Read Ninia Yali AMOS 7 Bible Online

AMOS 7 - Ninia Yali bible

AMOS 7

¹An na hauk hag fam TUHAN Mun Leho on en hweag-nutuk mu hauihik. An nil hauk men de Aren de bulue elang humon eke, ap en at raja obahet enggelangge baloho foruk men de enggelangge keron wilipukmu Aren waldoho forukmu hauihik.

²Hauk men de bulue omano en de enggela yabukmu ket wilipuk on anyo mun felelengdoho nauk katswa. Airoho naukmu an den uruk kwit, “TUHAN Mun Leho welahen on nakni, homaliki su enesiag elehap enebin! It enebe mun dotdeg lit, maben deg ma nangginoho it hambuk ha alereg?” Irihik.

³Airoho irihik mu TUHAN en wene duhuk ulug besi on anyo aham duruk kwit diroho isi, “Hat hil hehen on aire fobik aruhu fug,” isi ebag.

⁴An na og-hauk hag fam hauk men de, TUHAN Mun Leho wereg on anyo en unug neaukmu hauihik. An den hauk men de Aren de omaliki indok fam unggum og-esahuk ulug, mundoho fik-fouk deg latsi. Indok ai en de kwenang apma[6] ik yenggeleg on erahamu melelang duruk kwit, ik il apma nim, yabuk yaho kwe nim mun han bug naukmu hauihik.

⁵Airoho duruk en an nele uruk kwit, “TUHAN Mun Leho welahen on nakni, indok aire fisarik wam fug bale fein! Hat homaliki re enebe dit-dotdeg on enomamne eleg on deg ma ai nangginoho hambuk ha alereg?” Irihik.

⁶Airoho irihik mu TUHAN en dimin ale ulug melaleg latsi ale anyo aham disireg uruk kwit, “Su ohore fobik aruhu fug.” Isi.

⁷TUHAN en an na og-hauk hag fam amu on eke unug neaukmu hauihik. An hauk men de At ebere fak lehet misig eke helep anggen boroho ilit-duruk angge ningdoho bekit belabeg angge fam ilitdoho wirig on fam unduhuk latsi. Airoho unduhuk lit de At enggikmu re hekel ilit duruk angge anyo seneg lit de fak lehet aire bekitdoho oho a, eleg a ulug seneg latsi.

⁸Aren deg lit Aren an hein og neauk kwit, “Amos, Hat de nunggwangge hil hauk kahen?” Isimu. An den onggo uruk kwit, “TUHAN nakni, aire hekel ilit angge bekit ning deg on” irihik. Ai irihik mu TUHAN ele uruk kwit, “An den hekel ilit angge au fam wal hauk kahi aure, An nomaliki Israel on de obahat bekit deg eleg on hag deg ulug duruk kahi. Ne, Ande duhuk ale ulug melaloho ferihik ale aire aham duhuk fug, dik-demdoho unggum og-esahuk en duruk kahi.

⁹At Ishak ambiangma on en wene kabog-duruk katswa kwe etma fobik lilibug duhuk. Ne, ap homi Israel on en oswa deg kwe etma fobik meiyaluhuk. An den at Raja Yerobeam ambiangma on etma mun elehapdoho fesehuk” isi.

¹⁰Amazia o Betel fam etma imam wereg lit ele diroho Yerobeam raja Israel on anyo akit mondotfag, “At Amos de ap homi nim enele seberoho matuk kwit, nakni hat siahap habik wamuhup en enele marehesa. Ne, at ele fam ap homi enendama kwelap enepuk on etma fam de o kwenang nit welahe on au siahap aruhu.

¹¹At ele uruk kwit de nakni hat hebere weim ambiangman wararuhun, ne ap homi Israel on abirangge it enobam embeselug, yatma sabu hetdoho hwik enebik lahup.” Uruk ebag.

¹²Airoho ebagdeg Amazia ele Amos fam uruk kwit, “Nabi yei, Yehuda lakin! lalug de etma wene hweag-esauk kamin. Ne, iren hat hangge nauk on fahet og-hutuk kamag.

¹³Hat de o Betel suma wene eke hweag-nesa fug, kota suma re raja fahet nim ne wene ap homi at apma wereg on en kabog-duruk mu wereg.” Ebag.

¹⁴Ai ebag ma Amos en onggo hweag-utuk kwit, “An nabi welahi aire nunggul nunuk yabuk leho on fahet welahi fug. An de nebere we wam hwaldil ne e ara anggen dahandil noruk kahi on.

¹⁵Famen de TUHAN en an neyabukmu etma weregman hondog napsi reg, mingming napuk kwit, Aren ap homi Israel on enobahet ale etma hweag-esowag ulug mingming napsi on.

¹⁶Aireg ma re TUHAN en hat diroho duhun ulug hweag-hutuk on ai holoho wereg nu. Aire haren an wene hweag-esauk kwit it Israel on en duruk ale ai fahet bet-enepuk kweleg kwe bal nabehen anggere.

¹⁷TUHAN en uruk kwit, hat hohwe re hambena duruk on aruhureg o kota kwe neg noruk karuhu, ne hat homalikisi re weim famen neg warenebuhup. Ne, hat hanggwenang de ap amu on fam yohwan esahup, ne hat hebere o kwenang ap homi TUHAN enapeleg on wereg ma etman wararuhun. It Israel on de enobam indipmen yatma etma og eneplug hwik enebik lahup,” ulug hweag-etfag.