Read Ninia Yali AMOS 8 Bible Online

AMOS 8 - Ninia Yali bible

AMOS 8

¹An na hag fam eke hauk men, TUHAN Mun Omamne wereg on anyo en an unug neauk kwit, si yihig angge fam de anggen dahaneg angge omano mun yuhulig angge neg yohwareg ma hauihik.

²Airoho deg ma TUHAN ele hweag-nutuk kwit, “Amos hat nunggwangge hauk kahen?” Isi. Ai isimu an den onggo uruk kwit, “Si yihig misig fam de anggen yuhulig on neg dahaneg angge yohwareg.” Irihik. Ai irihik mu TUHAN en hweag-nutuk kwit, “An nomaliki Israel enobahet li mundoho horog aha. An den wenggeleg lahi ale ai eke nim aham duhuk fug deg, demdoho unggum og-esahuk en deg lahi.

³Nukoho ai salim suni o bumbuk hun raja wereg kwe etman uruk on de ahamdoho oba suni neg uruk kamuhup. Di kwe su kwe etma ap wareg ling-long hwik-esahupmu omano ahum buag uruk kamuhup.” Isi ebag.

⁴Yaho hiren ap enenggik eleg o su en al bereloho elehap debeseruk kahep omano henesanggo holiek!

⁵Hit henonggwareg hundomog en yig-dauk kwit, “Yaho niren nukoho ebetuk kwit neg welahe on sure mun anunureg angge anyo i. Nit de no gandum anggen omano onggo hun-da hag de nukoho ebetuk kahe on su ahae fotog aik lauk fug oma re. Nunggwe salim nukoho Sabat ai fotog aruhu e, nit nenangge onggo hun-dauk ale indip duk hag anggere? Niren hwenaroho deheg, ilit angge anggin ilit duruk on fam seiale lal enebeheg, nenele en awea oko onggo weheg, duruk kala on.

⁶Gandum mun siag atsi on etma niren onggo along angge fam hunduruhuk. Niren de ap kunggu on aren ombaleg angge we horog seroho baluk fug on hera enepul deg, we iren baleg angge aire eneyog ahap hulilip deg on misig wutdoho fam obalma fouk alereg kweleg famen de niren at ebe onggo balug de nit nenamingming angge welamag ulug fesehuk.” Uruk kahep.

⁷TUHAN Allah ap homi enunggul unuk Israel on enakni anyo en hombuk balduk kwit, “It enobabut kwasikdoho duruk ale etma re An napeleg aruhu fug.

⁸Kwenang mundoho elek duruk mu ap abirangge anggolo hahup, o kwenang abirangge fam etma mundoho mil duhumu Ik Nil funag-lenggag angge duruk hag duruk karuhu.

⁹Duhuk ale sali higit aruhu salim aire An den mo nukoho andundu degman obuk debeheg, kwenangma o nukoho bul angge mum debeheg, duhuk. Ulug An TUHAN Mun Leho welahi on en mundoho ihi.

¹⁰Hiren nukoho leho folug ebetuk kahep on etma re ahamdoho An den fong watuk on debehuk. Ne, henesuni uruk kahep on etma oba yako welamuhup. An den hit henoruk balukwag ulug debehukmu fong waroho wereg ale enegdoho ulug sum karung on bugdoho welamuhup. Hit henebe re omalik akni isinga mel en enomalik wandeba on waratuk mu oba yako wereg hag wereg lamuhup. Ne, nukoho ai salim de mun henenda hesiloho eleg aik lahu,” ulug isi ebag.

¹¹TUHAN Mun Leho on ele uruk kwit, “Li horog aik waruhu salim de An den o kwenang su fam siburu obok mondorik waruhuk. Mu re ap homi en obok hauk kamuhup famen de nauk angge obok hauk kamuhup fug, ne enenda ahe hauk kamuhup famen de enenda ik ahe hauk kamuhup fug. It de wene An den hweag-esauk kahi on anyo fahet obok enebeheg, ahe enebeheg, duruk kamuhup.

¹²Ap homi en de An den hweag-esauk kahi on ai heraril de il utara fil en de il apma selatan fil laheg, ne timur fam en de barat huli fam laheg duruk kamuhup famen de hweag-dauk kamuhup fug.

¹³Nukoho ai salim de ap sauwe enebe mun fano enap famen enenda ahe en enape moruhup.

¹⁴Ap homi en kembu o Samaria on fam unuk hombuk balduk kwit, ‘Dewa enunggul unuk Dan on unuk fam’ eheg ite ‘Dewa Bersyeba on unuk fam eheg’ duruk on etma mundoho ying-amuhup deg inam fug ale aruhu.” Isi ulug ebag.