Read Ninia Yali AMOS 5 Bible Online

AMOS 5 - Ninia Yali bible

AMOS 5

¹Nomaliki Israel on holiek o! An den hit henobahet suni re hunu suni misig wilibuhuk boruk kahi:

²Israel duhum owan deg kweleg bule wambisi, mu re at fobik eke nim inaruhu fug! At anggwenang onggwareg en on emberimmu etma fotog-esahup, at inamag ulug eke letduruk on wereg fug.

³TUHAN Mun Leho on en ele uruk kwit, “Kota misig it Israel on wereg ma en ap tentara enebe seribu en lohwaluhup, famen we seratus en neg sombandoho wamuhup; kota amu on en de, seratus en lahup famen de sepuluh en neg sombandoho wamuhup,” isi ebag.

⁴TUHAN ele omaliki Israel on hweag-esauk kwit, “Hit sombandoho Nakit manik o, hit airoho wamuhup halug de heneluk welamuhup.

⁵Hiren o Bersyeba kabog-dul en ulug la fug, ne An hera nabil o Betel la fug, Betel de mundoho eleg aruhu anggere. Ne, hiren o Gilgal oho la fug, ap homi kota ai wereg on de sabu hetdoho og eneplug wilibuhup anggere lafug” isi ebag.

⁶TUHAN akit sombandoho wamuhup halug de hit heneluk welamuhup. Ne, hit At akit sombandoho wamuhup fug halug de At ebe indok ambulbul hagdoho waruhureg ap homi Israel on harep fisako elehap debehu. Betel etma ap misig en ulug oho eke indok ai nahuluhu fug.

⁷Hiren katukdoho duruk ale anyo enden-fenden hauk kwit, demdoho on beselug ap enengge siahap deberuk kahep on oma henamelmeldoho welamek!

⁸ TUHAN en neg sohwalanggen bohol fene febag ai sohwalanggen unuk Belantik nim, sohwalanggen Kartika nim febag. Aren neg ahamdoho mum anyo seleg deberuk kwit, nukoho anyo hubanggo debebag; ik laut fam on hililoho kwenang ambue kwe hwik hebag. Ne, Abit ale ai mundoho debag on At unuk de TUHAN ai.

⁹Aren neg ap enomamne on enebe enalong baloho wereg ma ulug omano et elehap debeseruk.

¹⁰Hiren de ap wene katukdoho duruk eleg on omano enerim duruk kwit, ayo wituk mu omano en ele demdoho neg uruk on anyo henerim duruk kahep.

¹¹Hiren ap kunggu on sebel esalug, eneng gandum hit del-dauk kahep. Ai fam hit de henobam mun fani-fano kwe hiren wit dauhup kwe etma welamuhup fug. Hit henahan anggur ahaik heneyabuk wiroho yatil lauhup on omano en ahaik nauk kamuhup fug.

¹²Hiren nunggwe en kwasikdoho duruhup ale An noluk, ne humdoho siagdoho duruk kahep ale etma An noluk neg. Hiren ap fano on sebele feseruk kahep, ne hiren henehummu fano angge henenggik apmane hwelauk kwit, ap kunggu on omano ayo wituk mu omano en henele omamne fam bekitdoho bilingguruk kahep fug.

¹³Airoho duruk kahep ale fahet de, ap enggatdoho duruk on en de nukoho mun siag on airoho deg li ai bok welamag.

¹⁴Hit heneluk welamuhup anggere, fano ale duruk kamuhuk ulug wal hauk kamek, kwasik alere duruk kam fug. TUHAN Omane Humon anyo demdoho hit henesahalimu hiren uruk kahep hagdoho welaruhu.

¹⁵Kwasik ale duruk on ai henerim duruk kwit, fano ale neg henenda duruk kamek, dipdoho duruk ale fahet ning deberuk kamek. Airoho durukmu TUHAN en ap homi Israel on apuhuno etmano enda hundig henebuhu lit deg.

¹⁶TUHAN Mun Omane on anyo en ele uruk kwit, “Kobokwe o kota lauk on fene ap en enenda watdil lauk kwit oba yiye ahan lauk kwit enenda fu en de enobam anggin-fanggindoho duruk kamuhup. Ap yabuk duruk on fam oho ap wareg fahet nininim oba yarukohon ulug wol eneplug onggo bal-enepuk kamuhup.

¹⁷An watlug hit henobam unggum henobahaik waruhukmu, anggur yabuk wirig on abirangge etma fene en ap abirangge oba yatuk kamuhup. An TUHAN en nele mundoho ihi,” isi ebag.

¹⁸Hit nukoho TUHAN en on fahet nangno duruk kahep on de henamelmeldoho! Nukoho ai hit fahet de nanggin nenebuhu boruk kahep? Nukoho aire we nukoho mum on hit fahet seleg on de fug.

¹⁹Deg laruhu alere ap singa enakol en buroho longgo uruk men, no beruang nim sal-kwal uruk hag deg laruhu. Ite ap obam sombandoho waharuk kwit o obahat fam enggik dimirebelug weregman kisu en ayeg balduk hag deg laruhu!

²⁰Nukoho TUHAN en aire demdoho mum on feik waruhu, seleg de fug o orohole babunag on neg waruhu.

²¹ TUHAN ele uruk kwit, “Hiren agama fahet ebetuk kwit duruk kahep on etma An den nerim nalitno hauk kahi!

²²Hiren waroho TUHAN enda ahayeg howag ulug yakduk kahep angge mel gandum yalduk on mel walug waharuk kahep on etma An de wauk karuhuk fug. An den eke hiren TUHAN en fanoap nenobahaukwag ulug heng napuk kwit henowam mun sei on feik waharuk on etma An de wauk karuhuk fug.

²³Henasuni-suni angge urukmu ap enesanggo dahom duk ale duruk on etma bale feyek. An de hiren henangge kecapi kong-duruk kahep on etma nerim deg lahi.

²⁴Dipdoho duruk on ai ik waharuk hag waharuk kamag ulug henebiroho duruk kamek, bekitdoho duruk on de ik firig am fug angge wirig atuk kwit neg wereg ai hag duruk kamek.

²⁵ Yaho An nomaliki Israel on, An den hondog heneplug lek kwe iliangge fene waharuk kwit empat puluh tahun anunuroho waharihik. Waharihik deg de An den hit henobam wam og-nutuk on mel waroho yalduk angge fahet mel henobam irihik fug.

²⁶Famen de hiren ketia Sakut hit henowe raja boruk kahep angge ai mot duruk kahep, ne kewan hiren henanggembu dewa debelug mot-duruk kahep. Ai fam hiren duruk kahep on etma fam de hit henonggwareg en hele wat-dalug lauk kahep ai.

²⁷Aire An den hit o kwenang eke o Damsyik en de horog deg fug mu etma mon henebuhukmu duhup. An TUHAN Nunuk Allah Mun Nomamne welahi on ai en mundoho nele marihi,” isi ebag.