homi wilayah Filistin on di kwe su kwe welahep on mel, hinim en de An nebe nangginoho nobahaul ulug duruk kahep? An den siahap henepuk katihik on fahet henendama eberoho sebeleg latuhupdeg unggulmu foul ulug a? Hiren An fam diroho suroho eke napuk kahep halug de, An den de hit henonggwareg henobabut fam unggum henobam folug onggo lahogdoho hit folo-folo siahap henobahakuk.

⁵Hiren de An den on emas mel perak mel di angge su angge onggo hum angge mel henenggik abusag walug lalug henanggembu indip wereg ma etma feik lauk kahep,

⁶ne ap homi Yehuda on mel Yerusalem on mel inim de enobam indipmu embeselug o yatma lalug welamag ulug boruhupdeg de ap homi Yunani on fam onggo weheg, duruhup ai.

⁷An den de it enebe onggo bal-enepuhupmu wereg kwe etman de andog-enebuhukdeg de hiren henobabut mun siag fam enepuhup on ai onggo lahogdoho re henonggwareg siaho henobahakuk.

⁸An den de hit henomaliki ap on mel hwelani mel de ap homi Yehuda on fam onggo wahuk. Airoho wahukmu, iren de ap homi Syeba on yatma on etma fam onggo wahup, ulug An nebe TUHAN en nele mundoho ihi.

⁹Yonggo wene su re ap homi enunggul unuk domog fam hweag-esauk kwit de, diroho iyuk. Weim yapul ulug fik fouk deheg, ap tentara enobabut mun haro on kabog debeseheg, enautsi mun neben heben on mundoho wamag ulug wol-eseheg, dulug de weim sinaloho manik.

¹⁰ Hiren kwenang habuldil lauk kahep on aire karog yaron pedang weim yapuk on fahet hilinggeheg, karog hiren di angge su angge balduk kahep on aire ap dal-enepuk angge hilinggeheg, diyuk! Ne it ap foma enebe maben on en de, An oho nebe tentara hag dihi halereg, ulug uruk kamag.

¹¹Yaho, hit ap homi henunggul unuk domog henebe o unggut-unggut mel esanggo-esanggo mel welahep on o donggoma etma weim yapul en de fol folo[2] lohwalik manik, ulug hweag-esakiyug,” ulug ebag. Airoho ebag ma it hweag-esebag on ai enebe waharukmu an den de, “TUHAN nakni Haren on tentara etman weim yabukwag ulug monde feseik wambin,” ulug uhuk.

¹²TUHAN en fobik eke uruk kwit de, “An nebe hwerieg wereg lit ap homi enunggul unuk domog An nomaliki on enaluluk kwe o di o su o unggum enobam feikoho welaruhuk en de enebe fik-fouk dulug o Lembah Penghakiman ayo wit-enebuhukmu etma wamag.

¹³ It ap homi etma enobabut mun siagdoho neg duruk ai en de, gandum a yaho on anggen mundoho wirik atuk mu balduk ai hag, loloho belap-enebeheg, ne anggur ahaik bereldukmu ahaik hwenanggoho ele hetag uruk ai hag de enebe mun sobit-sabat esakiyug.

¹⁴An TUHAN o ahae fotog salim anyo mundoho aik waikohoreg ma re, ap homi deng-deng angge mun wenahauk fug aleroho etma o donggo kong-enebuhuk on fam etma wereg.

¹⁵Mo inim bigalem inim il mum aheg, sohwalengen ombagbag duk fug angge welaheg, duhu,” ulug hweag-esebag.

¹⁶ TUHAN ebe Andom Sion fam wereg lit ele bag eheg, O Yerusalem wereg lit ele ululu sipuk deheg duhu. At ebe en airoho durukmu bohol inim kwenang inim elek duhu, Famen de At TUHAN en de it omaliki Israel de inibil aheg, enalong bal-enebeheg, duhu.

¹⁷Ai fahet de Aren uruk kwit de, “Yaho hit Israel henap, An nebe henakni TUHAN Allah anyo henoluk amuhup. An nebe re Nandom mun eneg on Sion anyo fam welaruhuk, Mu re o Yerusalem oho kota mun eneg on aruhu, ne ap bohon de o eke kwik lauk kamuhup fug.

¹⁸Eta li em de dom fene etma mundoho re anggur yabuk humdoho aheg, ne wam endetuk on de duk-duk kwe enggela hesilig on nenggeg, duruk kamuhup. Ap homi Yehuda on wereg kwe ik wirig atuk on etma re ik firitog atuk karuhu fug. Ik eleruk eke TUHAN Obam en wilibik waharukmu re, ik on ai en de o Lembah Akasia etma lauk kwit kwenang ahalue kwelapuk karuhu.

¹⁹Famen de Mesir de o lei enggelangge eleg on hag aruhu, Edom de mun lei birim-birim urukmu, ap homi etma welamuhup fug. Aire iren ap homi Yehuda on enobam weim sinalik kweheg, ap homi siag duruk ale mel enapeleg deg kweleg enowareheg, duswa ai fam.

²⁰It enamep fahet de An den oho unggulmu[3] fesehuk. An nomaliki enebe enowatswa on etma re An den enowaruhukmu waramuhup. Famen de Yehuda nim Yerusalem nim fam etma re ap homi wereg neg lamuhup, ne Dom Sion fam etma re An nebe femdoho wereg laruhuk,” ulug ebag.